ក្នុងសន្និសីទអន្តរជាតិលើកទី២ ស្តីពីជណ្តើរត្រីនៅតាមទន្លេមេគង្គក្រោមឆ្នាំ២០២៥ ដែលរៀបចំឡើងដោយក្រសួងកសិកម្ម សហការជាមួយមជ្ឈមណ្ឌលអូស្ត្រាលីសម្រាប់ស្រាវជ្រាវកសិកម្មអន្តរជាតិ នៅក្នុងខេត្តសៀមរាប នៅព្រឹកថ្ងៃទី០៥ ខែកុម្ភៈ ឆ្នាំ២០២៥នេះ ភាគីអូស្ត្រាលី បានជំរុញដល់អាជ្ញាធរកម្ពុជា និងអ្នកពាក់ព័ន្ធគិតគូរអំពីការបន្លាស់ទីរបស់ត្រីតាមទំនប់ធារាសាស្ត្រ ជាមួយនឹងកម្មវិធីរចនាប្លង់នៃការសាងសង់ជណ្តើរត្រី។
ឯកឧត្តម ដឺរិក យីប (Derek Yip) ឯកអគ្គរាជទូតអូស្ត្រាលីប្រចាំនៅកម្ពុជា បង្ហាញថា ជណ្ដើរត្រីគឺពិតជាមានសារៈសំខាន់ក្នុងការរួមចំណែកគ្រប់គ្រងធនធានជលផល និងបង្ហាញពីវឌ្ឍនភាពអំពីបច្ចេកវិទ្យាសាងសង់ជណ្តើរត្រី សំដៅរក្សាបានទាំងត្រី និងទឹកជាប្រយោជន៍ដល់សហគមន៍។ ក្នុងនាមប្រទេសអូស្រ្តាលី នឹងធ្វើការគាំទ្រដល់ប្រទេសកម្ពុជា វៀតណាម ថៃ ឡាវ និងប្រទេសឥណ្ឌូណេស៊ី ទៅលើកម្មវិធីកសាងសមត្ថភាពមន្ត្រីជំនាញធនធានខាងជលផល ធារាសាស្ត្រ បរិស្ថាន ផ្នែកសុខាភិបាល ផ្លូវថ្នល់និងផ្នែកអភិវឌ្ឍន៍ជនបទផងដែរ។
ព័ត៌មានជាតិ ថ្មីៗ
លោកស្រី Wendy Umberger នាយកប្រតិបត្តិមជ្ឈមណ្ឌលអូស្រ្តាលី សម្រាប់ការស្រាវជ្រាវកសិកម្មអន្តរជាតិ បញ្ជាក់ថា ការសាងសង់ជណ្តើរត្រី គឺជាជម្រើសមួយដ៏ល្អ ដែលបានជួយផ្សារភ្ជាប់ខ្សែទឹកខាងលើ និងខាងក្រោមទំនប់ សម្រួលដល់ការផ្លាស់ទីត្រីឆ្លងកាត់តាមខ្សែទឹក អនុញ្ញាតឱ្យត្រីធ្វើការផ្លាស់ទីដោយសុវត្ថិភាព និងជួយដល់ការអភិវឌ្ឍធនធានទឹកប្រកបដោយនិរន្តរភាព ដែលរក្សាបានទាំងត្រី និងទឹកសម្រាប់សហគមន៍ជនបទក្នុងតំបន់មេគង្គ។ តាមរយៈការរួមបញ្ចូលជណ្តើរត្រីទៅក្នុងផែនការថ្នាក់តំបន់ យើងអាចការពារការខូចខាតប្រព័ន្ធអេកូឡូស៊ីនៅទូទាំងអាងទន្លេមេគង្គក្រោម ជួយការពារវិស័យជលផលដែលមានសារ:សំខាន់ដ៏ចាំបាច់សម្រាប់សន្តិសុខស្បៀង និងប្រាក់ចំណូលរបស់ប្រជាជន ព្រមទាំងជួយពង្រឹងភាពធន់របស់ សហគមន៍ និងនិរន្តរភាពរបស់បរិស្ថាន។
លោក អុឹង គឹមលាង អភិបាលរងខេត្តសៀមរាប មានប្រសាសន៍ថា ទន្លេមេគង្គជាជម្រករបស់ត្រីទឹកសាបជាង ១.