កាលពីសប្តាហ៍កន្លងទៅនេះ រដ្ឋបាលខេត្តសៀមរាប ដឹកនាំកិច្ចប្រជុំដោយ លោក យុន លីនណេ អភិបាលរងខេត្តសៀមរាប ធ្វើការពិភាក្សាពាក់ព័ន្ធនឹងការគ្រប់សំរាម សំណល់រឹង និងអនាម័យបរិស្ថាន នៅក្នុងភូមិសាស្រ្តក្រុងសៀមរាប ដើម្បីរក្សាបាននូវបរិស្ថានស្អាត និងទប់ស្កាត់បំពុលដល់បរិយាកាស ដែលបង្កឲ្យប៉ះពាល់សុខភាពប្រជាជន និងភ្ញៀវទេសចរ។ កិច្ចប្រជុំ ពិភាក្សានេះ មានខ្លឹមសារណែនាំសំខាន់ៗ រួមមាន :
១- សង្កាត់ក្នុងភូមិសាស្ត្រក្រុងសៀមរាបទាំងអស់ ត្រូវស្វ័យត្រួតពិនិត្យទទួលខុសត្រូវ ក្នុងដែនសមត្ថកិច្ចរបស់ខ្លួន លើកិច្ចការបរិស្ថាន ដោយទប់ស្កាត់ការចោលសំរាមផ្ដេសផ្ដាសនៅតាមដងផ្លូវ និង ទទួលខុសត្រូវមិនឱ្យមានការដុតសំរាម និងសំណល់ផ្សេងៗទាំងក្នុង និងក្រៅទីតាំងឯកជន។ ត្រូវធ្វើការអប់រំ ណែនាំ ព្រមាន និងពិន័យ ចំពោះម្ចាស់សំរាមណា ដែលមិនគោរពការណែនាំរបស់អាជ្ញាធរ ក្នុងនោះរួមទាំងការមិនវេចខ្ចប់សំរាមបានត្រឹមត្រូវ ផងដែរ។
២- ក្រុមហ៊ុនប្រមូលសំរាម មានភារកិច្ច ប្រមូលសំរាមដែលបានវេចខ្ចប់ត្រឹមត្រូវ ឱ្យអស់នៅតាមខ្សែផ្លូវ ដែលខ្លួនកំពុងប្រតិបត្តិឱ្យបានទៀងទាត់ (សំរាមដែលមានម្ចាស់)។
៣- ប្រជាពលរដ្ឋ មានកាតព្វកិច្ច ទទួលខុសត្រូវ សម្អាត វេចខ្ចប់សំរាមឱ្យបានត្រឹមត្រូវ និង បង់សេវាប្រមូលសំរាម ដើម្បីចូលរួមឱ្យទីក្រុងយើងមានបរិស្ថានស្អាត និងសោភណ្ឌភាព។
៤- មន្ទីរបរិស្ថាន ត្រូវសហការជាមួយរដ្ឋបាលក្រុង បង្កើតយន្តការតាមដានការងារខាងលើ ឱ្យបានខ្ជាប់ខ្ជួន និងរាយការណ៍ជាប្រចាំមករដ្ឋបាលខេត្ត។
ប្រភព : លោក យុន លីនណេ អភិបាលរងខេត្តសៀមរាប
