យោងតាមការណែនាំរបស់ ឯកឧត្តម ប្រាក់ សោភ័ណ អភិបាលខេត្តសៀមរាប នៅថ្ងៃទី៣ ខែកុម្ភៈនេះ រដ្ឋបាលក្រុងសៀមរាប បានសហការជាមួយមន្ទីរសាធារណការ និងដឹកជញ្ជូនខេត្ត និងមន្ទីរធនធានទឹក និងឧតុនិយមខេត្ត បានជួបពិភាក្សាជាមួយក្រុមហ៊ុន ទទួលស្ថាបនាដងស្ទឹងសៀមរាប ដំណាក់កាលទី២ ដើម្បីបើកទំនប់ទប់ទឹកការដ្ឋាន ជួយសង្គ្រោះស្រូវប្រាំងរបស់ប្រជាកសិករ ស្ថិតនៅប៉ែកខាងកើតភ្នំក្រោម ខាងកើតអតីតកំពង់ផែក្រុមហ៊ុនស៊ូជីង និងចំណុចស្ពានតាអាន់ នៃសង្កាត់សៀមរាប និងសង្កាត់ចុងឃ្នៀស។
តាមការបញ្ជាក់របស់លោក ហាយ យង់ អភិបាលរងក្រុងសៀមរាប ស្រូវប្រាំងដែលខ្វះខាតទឹក មានទំហំផ្ទៃដី សរុប ១ ៣៥៤ហិកតា។ ការបើកទឹកជួយសង្គ្រោះស្រូវក្នុងសង្កាត់ចំនួន០២នេះ មានប្រភពពីស្ទឹងសៀមរាប និងមានរយៈពេល ១៥ថ្ងៃ។
យោងតាមការជូនដំណឹងជារបស់មន្ទីរធនធានទឹក និងឧតុនិយមខេត្តសៀមរាប កាលពីពាក់កណ្ដាលខែធ្នូឆ្នាំ២០២៤ បញ្ជាក់ថា ក្រុង ស្រុក ភាគច្រើន ក្នុងខេត្តសៀមរាប អាចធ្វើស្រូវប្រាំងបានតែមួយលើកប៉ុណ្ណោះ ក្នុងនោះមានក្រុសៀមរាបផងដែរ។ ក្នុងនាមរដ្ឋបាលក្រុងសៀមរាប លោកអភិបាលរងក្រុង បានសំណូមពរ ដល់ប្រជាកសិករ បន្ទាប់ពីការច្រូតកាត់នេះសូមផ្អាកការបង្កបង្កើនផលស្រូវប្រាំងលើកទី២ ដើម្បីបញ្ចៀសការខូចខាត និងប៉ះពាល់ដល់ជីវភាព។
ព័ត៌មានជាតិ ថ្មីៗ
អត្ថបទ : មន្ទីរព័ត៌មានខេត្តសៀមរាប