០០០ប្រភេទ ដូច្នេះហើយវាមានសារៈសំខាន់ ខ្លាំងណាស់ដែលយើងត្រូវធ្វើឱ្យអស់ពីសមត្ថភាព ដើម្បីការពារធនធានដ៏សំខាន់នេះទាំងក្នុងពេលបច្ចុប្បន្ន និងអនាគត ដើម្បីធានាសន្តិសុខស្បៀងនៅក្នុងតំបន់។ ទន្លេមេគង្គបច្ចុប្បន្នជាកន្លែងនេសាទក្នុងប្រទេសដែលមានផលិតភាពច្រើនជាងគេបំផុតនៅលើពិភពលោក ជាមួយនឹងតម្លៃលក់លើកដំបូងប្រចាំឆ្នាំ ប្រហែល ជាង ១៧ពាន់លានដុល្លារ។ សម្រាប់ខេត្តសៀមរាប មានស្ទឹងធំៗសំខាន់ចំនួន៤ គឺស្ទឹងជីក្រែង ស្ទឹងសៀមរាប ស្ទឹងផ្ទាំង និងស្ទឹងស្រែង ហើយនៅតាមដងស្ទឹងសំខាន់ខាងលើនេះមានទំនប់ធារាសាស្ត្រ ដែលបានផ្តល់ទឹកសម្រាប់កសិកម្មមានដូចជាទំនប់ម្កាក់ ទំនប់ស្លែង ទំនប់សំបួរ ទំនប់ស្រីស្នំ ទំនប់ស្ពាន ស្រែង និងមានទំនប់ធារាសាស្ត្រសំខាន់ៗផ្សេងទៀត។
ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ដើម្បីជំរុញ និងលើកស្ទួយការអភិវឌ្ឍវិស័យកសិកម្ម រាជរដ្ឋាភិបាលកម្ពុជា បានដាក់ចេញនូវគោលនយោបាយអាទិភាពទី៥ ទី៦ គឺការលើកស្ទួយផលិតកម្មកសិកម្មរកទីផ្សារ និងរក្សាលំនឹងថ្លៃកសិផលតាមរយៈកម្មវិធីហិរញ្ញប្បទាន ការដាក់ពង្រាយមន្ត្រីកសិកម្មឃុំសង្កាត់ និងការអភិវឌ្ឍសហគមន៍កសិកម្មទំនើប។ នៅកម្ពុជាការអភិវឌ្ឍហេដ្ឋារចនាសម្ព័ន្ធបានកើតឡើងយ៉ាងឆាប់រហ័ស ជាពិសេសការសាងសង់ផ្លូវ និងប្រព័ន្ធធារាសាស្ត្រទាំងនេះ គឺជាអាទិភាពរបស់រាជរដ្ឋាភិបាល ក្នុងការជួយជំរុញដល់សន្តិសុខស្បៀង និង ការកាត់បន្ថយភាពក្រីក្រតាមរយៈការនាំចេញនូវកសិផលកសិកម្ម ហើយការអភិវឌ្ឍទាំងនេះ នឹងផ្តល់អត្ថប្រយោជន៍យ៉ាងច្រើនដល់វិស័យកសិកម្ម។
ឯកឧត្តមបន្តថា ផែនការទាំងអស់នេះ អនុវិស័យជលផលក៏បានដើរតួនាទីដ៏សំខាន់ក្នុងការផ្គត់ផ្គង់ស្បៀង ជាពិសេសអាហាររូបត្ថម្ភសម្រាប់កុមារតូចៗ និងក្រុមស្ត្រីតាមតំបន់ដាច់ស្រយាល និងប្រជាជននៅតាមតំបន់ជនបទនានា ដែលងាយទទួលបាននូវផលប្រយោជន៍ពីត្រី និងវារីសត្វសម្រាប់ការចិញ្ចឹមជីវិត និងបំពេញ តម្រូវការសេដ្ឋកិច្ចជនបទ។ ក្នុងនាមរាជរដ្ឋាភិបាលកម្ពុជា សូមថ្លែងអំណរគុណដល់ប្រទេសអូស្ត្រាលី ក៏ដូចជាប្រជាជនអូស្ត្រាលី ដែលបានជួយសាងសង់ជណ្តើរត្រីបង្ហាញចំនួន៦ ដល់កម្ពុជាក្នុងរយៈពេល៤ឆ្នាំកន្លងមកនេះ ហើយសូមឱ្យតំណាងស្ថាប័ន និងគម្រោងដៃគូពាក់ព័ន្ធនានា បន្តផ្តល់ការគាំទ្របច្ចេកទេស និងសហប្រតិបត្តិការ ដើម្បីជួយកសាងជណ្តើរត្រី បង្ហាញនៅកម្ពុជា និងបណ្តុះបណ្តាលដល់មន្ត្រីជំនាញជាបន្តបន្ទាប់ ដើម្បីចូលរួមថែរក្សា និងបង្កើនផលត្រីធម្មជាតិនៅកម្ពុជាបន្ថែមទៀត៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
