កាលពីថ្ងៃទី០៣ ខែកុម្ភៈ ឆ្នាំ២០២៥នេះ ការិយាល័យនគរបាលចរាចរណ៍ផ្លូវគោកខេត្តសៀមរាប បានសហការជាមួយរដ្ឋបាលស្រុកស្វាយលើ បានធ្វើការអប់រំ និងផ្សព្វផ្សាយច្បាប់ចរាចរណ៍ផ្លូវគោកជូនដល់អាជ្ញាធរមូលដ្ឋាន និងអ្នកពាក់ព័ន្ធក្នុងស្រុកស្វាយលើ ខេត្តសៀមរាប ដោយពិធីនេះក៏មានការចូលរួមពី លោក ហ៊ុន ហួន ប្រធានក្រុមប្រឹក្សាស្រុក លោក អៀង ពិសិដ្ឋ អភិបាលស្រុក និង លោកវរសេនីយ៍ទោ ឈិត ឆាត នាយរងការិយាល័យនគរបាលចរាចរណ៍ផ្លូវគោក នៃស្នងការនគរបាលខេត្តសៀមរាប។
លោក អៀង ពិសិដ្ឋ អភិបាលស្រុក មានប្រសាសន៍ថា ការផ្សព្វផ្សាយច្បាប់ចរាចរណ៍ផ្លូវគោកនាពេលនេះ គឺដើម្បីលើកកម្ពស់ការយល់ដឹងពីផ្នែកច្បាប់ ការគោរពច្បាប់ ចូលរួមចំណែកក្នុងការសម្រេចនូវចក្ខុវិស័យរបស់រាជរដ្ឋាភិបាល ហើយក៏ជាការពញ្ញាក់ស្មារតីដល់យើងគ្រប់គ្នា ក៏ដូចជាអ្នកប្រើប្រាស់ផ្លូវ ឱ្យយកចិត្តទុកដាក់ខ្ពស់ និងចូលរួមគោរពច្បាប់ស្ដីពីចរាចរណ៍ផ្លូវគោក សំដៅចូលរួមទប់ស្កាត់ កាត់បន្ថយគ្រោះថ្នាក់ចរាចរណ៍ឱ្យនៅកម្រិតទាប ឆ្លើយតបទៅនឹងផែនការសកម្មភាពទាំង ៨ចំណុច របស់គណៈកម្មាធិការជាតិសុវត្ថិភាពចរាចរណ៍ផ្លូវគោក ក៏ដូចជាលេខាធិការដ្ឋានសុវត្ថិភាពចរាចរណ៍ផ្លូវគោកខេត្តសៀមរាបផងដែរ។
លោកអភិបាលស្រុកបន្តថា ការផ្សព្វផ្សាយនេះដែរ នឹងធ្វើឱ្យមន្ត្រីយើងគ្រប់រូបកាន់តែយល់ច្បាស់អំពីច្បាប់ចរាចរណ៍ផ្លូវគោក ក្នុងការចូលរួមអនុវត្តច្បាប់ឱ្យបានពេញលេញ ព្រមទាំងបន្តការអប់រំ ណែនាំដល់សមាជិកក្នុងគ្រួសារ និងបងប្អូនប្រជាពលរដ្ឋក្នុងមូលដ្ឋានពីអ្វីពាក់ព័ន្ធនឹងច្បាប់ចរាចរផ្លូវគោកថែមទៀតផង។
លោកវរសេនីយ៍ទោ ឈិត ឆាត នាយរងការិយាល័យនគរបាលចរាចរណ៍ផ្លូវគោកខេត្ត បានលើកឡើងថា ក្នុងការរឹតបន្តឹង អនុវត្តច្បាប់ចរាចរណ៍ផ្លូវគោក ការរក្សាសណ្តាប់ធ្នាប់ចរាចរណ៍ផ្លូវគោក គឺដោយសារគ្រោះថ្នាក់ចរាចរណ៍ បានបង្កផលវិបាកជាច្រើនដល់សង្គម ប្រជាពលរដ្ឋ និងបានបង្កផលប៉ះពាល់ដល់គោលនយោបាយ កាត់បន្ថយភាពក្រីក្ររបស់រាជរដ្ឋាភិបាល។ គ្រោះថ្នាក់នេះនឹងបន្តអូសបន្លាយក្នុងរយៈពេលវែង ហើយអាចនឹងមានកំណើនខ្ពស់ប្រសិនបើកង្វះវិធានការទប់ស្កាត់ប្រកបដោយតម្លាភាព ប្រសិទ្ធភាព និងកង្វះការចូលរួមគោរពអនុវត្តច្បាប់ពីសំណាក់អ្នកប្រើប្រាស់ផ្លូវគ្រប់រូប។ ដូច្នេះប្រកាសនេះ ទាមទារឱ្យសាធារណជនទូទៅចូលរួមអនុវត្ត និងគោរពច្បាប់ចរាចរផ្លូវគោក ដើម្បីសុខសុវត្ថិភាពទាំងអស់គ្នា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
