សិក្ខាកាមសិក្សាផ្នែកជំនាញវិស្វករអគ្គិសនី នៃគម្រោង S4C នៅវិទ្យាស្ថានជាតិពហុបច្ចេកទេសអង្គរ ខេត្ដសៀមរាប បានលើកឡើងថា ការចាប់យកជំនាញវិស្វកម្មអគ្គិសនី ដោយសារពួកគាត់មើលឃើញថាទីផ្សារផ្នែកមួយនេះ មានភាពទូលំទូលាយ ដែលអាចធ្វើឱ្យពួកគាត់ងាយស្រួលរកការងារធ្វើបានល្អប្រសើរ ខណៈដែលបច្ចុប្បន្ននេះ វិស័យអគ្គិសនីក៏កំពុងមានតម្រូវការខ្ពស់សម្រាប់ប្រទេសកម្ពុជាយើង ដែលជាប្រទេសកំពុងអភិវឌ្ឍ ហើយក៏ជាវិស័យអាទិភាពមួយរបស់រាជរដ្ឋាភិបាលកម្ពុជា ដើម្បីផ្ដល់ថាមពល អគ្គិសនី ដែលមានតម្លៃសមរម្យទៅដល់ប្រជាពលរដ្ឋ និងលើកកម្ពស់សេដ្ឋកិច្ចសង្គមរបស់ប្រជាពលរដ្ឋ។
ពួកគាត់លើកឡើងថា ជំនាញអគ្គិសនី គឺមានតម្រូវការច្រើននៅទីផ្សារការងារ ហើយជំនាញអគ្គិសនីនេះ មិនប្រកាន់ភេទប្រុស ឬស្រីទេ ព្រោះអគ្គិសនីមានផ្នែកផ្សេងៗជាច្រើនដែលនិស្សិតនារី ធ្វើការបានដូចជាប្រឡងចូលក្របខណ្ឌរដ្ឋ ឬធ្វើការងារនៅក្រុមហ៊ុនឯកជន ផ្នែកdesign ប្រព័ន្ធអគ្គិសនីក្នុងអគារ, ការថែទាំបរិក្ខារអគ្គិសនី។ ពួកគាត់បានជំរុញដល់យុវជនឱ្យចាប់យកជំនាញវិស្វករអគ្គិសនីឱ្យបានច្រើន ជាពិសេសនៅវិទ្យាស្ថានជាតិពហុបច្ចេកទេសអង្គរ ព្រោះការសិក្សានៅទីនេះ ពួកគេទទួលបានទាំងចំណេះជំនាញ និងប្រាក់ឧបត្ថម្ភប្រចាំខែពីគម្រោងជំនាញសម្រាប់ការប្រកួតប្រជែង ហៅកាត់ថា S4C។ ក្រៅពីនោះ វិទ្យាស្ថាន បានលើកទឹកចិត្តដល់គ្រប់និស្សិតជានារីទាំងអស់ ដែលចង់សិក្សាជំនាញវិស្វករអគ្គិសនី ដោយផ្តល់អាហារូបករណ៍ថែមទៀតផង។
សូមជម្រាបថា នៅក្នុងឆ្នាំ២០២៥នេះ វិទ្យាស្ថានជាតិបច្ចេកទេសអង្គរ បានផ្តល់អាហារូបករណ៍១០០% ដល់សិស្សនិស្សិតប្រមាណជាង ២០០នាក់ សម្រាប់៣មុខជំនាញ ដូចជាវិស្វកម្មសំណង់ស៊ីវិល វិស្វកម្មអេឡិកត្រូនិក និងវិស្វកម្មមេកាត្រូនិក។ ក្រៅពីអាហារូបករណ៍ និស្សិតក៏អាចទទួលបានប្រាក់ឧបត្ថម្ភប្រចាំខែចំនួន៦០ដុល្លារ ពីគម្រោងជំនាញសម្រាប់ការប្រកួតប្រជែង ហៅកាត់ថា S4C ផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
