ក្នុងឱកាសបើកវគ្គបណ្តុះបណ្តាលស្ដីពី“ប្រសិទ្ធភាពនៃការងារព័ត៌មាន និងនាំពាក្យ” នៅខេត្តសៀមរាប នាព្រឹកថ្ងៃទី១០ ខែកុម្ភៈ ឆ្នាំ២០២៥នេះ ឯកឧត្ដម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានថ្លែងថា បច្ចុប្បន្ននេះ នៅកម្ពុជាពលរដ្ឋកំពុងរស់នៅក្នុងសង្គមដែលពោពេញដោយសន្តិភាព ប៉ុន្តែបើយើងក្រឡេកមើលនៅតាមបណ្តាញសង្គមនានាវិញ វាជាសង្គ្រាមយ៉ាងក្ដៅគគុក។
ឯកឧត្ដម ប៉ែន បូណា មានប្រសាសន៍ថា អស់ពេលរាប់រយឆ្នាំមកហើយ ប្រទេសកម្ពុជាបានជួបប្រទះតែសង្គ្រាម ការបែកបាក់ជាតិ ប៉ុន្តែក្រោមនយោបាយឈ្នះឈ្នះរបស់រាជរដ្ឋាភិបាលអាណត្តិមុនៗ ដែលដឹកនាំដោយសម្តេចតេជោ ហ៊ុន សែន កម្ពុជាទទួលបានសន្តិភាពពេញលេញ ហើយសន្តិភាពនេះ ត្រូវបានបន្តដឹកនាំថែរក្សាដោយរាជរដ្ឋាភិបាលអណត្តិទី៧ របស់សម្តេចធិបតី ហ៊ុន ម៉ាណែត។ បើទោះបីជាយ៉ាងនេះក្តី នៅពេលដែលប្រជាពលរដ្ឋកំពុងរស់នៅ និងកំពុងអរគុណដល់សន្តិភាពនោះ យើងក្រឡេកមើលក្នុងបណ្តាញសង្គមវិញ វាកំពុងកើតនូវសង្គ្រាមដ៏ក្ដៅគគុក នោះគឺសង្គ្រាមរវាងព័ត៌មានពិត និងព័ត៌មានក្លែងក្លាយ ដូច្នេះទាមទារឱ្យយើងត្រូវប្រយុទ្ធតតាំងដើម្បីគ្រប់គ្រងសមរភូមិមួយនេះ តាមរយៈការនិយាយពិតដើម្បីការពារ។
ឯកឧត្តមបន្តថា នៅក្នុងកាលៈទេសៈដែលប្រទេសយើងកើតមានសង្គ្រាម ប្រជាជនយើងបានរត់ភៀសខ្លួនទៅនៅក្រៅប្រទេសរាប់សិបម៉ឺននាក់។ ដោយសារព័ត៌មានមិនពិត ព័ត៌មានក្លែងក្លាយ បានធ្វើឱ្យពួកគាត់មួយចំនួននៅតែភ័ន្តច្រឡំថា កម្ពុជាកំពុងស្ថិតនៅក្នុងរបបវាលពិឃាដ ឬកំពុងស្ថិតនៅក្នុងភ្លើងសង្គ្រាម។ ប៉ុន្តែបន្ទាប់ពីមានការខិតខំតស៊ូប្រយុទ្ធប្រឆាំងនឹងព័ត៌មានមិនពិត ក្លែងក្លាយទាំងនោះ តាមរយៈការផ្សព្វផ្សាយអំពីសន្តិភាពពិត អំពីការអភិវឌ្ឍពិតរបស់កម្ពុជា ដែលមកដល់ពេលនេះ បងប្អូនទាំងនោះបានយល់ច្បាស់អំពីកម្ពុជា។
លោក សុខ ថុល អភិបាលរងខេត្តសៀមរាប លើកឡើងថា ក្នុងសម័យបច្ចេកវិទ្យាឌីជីថលនេះ ការចែករំលែកនូវព័ត៌មាននៅលើបណ្តាញសង្គមក៏កាន់តែកើនឡើងគួរឱ្យកត់សម្គាល់ទាំងព័ត៌មានពិត និងព័ត៌មានមិនពិត ដែលធ្វើឱ្យមហាជនមានការពេញចិត្ត មិនពេញចិត្ត យល់ស្រប មិនយល់ស្រប យល់ច្រឡំ និងពិបាកក្នុងការបែងចែកខុស ឬត្រូវ។ ឆ្លើយតបនឹងបញ្ហាប្រឈមទាំងនេះ រដ្ឋបាលខេត្តបានបង្កើតក្រុមការងារបណ្តាញសង្គមនៅរដ្ឋបាលខេត្ត ក្រុងស្រុក ឃុំសង្កាត់ និងមន្ទីរអង្គភាពជុំវិញខេត្ត ដើម្បីដោះស្រាយនូវរាល់សំណួរ សំណូមពររបស់ប្រជាពលរដ្ឋ និងការគ្រប់គ្រង ទប់ស្កាត់ និងបន្សាបនូវព័ត៌មានមិនពិតទាំងឡាយដែលនឹងកើតមានឡើងពាក់ព័ន្ធនឹងសមត្ថកិច្ចរបស់ខ្លួន ឱ្យបានទាន់ពេលវេលា និងឆាប់រហ័សបំផុតតាមរយៈការបកស្រាយបំភ្លឺតាមរយៈលិខិត ឬអ្នកនាំពាក្យ។
លោកអភិបាលរងខេត្ត បន្ថែមថា ទន្ទឹមនឹងនេះ ក្រុមការងារក៏មានតួនាទីចូលរួមផ្សព្វផ្សាយព័ត៌មានអំពីសមិទ្ធផលសម្រេចបាន ការអភិវឌ្ឍ និងកម្មវិធីនយោបាយរបស់រាជរដ្ឋាភិបាល តាមរយៈបណ្តាញសង្គមផ្លូវការរបស់អង្គភាពខ្លួនដូចជា៖ Facebook Youtube និង Telegram ស្របតាមអភិក្រម “ ថ្មី ពិត លឿន និងទូលំទូលាយប្រកបដោយជំនឿទុកចិត្ត និងវិជ្ជាជីវៈដើម្បីផ្សារភ្ជាប់គ្រប់មជ្ឈដ្ឋាន”។ ជាមួយគ្នានេះ ខេត្តក៏មានក្រុមការងារសម្របសម្រួលព័ត៌មាន និងសាធារណៈមតិចំនួន៥រូប ដោយទទួលស្គាល់តាមរយៈសេចក្តីសម្រេចរបស់ក្រសួងព័ត៌មាន ហើយក្រុមនេះបាននឹងកំពុងដំណើរការអនុវត្តការងារជាប្រចាំថ្ងៃ ព្រមទាំងបានរៀបចំជារបាយកាណ៍ជូនមករដ្ឋបាលខេត្តជាប្រចាំផងដែរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
