ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានជំរុញដល់មន្ត្រីនៃមន្ទីរព័ត៌មានខេត្តសៀមរាប ត្រូវបន្តយកចិត្តទុកដាក់បង្កើនការផលិត និងផ្សព្វផ្សាយពីសក្តានុពលតំបន់ទេសចរណ៍ កសិកម្ម ផលិតផលក្នុងមូលដ្ឋាន រួមនឹងសមិទ្ធផលដែលរដ្ឋបាលខេត្តសម្រេចបានជូនដល់សាធារណជនបានដឹងកាន់តែច្បាស់ និងត្រូវបន្តចូលរួមក្នុងការទប់ស្កាត់ព័ត៌មានក្លែងក្លាយឱ្យបានកាន់តែសកម្មបន្ថែមទៀត។
ក្នុងឱកាសជួបសំណេះសំណាលជាមួយថ្នាក់ដឹកនាំ និងមន្ត្រីមន្ទីរព័ត៌មានខេត្តសៀមរាប នៅថ្ងៃទី៣០ ខែមករា ឆ្នាំ២០២៥នេះ ឯកឧត្តមរដ្ឋមន្ត្រី នេត្រ ភក្ត្រា មានប្រសាសន៍ថា មន្ត្រីព័ត៌មានត្រូវតែពង្រឹងសមត្ថភាពរបស់ខ្លួនក្នុងការផលិតព័ត៌មានឱ្យមានគុណភាព ព័ត៌មានពិត មានប្រភពច្បាស់លាស់ និងលឿនរហ័ស ដើម្បីផ្តល់ទំនុកចិត្តដល់ប្រជាពលរដ្ឋមកលើរាជរដ្ឋាភិបាល និងអាជ្ញាធរខេត្ត។ ជាមួយគ្នានេះ បញ្ហាព័ត៌មានក្លែងក្លាយ ក៏កំពុងបង្កការលំបាកជាច្រើននៅក្នុងសង្គមកម្ពុជា ជាមួយព័ត៌មានក្លែងក្លាយកាន់តែសម្បូរបែប ដោយបណ្តាញសង្គមផ្សេងៗ គឺជាប្រភពធំក្នុងការបញ្ចេញព័ត៌មានក្លែងក្លាយ។ ដូច្នេះទាមទារឱ្យមន្ទីរក្នុងនាមជាសេនាធិការឱ្យរដ្ឋបាលខេត្ត ត្រូវបន្តពង្រឹងការតាមដាន និងសហការផ្សាយបំភ្លឺជាមួយអ្នកពាក់ព័ន្ធឱ្យបានលឿន និងទាន់ពេលវេលា។
ព័ត៌មានជាតិ ថ្មីៗ
ឯកឧត្តម រដ្ឋមន្ត្រី ក៏បានថ្លែងនូវការកោតសរសើរ ចំពោះមន្ទីរព័ត៌មានខេត្ត ដែលបានចូលរួមយ៉ាងសកម្មក្នុងការផលិត និងផ្សព្វផ្សាយព័ត៌មាន ចូលរួមបំភ្លឺសាធារណមតិអំពីបញ្ហាផ្សេងៗ ដែលបានកើតឡើងទាក់ទងនឹងខេត្តសៀមរាប និងបានជំរុញលើកទឹកចិត្តឱ្យថ្នាក់ដឹកនាំ និងមន្ត្រីទាំងអស់ ត្រូវប្រកាន់យកអភិក្រមបុរេសកម្ម សកម្ម និងអន្តរសកម្មក្នុងការគ្រប់គ្រងព័ត៌មាន និងសាធារណមតិរបស់ខ្លួនប្រកបដោយប្រសិទ្ធភាព ក្នុងនាមជាសេនាធិការរបស់រដ្ឋបាលខេត្ត លើការងារព័ត៌មាន និងសាធារណមតិ។ ឯកឧត្តម ក៏បានវាយតម្លៃខ្ពស់ចំពោះ មន្ទីរព័ត៌មានខេត្តសៀមរាប ដែលបានសម្រេចបានកិច្ចការងារយ៉ាងច្រើនក្នុងឆ្នាំ២០២៤ កន្លងទៅនេះ ក្នុងការគ្រប់គ្រងព័ត៌មាន និងសោតទស្សន៍ក្នុងខេត្ត រួមទាំងការចូលរួមរៀបចំសណ្តាប់ធ្នាប់វិស័យសារព័ត៌មាន ពង្រឹងការអនុវត្តក្រមសីលធម៌វិជ្ជាជីវៈសារព័ត៌មាន។
បើតាម លោក សេង ផល្លី ប្រធានមន្ទីរព័ត៌មានខេត្តស្តីទី បានឱ្យដឹងថា ពាក់ព័ន្ធនឹងការងារព័ត៌មាន និងសាធារណៈមតិ មន្ទីរបានរៀបចំមន្ត្រីក្រុមការងារសម្របសម្រួលព័ត៌មាន និងសាធារណមតិចំនួន០៥រូប ដែលទទួលស្គាល់ដោយរបស់ក្រសួងព័ត៌មាន ដោយក្នុងរយៈពេល១ឆ្នាំមកនេះ បានអនុវត្តការងារប្រមូលព័ត៌មានវិជ្ជមានបានចំនួន ៨៤១អត្ថបទព័ត៌មាន និងដំណឹងរសើបចំនួន២៩៨។ ក្រៅពីជនបង្គោលទាំង៥រូប មន្ទីរបានបែងចែកក្រុមការងារផលិតព័ត៌មាន ចូលរួមគាំទ្រសកម្មភាពអប់រំសតិអារម្មណ៍ពលរដ្ឋប្រកបដោយបុរេសកម្ម សកម្ម និងអន្តរសកម្មផងដែរ៕
អត្ថបទ៖ លោក យូ វង្ស
កែសម្រួល៖ លោក អ៊ុន ណារាជ្យ
