រយៈពេល៣ថ្ងៃ ចាប់ពីថ្ងៃទី០៨-១០ ខែកុម្ភៈ ឆ្នាំ២០២៥កន្លងទៅនេះ នៅវត្តប្រាសាទគោកចក ក្រុងសៀមរាប បានប្រារព្ធពិធីបុណ្យផ្កាប្រាក់មហាសាមគ្គី ទេសនាមហាវេសន្តរជាតក និងរាប់បាត្រព្រះសង្ឃ១០៨អង្គ ដោយកៀងគរបច្ច័យបានជាង ២មុឺនដុល្លារ សម្រាប់ទុកសាងសង់ផ្លូវបេតុង១ខ្សែចូលទៅក្នុងវត្ត។
ព្រះគ្រូវិចិត្រវង្សា ហែម គឹមសាន ញាតិធម្មោ ព្រះចៅអធិការវត្តប្រាសាទគោកចក មានសង្ឃដីកាថា កម្មវិធីទាំង៣ខាងលើ ប្រារព្ធឡើងក្នុងន័យដើម្បីបង្កើនសាមគ្គីធម៌រវាងព្រះពុទ្ធសាសនា និងពុទ្ធបរិស័ទ ជាពិសេសថ្នាក់ដឹកនាំ មន្ត្រីរាជការ និងសប្បុរសជនជិតឆ្ងាយ ហើយក៏ដើម្បីកៀងគរបច្ច័យសម្រាប់ស្ថាបនាផ្លូវបេតុង១ខ្សែ បណ្តោយ២០០ម៉ែត្រ ទទឹង៦ម៉ែត្រ ព្រមទាំងដាក់លូបង្ហូរទឹកប្រវែង២០០ម៉ែត្រ ចូលខាងត្បូងវត្តដែលគ្រោងចំណាយថវិកាសរុបជិត ៤ម៉ឺនដុល្លារ។
ព្រះគ្រូ ហែម គឹមសាន បានថ្លែងអំណរគុណ ចំពោះសទ្ធាជ្រះថ្លារបស់ថ្នាក់ដឹកនាំ មន្ត្រីរាជការ និងប្រជាពុទ្ធបរិស័ទជិតឆ្ងាយ ដែលតែងតែជួយឧបត្ថម្ភគាំទ្រដល់វិស័យព្រះពុទ្ធសាសនាជាបន្តបន្ទាប់ ដែលនេះបានបង្ហាញឱ្យឃើញពីស្មារតីគោរពព្រះពុទ្ធសាសនាដែលជាសាសនារបស់រដ្ឋ ដែលញ៉ាំងឱ្យវិស័យពុទ្ធចក្រនៅកម្ពុជាកាន់តែរឹងមាំ និងរីកចម្រើនឡើងថែមទៀត។ ហើយក៏សូមអំពាវនាវដល់សប្បុរសជនជិតឆ្ងាយ សូមបន្តចូលរួមជួយបរិច្ចាគធនធានទៅតាមលទ្ធភាពបន្ថែមទៀត ដើម្បីរួមចំណែកកសាងផ្លូវនេះឱ្យបានឆាប់រួចរាល់ សម្រាប់ជាប្រយោជន៍ប្រើប្រាស់ជាសាធារណៈ។
ព័ត៌មានជាតិ ថ្មីៗ
ព្រះគ្រូចៅអធិកាវត្ត ក៏បានឱ្យដឹងដែរថា ចំពោះកម្មវិធីទេសនាបុណ្យមហាវេស្សន្តរជាតក គណៈកម្មការវត្តតែងតែរៀបចំឡើងជារៀងរាល់ ក្នុងបំណងដើម្បីរំលឹកដល់គុណព្រះសម្មាសម្ពុទ្ធ មុនត្រាស់ដឹងជាព្រះពោធិសត្វ បានយោនយកកំណើតផ្សេងៗគ្នា។ ចំពោះពិធីរាប់បាត្ររៀបចំតាមការឯកភាពគ្នារវាងគណៈកម្មការវត្តព្រះគ្រូចៅអធិការ ជាមួយប្រជាពុទ្ធបរិស័ទក្នុងមូលដ្ឋាន តាមវេលាសមគួរដែលអាចនាំគ្នាប្រារព្ធទៅបាន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
