កាលពីពេលថ្មីៗកន្លងទៅនេះ ប្រាសាទអង្គរវត្តរបស់ព្រះរាជាណាចក្រកម្ពុជា ត្រូវបានជាប់ចំណាត់ថ្នាក់លេខ១ ដែលជាទីកន្លែងទស្សនាដ៏ល្បីបំផុតនៅក្នុងពិភពលោក ក្នុងចំណោមកន្លែងល្បីបំផុតទាំង៣២ ដែលចេញផ្សាយដោយ U.S. News & World Report ខណៈដែលប្រជាពលរដ្ឋ រួមនឹងអ្នកដែលប្រកបរបរក្នុងវិស័យទេសចរណ៍បានបង្ហាញក្ដីរីករាយ និងមានមោទនភាពយ៉ាងខ្លាំងជាមួយនឹងលទ្ធផលមួយនេះ។
លោក ពិន ពណ្ណរាយ ប្រតិបត្តិករទេសចរណ៍ក្នុងក្រុងសៀមរាប បានបង្ហាញនូវក្ដីរីករាយ និងមានមោទនភាព ចំពោះប្រាសាទអង្គរវត្តរបស់ខ្មែរ ដែលជាតំបន់ទេសចរណ៍នៃខេត្តសៀមរាប ឈរនៅលេខរៀងទី១ លើតំបន់ទស្សនាថ្មីល្បីៗជាច្រើនទៀតនៅលើពិភពលោក។ លោកថា អង្គរវត្តដែលជាកន្លែងទស្សនាដ៏ល្បីបំផុតនៅលើពិភពលោក គឺពិតជាសក្ដិសម្យបំផុត ហើយការកើតឡើងទាំងអស់នេះ មិនមែនកើតឡើងដោយចៃដន្យនោះឡើយ គឺសុទ្ធតែជាកេរ្តិ៍មរតកដែលដូនតាខ្មែរបានបន្សល់ទុក និងមានការខិតខំប្រឹងប្រែងអភិរក្ស ថែរក្សា និងអភិវឌ្ឍបន្តដោយរាជរដ្ឋាភិបាល ប្រជាពលរដ្ឋ និងអ្នកពាក់ព័ន្ធផ្សេងៗទៀត។
មគ្គុទ្ទេសក៍ទេសចរណ៍ ២រូបទៀត បានលើកឡើងថា ប្រាសាទអង្គរវត្ដ ពិតជាសាក់សមបំផុតដែលជាប់ចំណាត់ថ្នាក់លេខមួយ នៅលើតំបន់ទស្សនាល្បីៗទាំង៣២ នៅលើពិភពលោក។ ប្រាសាទអង្គរវត្ដ មិនត្រឹមតែជាកន្លែងទស្សនាដ៏ល្បីប៉ុណ្ណោះទេ ថែមទាំងប្រជុំដោយវប្បធម៌ អរិយធម៌ ព្រមទាំងមានតារាសាស្ដ្រដ៏ល្បីល្បាញនៅលើពិភពលោក ដែលតំបន់ទស្សនានៅប្រទេសដទៃទៀតមិនមានដូចកម្ពុជា ដូចជាព្រះអាទិត្យរះចំកំពូលប្រាសាទអង្គរជាដើម៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
