ថ្លែងក្នុងកិច្ចប្រជុំសាមញ្ញលើកទី៩ របស់ក្រុមប្រឹក្សាខេត្តសៀមរាប នៅថ្ងៃទី០៤ ខែកុម្ភៈ ឆ្នាំ២០២៥នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្ត បានណែនាំឱ្យអាជ្ញាធរគ្រប់ជាន់ថ្នាក់ទូទាំងខេត្ត ត្រូវក្តាប់ឱ្យបានលើការងារថែរក្សាសន្តិសុខ សណ្តាប់ធ្នាប់ និងសុវត្ថិភាពនៅក្នុងមូលដ្ឋាន ដើម្បីភាពសុខសាន្តរបស់បងប្អូនប្រជាពលរដ្ឋ។
ក្នុងឱកាសនោះដែរ ឯកឧត្តម លី សំរិទ្ធ ក៏បានវាយតម្លៃខ្ពស់ ចំពោះលទ្ធផលការងាររបស់រដ្ឋបាលខេត្ត ដែលសម្រេចបានសម្រាប់ខែមករា កន្លងមក ហើយក៏សូមឱ្យមន្ត្រីទទួលបន្ទុកក្នុងការបូកសរុបរបាយការណ៍ ធ្វើត្រួតពិនិត្យ និងកែសម្រួលឡើងវិញ ចំពោះពាក្យពេជ្រ និងតួលេខមួយចំនួនឱ្យបានត្រឹមត្រូវ។ ឯកឧត្តម ក៏បានណែនាំឱ្យថ្នាក់ដឹកនាំក្រុងស្រុក ត្រូវគ្រប់គ្រងលើស្ថាប័នអង្គភាពក្រោមឱវាទក្នុងមូលដ្ឋានរបស់ខ្លួនឱ្យបានល្អ ដើម្បីធានាឱ្យបាននូវទំនុកចិត្តរបស់ប្រជាពលរដ្ឋ។
ឯកឧត្តមបន្តថា ចំពោះសំណួរសំណូមពររបស់បងប្អូនប្រជាពលរដ្ឋដែលទទួលបាកន្លងមក ក្រុមការងារបានធ្វើការដោះស្រាយបានជាបណ្តើរៗហើយ និងមួយចំនួនកំពុងបន្តដោះស្រាយ ហើយរាល់សំណួរសំណូមពរដែលបានដោះស្រាយហើយ សូមឱ្យអាជ្ញាធរមូលដ្ឋានយកលទ្ធផលទាំងនោះ ទៅធ្វើការផ្សព្វផ្សាយជូនបងប្អូនប្រជាពលរដ្ឋដែលជាម្ចាស់សំណួរសំណូមពរ ឱ្យពួកគាត់បានដឹងទាំងអស់គ្នា។ ជាមួយគ្នានោះ សូមឱ្យថ្នាក់ដឹកនាំគ្រប់លំដាប់ថ្នាក់ ត្រូវមានទំនួលខុសត្រូវខ្ពស់លើការបំពេញភារកិច្ចរបស់ខ្លួនឱ្យបានខ្ជាប់ខ្ជួន។
ក្នុងឱកាសនោះដែរ លោក លី សារី អភិបាលរងខេត្ត ក៏បានជំរុញដល់អាជ្ញាធរក្រុងស្រុក លើការអនុវត្តការងាររដ្ឋបាលនៅក្នុងមូលដ្ឋានខ្លួន ត្រូវផ្តោតសំខាន់លើការផ្ដល់សេវាសាធារណៈ ជូនដល់បងប្អូនប្រជាពលរដ្ឋក្នុងមូលដ្ឋានប្រកបដោយគុណភាពខ្ពស់ និងមានតម្លាភាព។
សូមជម្រាបថា កិច្ចប្រជុំសាមញ្ញលើកទី៩ របស់ក្រុមប្រឹក្សាខេត្តនាពេលនេះដែរ សមាជិកសមាជិកាទាំងអស់ ក៏បានធ្វើការពិនិត្យ ពិភាក្សា និងអនុម័ត ផ្តល់គោលការណ៍ដោះស្រាយសម្រាប់បញ្ជីសំណួរសំណូមពរចំនួន ២៥៩ករណី អំពីបញ្ហាអគ្គិសនី ហេដ្ឋារចនាសម្ព័ន្ធ ការងារអប់រំ សុខាភិបាល វិវាទដីធ្លី និងវិស័យរដ្ឋបាល ដែលទទួលបានកាលពីឆ្នាំ២០២៤កន្លងទៅ ព្រមទាំងបានអនុម័តលើសេចក្តីព្រាងប្រតិទិនសម្រាប់ការរៀបចំកម្មវិធីវិនិយោគបីឆ្នាំរំកិល ២០២៦-២០២៨ របស់រដ្ឋបាលខេត្តសៀមរាបផងដែរ៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
