ថ្លែងនៅក្នុងកិច្ចប្រជុំ ស្តីពីការងារពង្រឹងការគ្រប់គ្រង អភិរក្សធនធានធម្មជាតិ និងការបង្ក្រាបបទល្មើសជលផល
ដែលមានការចូលរួមពី តំណាងអយ្យការអមសាលាដំបូងខេត្តសៀមរាប រដ្ឋបាលក្រុង ស្រុកជាប់បឹងទន្លេសាប កងកម្លាំងទាំង៣ និងមន្ទីរអង្គភាពជំនាញពាក់ព័ន្ធនៅរសៀលថ្ងៃទី៣ ខែកុម្ភៈម្សិលមិញនេះ លោក អ៊ឹង គឹមលាង អភិបាលរងខេត្តសៀមរាប បញ្ចាក់ថា រដ្ឋបាលខេត្តសៀមរាប មានការប្ដេជ្ញាខ្ពស់ក្នុងការបង្ក្រាបបទល្មើសនៅជាប់តំបន់បឹងទន្លេសាប ស្ថិតក្នុងភូមិសាស្ត្រខេត្តសៀមរាប ដែលជាការយកចិត្តទុកដាក់ខ្ពស់របស់សម្តេចធិបតីនាយករដ្ឋមន្ត្រី លើការពង្រឹងការគ្រប់គ្រង ការអភិរក្ស និងការអភិវឌ្ឍធនធានជលផល ប្រកបដោយចីរភាព សម្រាប់អ្នកជំនាន់ក្រោយ។
លើកឡើងក្នុងកិច្ចប្រជុំពិភាក្សានោះ អង្គប្រជុំបាន កត់សម្គាល់ថា បរិមាណត្រីនៅរដូវបើកនេសាទថ្មីៗនេះ ប្រជានេសាទ និងអ្នកប្រកបរបរក្នុងវិស័យជលផល មានការពេញចិត្ត ដោយសារបរិមាណត្រីមានការកើនឡើង ដែលនេះជាខិតខំអភិរក្ស ទប់ស្កាត់ និងបង្ក្រាបបទល្មើសបានល្អប្រសើរ។ ទន្ទឹមនោះ លោក ក៏បានលើកឡើងផងដែរថា កន្លងមក សមត្ថកិច្ច និងអាជ្ញាធរមូលដ្ឋានមួយចំនួន នៅមានការលើកលែង ចំពោះបទល្មើសរបស់ប្រជានេសាទ ដែលមានជីវភាពខ្វះខាត ប៉ុន្តែការបង្ក្រាបបទល្មើសមិនមានអនុគ្រោះដល់អ្នកមាន ឬ អ្នកទីទ័លក្រឡើយ។
លោក អភិបាលរងខេត្ត សង្កត់ធ្ងន់ថា យោងតាមបទបញ្ជាដ៏ម៉ឺងម៉ាត់របស់សម្តេចធិបតីនាយករដ្ឋមន្ត្រី និងអនុវត្តន៍ដោយ ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានធ្វើ្ផការផ្សព្វផ្សាយបទបញ្ជា ស្តីពីការបង្ក្រាបបទល្មើសនេសាទក្នុងបឹងទន្លេសាប ដែលនេះជាការណែនាំឱ្យប្រជានេសាទបញ្ឈប់ជាបន្ទាន់ នូវការប្រព្រឹត្តបទល្មើសជលផលគ្រប់ប្រភេទ ក៏ដូចជាការកាប់ទន្ទ្រានដីព្រៃលិចទឹកដែលរដ្ឋបានហាមឃាត់ ដើម្បីចៀសវាងការទទួលទោសទណ្ឌជាធរមាន។
គួររំលឹកថា នៅឆ្នាំ២០២៤ មន្ត្រីជំនាញជលផល បានសហការជាមួយអាជ្ញាធរពាក់ព័ន្ធ ចុះធ្វើការទប់ស្កាត់ និងបង្ក្រាបបទល្មើសជលផល បានជាង ៤០០ករណី បានដកហូត និងកម្ទេចចោលឧបករណ៍នេសាទខុសច្បាប់ជាច្រើនប្រភេទ។ ជាមួយគ្នានេះ ជនល្មើស ១០នាក់ ត្រូវទៅតុលាការដើម្បីចាត់ការតាមច្បាប់ផងដែរ។៕
អត្ថបទ និងរូបភាព៖ លោក ជា ស្រស់
កែសម្រួល៖ មន្ទីរព័ត៌មានខេត្តសៀមរាប
