ផ្លូវមួយខ្សែតភ្ជាប់ពីឃុំក្រូចគរ ស្រុកក្រឡាញ់ ទៅឃុំគោល ស្រុកអង្គរជុំ ខេត្តសៀមរាប ជាប្រភេទផ្លូវក្រាលដីល្បាយក្រួស មានប្រវែង៥.៣៦៩ម៉ែត្រ ទទឹង៨ម៉ែត្រ កម្រាស់០,២ម៉ែត្រ ត្រូវបានបើកការដ្ឋានជួសជុលឡើងវិញជាផ្លូវការ នៅថ្ងៃទី០៣ ខែកុម្ភៈ ឆ្នាំ២០២៥នេះ ដែលជាអំណោយដ៏ថ្លៃថ្លារបស់សម្តេចធិបតី ហ៊ុន ម៉ាណែត នាយករដ្ឋមន្ត្រី តាមរយៈក្រសួងអភិវឌ្ឍន៍ជនបទ។
ក្នុងនាមអាជ្ញាធរ និងប្រជាពលរដ្ឋក្នុងមូលដ្ឋានទាំងពីរ លោក សុខ ណារ៉េត អភិបាលស្រុកក្រឡាញ់ បានសម្ដែងនូវក្ដីរីករាយ និងគោរពថ្លែងអំណរគុណចំពោះសម្តេចធិបតីនាយករដ្ឋមន្រ្តី ដែលតែងតែយកចិត្តទុកដាក់ គិតគូរពីសុខទុក្ខរបស់ប្រជាពលរដ្ឋនៅគ្រប់ទីកន្លែង។ ជាក់ស្ដែងអំណោយផ្លូវមួយខ្សែនាពេលនេះ ពិតជាបានជួយសម្រួល និងបង្កភាពងាយស្រួលដល់ការធ្វើដំណើររបស់ប្រជាពលរដ្ឋ ពីទីជនបទទៅកាន់ទីប្រជុំជន និងឆ្លើយតបបានតាមការចង់បានរបស់ប្រជាពលរដ្ឋក្នុងមូលដ្ឋាន។
ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប មានប្រសាសន៍ថា មានផ្លូវ គឺមានក្តីសង្ឃឹម ហើយផ្លូវ១ខ្សែនេះ គឺពិតជាមានសារៈសំខាន់ណាស់សម្រាប់បងប្អូនប្រជាពលរដ្ឋក្នុងទីជនបទ ជាពិសេសជួយកាត់បន្ថយពេលវេលា ជួយសម្រួលដល់ការធ្វើដំណើរ និងការដឹកជញ្ជូនផ្សេងៗបានងាយស្រួល ឆាប់រហ័ស ដែលកត្តានេះនឹងរួមចំណែកលើកកម្ពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋយើងថែមទៀតផង។ ជាមួយគ្នានោះ ឯកឧត្តម ក៏សូមការអធ្យាស្រ័យពីប្រជាពលរដ្ឋមានលំនៅឋានក្បែរដងផ្លូវនេះ មេត្តាយោគយល់ ព្រោះអាចមានការប៉ះពាល់ដោយការហុយដី ឬមានការប៉ះពាររបងផ្ទះបងប្អូនបន្តិចបន្តួច។ ហើយពេលផ្លូវនេះសាងសង់រួចរាល់ សូមបងប្អូនរួមគ្នាថែរក្សាផ្លូវនេះឱ្យបានល្អ កុំដឹកលើសទម្ងន់ និងគោរពច្បាប់ចរាចរទាំងអស់គ្នា។
ឯកឧត្តម អ៊ិន ចន្ថា រដ្ឋលេខាធិការក្រសួងអភិវឌ្ឍជនបទ មានប្រសាសន៍ថា រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាពនៅកម្ពុជា ដោយឈរលើសរសរស្ដម្ភគន្លឹះចំនួន៥ គឺមនុស្ស ផ្លូវទឹក ភ្លើង និងបច្ចេកវិទ្យាឌីជីថល។
ឯកឧត្តម រដ្ឋលេខាធិការ មានប្រសាសន៍ទៀតថា ការអភិវឌ្ឍហេដ្ឋារចនាសម្ព័ន្ធរូបវ័ន្ត និងគមនាគមន៍នៅជនបទ ពិតជាមានសារៈសំខាន់ណាស់ ក្នុងការជំរុញដំណើរការអន្តរកម្មផ្នែកសេដ្ឋកិច្ច និងសង្គមកិច្ច រវាងតំបន់ជនបទ និងទីប្រជុំជន ហើយផ្លូវជនបទបានដើរតួជាសសៃឈាមសេដ្ឋកិច្ចដ៏សំខាន់ក្នុងការតភ្ជាប់សកម្មភាពធុរកិច្ចផ្សេងៗ ក្នុងតំបន់ឱ្យមានភាពរស់រវើក និងកាន់តែសកម្មថែមទៀត ដែលជាមូលដ្ឋានគ្រឹះក្នុងការជំរុញ កំណើនប្រាក់ចំណូលរបស់ប្រជាជននៅជនបទ។ ការលើកកម្រិតផ្លូវជនបទ ពីផ្លូវដីសទៅជាផ្លូវល្បាយក្រួស ឬផ្លូវក្រាលកៅស៊ូ ឬក្រាលបេតុង គឺបានជួយសម្រួល និងផ្តល់ផលប្រយោជន៍ជាច្រើនដល់ប្រជាជននៅជនបទ ដូចជាភាពងាយស្រួលក្នុងការធ្វើដំណើរ ចំណេញពេលវេលា កាត់បន្ថយការចំណាយក្នុងការដឹកជញ្ជូនកសិផលទៅកាន់ទីផ្សារ និងមានភាពងាយស្រួលក្នុងការទទួលបាននូវសេវាសាធារណៈផ្សេងៗផងដែរ៕
អត្ថបទ និងរូបភាព៖ លោក យូ វង្ស, ទ្រា ពន្លឺ
កែសម្រួល៖ លោក អ៊ុន ណារាជ្យ
