នៅរសៀលថ្ងៃទី៣១ ខែមករា ឆ្នាំ២០២៥នេះ ឯកឧត្ដម ទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំមន្ត្រីជំនាញ និងអាជ្ញាធរមូលដ្ឋានចុះពិនិត្យការបូមទឹកជួយសង្គ្រោះស្រូវរបស់បងប្អូនប្រជាកសិករចំនួន ៥០០ហិកតា ក្នុងចំណោមស្រូវដែលទទួលផលប្រមាណ ១.០០០ហិកតា ស្ថិតក្នុងឃុំស្ពានត្នោត ស្រុកជីក្រែង ខេត្ដសៀមរាប។
ឯកឧត្ដម ទេសរដ្ឋមន្រ្តី គន់ គីម មានប្រសាសន៍ថា រាជរដ្ឋាភិបាលកម្ពុជា បានយកចិត្ដទុកដាក់យ៉ាងខ្លាំងចំពោះការជួយបងប្អូនប្រជាកសិករទូទាំងប្រទេសដែលកំពុងជួបប្រទះបញ្ហាប្រឈមដោយសារការខ្វះខាតទឹកដើម្បីសង្គ្រោះស្រូវ។ ជាក់ស្ដែងស្រូវរបស់បងប្អូនប្រជាកសិករនៅស្រុកជីក្រែង ដែលមានប្រភពទឹកគ្រប់គ្រាន់ ហើយត្រូវបានអាជ្ញាធរជួយសង្គ្រោះបានទាន់ពេលវេលាធ្វើឱ្យទិន្នផលស្រូវក៏មិនមានការខូចខាត តែយ៉ាងណាអាជ្ញាធរពាក់ព័ន្ធត្រូវបន្តតាមដាន និងអន្តរាគមន៍ទឹកឱ្យបានគ្រប់គ្រាន់ជូនដល់ប្រជាកសិករ ខណៈស្រែប្រាំងប្រមាណ៥០០ហិកតា ក្នុងចំណោម១០០០ហិកតា ត្រូវបានសង្គ្រោះ។
ឯកឧត្ដម ទេសរដ្ឋមន្រ្តី ក៏បានអំពាវនាវដល់បងប្អូនប្រជាកសិករទាំងអស់ ត្រូវមានសាមគ្គីភាពគ្នាលើការងារមួយនេះ ពិតណាស់បងប្អូនទាំងអស់សុទ្ធតែមានតម្រូវការទឹកដើម្បីជួយសង្គ្រោះស្រូវរបស់បងប្អូន តែយ៉ាងណាអាជ្ញាធរពាក់ព័ន្ធកំពុងបន្តលើការងារជួយសង្គ្រោះស្រូវរបស់បងប្អូនឱ្យបានទាំងអស់គ្នាទាន់ពេលវេលា ដោយមិនទុកបងប្អូនណាចោលឡើយ។ ជាមួយគ្នានេះ ក៏សូមអំពាវនាវដល់បងប្អូនប្រជាពលរដ្ឋសូមកុំធ្វើ ឬសាងសង់អ្វីប៉ះពាល់ជាមួយប្រឡាយ ចំណីផ្លូវ ឬផ្លូវទឹក ព្រោះវានឹងធ្វើឱ្យយើងកាន់តែពិបាកក្នុងការគ្រប់គ្រង និងប្រើប្រាស់ទឹក ហើយអនាគតយើងអាចនឹងត្រូវសាងសង់ ឬពង្រីកប្រព័ន្ធធារាសាស្ត្រវានឹងធ្វើឱ្យប៉ះពាល់ដល់ផលប្រយោជន៍រួមផងដែរ។
ព័ត៌មានជាតិ ថ្មីៗ
បើតាម លោក បូ ម៉េងទ្រី អភិបាលស្រុកជីក្រែង បានឱ្យដឹងថា ស្រូវប្រាំងទាំង៥០០ហិចតា ដែលកំពុងបូមទឹកសង្គ្រោះ ស្ថិតនៅភូមិសាស្ត្រភូមិអូរក្រោម ឃុំស្ពានត្នោត ហើយ៥០០ហិកតាទៀតកំពុងប្រមូលផល ចំពោះទឹកដែលបានបញ្ចូលដាក់ស្រែនេះ គឺបានបង្ហូរចេញពីទំនប់ម្កាក់៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
