ក្នុងឱកាសជួបសំណេះសំណាលជាមួយប្រជានេសាទក្នុងឃុំកំពង់ឃ្លាំង ស្រុកសូទ្រនិគម ដើម្បីផ្សព្វផ្សាយ ការងារពង្រឹងការគ្រប់គ្រង អភិរក្សធនធានធម្មជាតិ និងការបង្ក្រាបបទល្មើសជលផល នារសៀលថ្ងៃទី៣១ ខែមករា ឆ្នាំ២០២៥ អាជ្ញាធរខេត្តសៀមរាប បានអំពាវដល់ប្រជានេសាទសូមចូលរួមគោរពច្បាប់ជលផលទាំងអស់គ្នា ជៀសវាងការប្រើឧបករណ៍នេសាទខុសច្បាប់ ព្រោះវាប្រឈមនឹងការបង្ក្រាបពីសំណាក់សមត្ថកិច្ចពាក់ព័ន្ធ និងនាំឱ្យខាតបង់ផលប្រយោជន៍របស់បងប្អូន។
លោក អ៊ឹង គឹមលាង អភិបាលរងខេត្តសៀមរាប បានទទូចសុំឱ្យប្រជានេសាទដែលមានមុខរបរនេសាទ ហើយប្រើឧបករណ៍ខុសច្បាប់នោះ ត្រូវបញ្ឈប់បន្ទាន់ ដោយងាកមកប្រើឧបករណ៍ដែលត្រឹមត្រូវតាមច្បាប់កំណត់ ដើម្បីកុំឱ្យខាតបង់ផលប្រយោជន៍បងប្អូន និងដើម្បីថែរក្សាធនធានធម្មជាតិនៅក្នុងបឹងទន្លេសាបឱ្យបានស្ថិតស្ថេរ។ ជាមួយគ្នានេះ ក្នុងនាមអាជ្ញាធរខេត្ត មិនចង់ឃើញប្រជាពលរដ្ឋក្នុងមូលដ្ឋានរបស់ខ្លួនមានការលំបាកនោះទេ ប៉ុន្តែការប្រើឧបករណ៍នេសាទខុសច្បាប់ជាការបំផ្លាញធនធានធម្មជាតិមួយយ៉ាងធ្ងន់ធ្ងរ ដូច្នេះលោកសូមអំពាវនាវដល់ប្រជានេសាទ ត្រូវចូលរួមទាំងអស់គ្នា។
សូមជម្រាបថា ការចុះជួបសំណេះសំណាលនេះ ធ្វើឡើងបន្ទាប់ពីមានប្រជាពលរដ្ឋក្នុងឃុំកំពង់ឃ្លាំង ដែលមានមុខរបរអូសលៀសក្នុងបឹងទន្លេសាបដោយប្រើទូកម៉ាស៊ីន បានលើកគ្នាមកកាន់សាលាខេត្តសៀមរាប ដើម្បីសុំការអន្តរាគមន៍ពីអាជ្ញាធរខេត្ត អនុញ្ញាតឱ្យពួកគាត់បានធ្វើអាជីវកម្មធម្មតាវិញ ខណៈពួកគាត់ត្រូវបានក្រុមការងារបង្រ្កាបបទល្មើសជលផល និងអាជ្ញាធរមូលដ្ឋាន បានធ្វើការប្រជុំផ្សព្វផ្សាយមិនឱ្យចេញទៅប្រកបរបរនេសាទដូចមុនៗនោះឡើយ ដែលធ្វើឱ្យពួកមានការព្រួយបារម្ភពីការប៉ះពាល់ដល់សេដ្ឋកិច្ចគ្រួសារ។
ឯកឧត្តម ប៉ែន ផល្លិកា អនុរដ្ឋលេខាធិការក្រសួងកសិកម្ម បានបង្ហាញថា ការអូសលៀសដោយប្រើទូកម៉ាស៊ីន ជាការប្រព្រឹត្តល្មើសច្បាប់ ហើយវាបានបំផ្លាញប្រព័ន្ធជីវៈចម្រុះនៅក្រោមទឹក បំផ្លាញពូជត្រីមួយចំនួនដែលពងកូននៅក្រោមទឹក ដូចជាត្រីអណ្តែង ត្រីក្រាញ់ជាដើម។ ចំពោះបឹងទន្លេសាបជាបេះដូងរបស់កម្ពុជា និងជាទីតាំងផលិតត្រីទឹកសាបដ៏ធំមួយនៅក្នុងតំបន់ ដូច្នេះបងប្អូនប្រជានេសាទត្រូវចូលរួមគោរពច្បាប់ ដោយប្រើឧបករណ៍នេសាទទៅតាមអ្វីដែលច្បាប់បានកំណត់។ ជាមួយគ្នានេះ ប៉ុស្តិ៍នគរបាលរដ្ឋបាលមូលដ្ឋានត្រូវកំណត់មុខសញ្ញា និងបង្ក្រាបឱ្យខានតែបាន ចំពោះអ្នកនេសាទណាដែលប្រើឧបករណ៍ឆក់ ព្រោះទង្វើនេះជាការបំផ្លាញធនធានមច្ឆាជាតិដ៏ធ្ងន់ធ្ងរ។
ក្នុងឱកាសនោះដែរ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម បានបញ្ជាក់ថា បច្ចុប្បន្ននេះក្រសួង និងអ្នកពាក់ព័ន្ធបានរៀបចំជាសេចក្តីព្រាងច្បាប់ថ្មីស្តីពីជលផល ដែលស្របទៅតាមស្ថានភាពជាក់ស្តែងរបស់បងប្អូនប្រជានេសាទ។ ដូច្នេះក្នុងអំឡុងពេលអន្តរកាលនេះ សូមឱ្យប្រជានេសាទទាំងអស់ត្រូវគោរព និងអនុវត្តទៅតាមច្បាប់ចាស់ដែលកំពុងមានសុពលភាពនៅឡើយ ជៀសវាងការបង្ក្រាបពីសំណាក់អាជ្ញាធរ ព្រោះថាអាជ្ញាធរនៅតែបន្តការអនុវត្តច្បាប់ដែលបានកំណត់ នៅក្នុងការការពារធនធានធម្មជាតិ ហើយការការពារនេះ មិនមែនសម្រាប់នរណាម្នាក់នោះទេ គឺសម្រាប់ពលរដ្ឋកម្ពុជាទាំងមូល៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
