នៅព្រឹកថ្ងៃទី៣១ ខែមករា ឆ្នាំ២០២៥នេះ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប (គ.ខ.ប.ជ) បានបើកកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅបន្តឆ្នាំ២០២៥ ក្រោមអធិបតីភាព លោកជំទាវ ឧត្តមសេនីយ៍ឯក ប៉ុណ្ណ សំខាន់ អគ្គលេខាធិការដ្ឋានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកជំទាវ ស៊ិន ណម សមាជិកក្រុមប្រឹក្សាខេត្ត និងលោកស្រី ម៉ននី រង្សី អភិបាលរងខេត្ត និងជាអនុប្រធាន គ.ខ.ប.ជ ដោយមានការចូលរួមពីអ្នកពាក់ព័ន្ធជាច្រើនរូប។
លោកស្រី ម៉ននី រង្សី មានប្រសាសន៍ថា ក្នុងឆ្នាំ២០២៤កន្លងទៅនេះ គ.ខ.ប.ជ បានអនុវត្តតួនាទីភារកិច្ចយ៉ាងសកម្មភាព ស្របតាមគោលនយោបាយរបស់រាជរដ្ឋាភិបាល សេចក្តីណែនាំរបស់ គ.ប.ជ និងបទដ្ឋានគតិយុត្តពាក់ព័ន្ធ ដោយមានការចូលរួមពីគ្រប់អ្នកពាក់ព័ន្ធ ដែលជាកម្លាំងចលករដ៏សំខាន់ ក្នុងការជំរុញការបង្ការទប់ស្កាត់ លុបបំបាត់ អំពើជួញដូរមនុស្ស អំពើធ្វើអាជីវកម្មផ្លូវភេទ ការកេងប្រវ័ញ្ចកម្លាំងពលកម្ម និងអំពើហិង្សាទាក់ទងនឹងយេនឌ័រ។
លោកស្រី ម៉ននី រង្សី បន្តថា គ.ខ.ប.ជ ក្នុងឆ្នាំ២០២៤កន្លងទៅនេះ បានរៀបចំ និងអនុវត្តផែនការសកម្មភាពដោយផ្អែកទៅលើយុទ្ធសាស្រ្តចំនួន៤ នៃផែនការសកម្មភាពជាតិប្រយុទ្ធប្រឆាំងអំពើជួញដូរមនុស្ស ៥ឆ្នាំ (២០២៤-២០២៨) រួមមាន៖ទី១.លើកកម្ពស់ការបង្ការទប់ស្កាត់រាល់ទម្រង់នៃអំពើជួញដូរមនុស្ស ការកេងប្រវ័ញ្ច និងការរំលោភបំពានផ្លូវភេទលើកុមារ, ទី២.ការពង្រឹងប្រព័ន្ធយុត្តិធម៌ព្រហ្មទណ្ឌ (បង្ក្រាប និងផ្តន្ទាទោស), ទី៣.កិច្ចគាំពារជនរងគ្រោះ និងទី៤.ការងារច្បាប់គោលនយោបាយ និងកិច្ចសហប្រតិបត្តិការ។ រយៈពេល១ឆ្នាំនេះដែរ យើងសង្កេតឃើញថា បទល្មើសនៅតែកើតមាន ហើយប្រជាពលរដ្ឋនៅតែបន្តរងគ្រោះជាបន្តបន្ទាប់ ដែលកើតឡើងទាំងនៅក្នុង និងក្រៅប្រទេស តាមគ្រប់រូបភាពផ្សេងៗ។
ព័ត៌មានជាតិ ថ្មីៗ
លោកស្រីបង្ហាញថា បើទោះបីជាយ៉ាងណា ក្រុមការងារក៏នៅតែបន្តអប់រំផ្សព្វផ្សាយជាសាធារណៈ ដាស់តឿន ក្រើនរំលឹកជាប្រចាំដល់ប្រជាពលរដ្ឋគ្រប់ទីកន្លែង តាមគ្រប់រូបភាព ប៉ុន្តែប្រជាពលរដ្ឋមួយចំនួនហាក់ដូចជានៅតែមិនទាន់បានយកចិត្តទុកដាក់ ហើយនៅតែមានអ្នកបន្តផ្សងព្រេង និងជឿលើការអូសទាញពីជនខិលខូច ជាមេខ្យល់ ជាជាងការដាស់តឿនឱ្យប្រុងប្រយ័ត្នរបស់អាជ្ញាធរ និងអ្នកពាក់ព័ន្ធ។ ក្នុងន័យនេះ សូមស្នើដល់គ្រប់អ្នកពាក់ព័ន្ធ ត្រូវបន្តធ្វើការផ្សព្វផ្សាយដល់ប្រជាពលរដ្ឋកុំឱ្យបន្តចាញ់បោកមេខ្យល់នាំឆ្លងដែនខុសច្បាប់ ឬការធ្វើចំណាកស្រុកដោយប្រថុយប្រថាន ដែលនាំឱ្យជួបនូវផលវិបាកជាយថាហេតុណាមួយ ដែលអាចធ្វើឱ្យប៉ះពាល់ដល់អាយុជីវិត ឬធ្លាក់ខ្លួនទៅជាជនរងគ្រោះដោយអំពើជួញដូរមនុស្សគ្រប់រូបភាព។ ត្រូវរួមគ្នាជំរុញការអនុវត្តតាមមុខសញ្ញារៀងៗខ្លួន ចូលរួមសហការដោយប្រើប្រាស់កម្លាំងសរុប មធ្យោបាយសរុប វិធានការសរុប និងធនធានសរុប ក្នុងការបង្រ្កាបឱ្យបានរាល់បទល្មើសជួញដូរមនុស្ស អំពើធ្វើអាជីវកម្មផ្លូវភេទ ពិសេសលើស្រ្តី និងកុមារ និងបទល្មើសរំលោភបំពាននានា ដើម្បីជួយប្រជាពលរដ្ឋយើងឱ្យរួចផុតពីភាពរងគ្រោះ និងងាយរងគ្រោះ៕
អត្ថបទ និងរូបភាព៖ លោក ឈិត សាវី, ទ្រា ពន្លឺ
កែសម្រួល៖ លោក អ៊ុន ណារាជ្យ
