នៅព្រឹកថ្ងៃទី១៥ ខែមករា ឆ្នាំ២០២៥នេះ គណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) ខេត្តសៀមរាប បានរៀបចំសិក្ខាសាលាឆ្លុះបញ្ចាំងពីលទ្ធផលការងារ នៃការអនុវត្តផែនការសកម្មភាព ឆ្នាំ២០២៤ និងលើកទិសដៅអនុវត្តបន្ត ឆ្នាំ២០២៥ របស់ខ្លួន ក្រោមអធិបតីភាព ឯកឧត្តម តោ គឹមស៊ាន សមាជិកក្រុមប្រឹក្សាខេត្ត លោកជំទាវ ស៊ិន ណម ប្រធានគណៈកម្មាធិការ និង លោកស្រី ម៉ននី រង្សី អភិបាលរងខេត្ត ដោយមានការចូលរួមពីអ្នកពាក់ព័ន្ធជាច្រើនរូប។
លោកជំទាវ ស៊ិន ណម មានប្រសាសន៍ថា សិក្ខាសាលានាពេលនេះ រៀបចំឡើងក្នុងគោលបំណងដើម្បីធ្វើការឆ្លុះបញ្ចាំង ត្រួតពិនិត្យ និងវាយតម្លៃការអនុវត្តផែនការសកម្មភាព និងផែនការថវិកាឆ្នាំ២០២៤ ក៏ដូចជាការផ្តល់ឱកាសដល់អ្នកពាក់ព័ន្ធបានពិភាក្សាអំពីបទពិសោធការងារព្រមទាំងបញ្ហាប្រឈមនានាដែលបានជួបប្រទះក្នុងពេលអនុវត្តការងារកន្លងមក សម្រាប់ជាបទពិសោធក្នុងការគ្រប់គ្រង និងអនុវត្តផែនការសកម្មភាព និងថវិកាឆ្នាំ២០២៥។ សិក្ខាសាលានេះដែរ
នឹងផ្ដល់ឱកាសឱ្យអ្នកចូលរួមមានទំនាក់ទំនង និងសហការគ្នាក្លាយជាធ្លុងមួយក្នុងការលើកកម្ពស់ ព្រមទាំងជំរុញការបង្ក្រាបយេនឌ័រ និងបង្កើនភាពអង់អាចដល់ស្ត្រី ដើម្បីឱ្យស្របតាមផែនការយុទ្ធសាស្ត្រនារីរតនៈរបស់ក្រសួងកិច្ចការនារី។
ព័ត៌មានជាតិ ថ្មីៗ
ថ្លែងក្នុងឱកាសនោះ លោកស្រី ម៉ននី រង្សី អភិបាលរងខេត្ត បានថ្លែងការកោតសរសើរដល់សមាជិកសមាជិកាទាំងអស់ ដែលបានខិតខំប្រឹងប្រែងអនុវត្ដតួនាទី ភារកិច្ចរបស់ខ្លួនរយៈពេល១ឆ្នាំកន្លងមកនេះ ដើម្បីលើកកម្ពស់ការយល់ដឹងពីតម្រូវការរបស់ស្រ្ដី និងកុមារ និងជនដែលងាយរងគ្រោះ ជាពិសេសអនុវត្តនូវផែនការការពារកុមារ ព្រមទាំងបង្កើនភាពអង់អាចដល់ស្រី្តនៅក្នុងក្របខណ្ឌនៃរដ្ឋបាលថ្នាក់ក្រោមជាតិ។
លោកស្រី ម៉ននី រង្សី មានប្រសាសន៍ថា ការអនុវត្តផែនការ តួនាទី ភារកិច្ចបានជោគជ័យមានប្រសិទ្ធភាពបានល្អ អាស្រ័យលើមានការគាំទ្រ និងសហការយ៉ាងជិតស្និទ្ធរបស់ស្ថាប័នពាក់ព័ន្ធ រួមទាំងដៃគូអភិវឌ្ឍ អង្គការសង្គមស៊ីវិល ហើយសកម្មភាពទាំងនេះ បានរួមចំណែកដល់គោលនយោបាយរបស់រាជរដ្ឋាភិបាលកម្ពុជា ដូចជាកំណែទម្រង់វិមជ្ឈការ វិសហមជ្ឈការ កំណែទម្រង់ការគ្រប់គ្រងហិរញ្ញវត្ថុសាធារណៈ និងកំណែទម្រង់រដ្ឋបាលសាធារណៈសម្រាប់ធានាបាននូវភាពជោគជ័យនៃការអនុវត្ដកម្មវិធីនយោបាយ និងយុទ្ធសាស្ត្រចតុកោណរបស់រដ្ឋាភិបាលនាពេលកន្លងមក។ ដូច្នេះសូមស្នើដល់គ្រប់អ្នកពាក់ព័ន្ធទាំងអស់ ត្រូវយកចិត្ដទុកដាក់ក្នុងការចូលរួមអនុវត្ដការងារដោយស្មារតីទទួលខុសត្រូវ មានឆន្ទៈម្ចាស់ការរៀងៗខ្លួន ដើម្បីអនុវត្ដការងារឱ្យមានប្រសិទ្ធភាពខ្ពស់៕
អត្ថបទ និងរូបភាព៖ លោក ធន់ ពូថេ, អោត រត់
កែសម្រួល៖ លោក អ៊ុន ណារាជ្យ
