មន្ត្រីជាន់ខ្ពស់ក្រសួងកសិកម្ម បានជំរុញឱ្យអាជីវករលក់ជី និងថ្នាំកសិកម្ម ត្រូវចូលរួមបំពេញតួនាទីជាស្ពានចម្លង ណែនាំ និងពន្យល់ដល់កសិករ ដែលទិញជី ឬថ្នាំកសិកម្មយកទៅប្រើប្រាស់ឱ្យស្របតាមបច្ចេកទេស ណែនាំពួកគាត់ឱ្យទិញជី និងថ្នាំដែលមានចុះបញ្ជីត្រឹមត្រូវ និងមានប្រភពច្បាស់លាស់ និងបង្ហាញអំពីហានីភ័យ និងគ្រោះថ្នាក់ ប្រុងប្រយ័ត្នចំពោះការទិញជី ឬថ្នាំកសិកម្មក្លែងក្លាយ ដែលនាំឱ្យមានការខាតបង់ក្នុងផលិតកម្មដំណាំ ព្រមទាំងបង្កគ្រោះថ្នាក់ដល់សុខភាពសាធារណៈ និងបរិស្ថាន។
ក្នុងពិធីសំណេះសំណាលជាមួយអាជីវករលក់ជី និងថ្នាំកសិកម្មក្នុងខេត្តសៀមរាប កាលពីរសៀលថ្ងៃទី១០ ខែកុម្ភៈ ឆ្នាំ២០២៥នេះ ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម មនប្រសាសន៍ថា គោលនយោបាយកសិកម្ម គឺការធានាសន្តិសុខស្បៀង និងនិរន្តរភាពសេដ្ឋកិច្ច និងបរិស្ថាន ពោលគឺមានហូប មានប្រើ មានបាន និងមានរហូត ខណៈកម្ពុជាបានឆ្លងផុតនូវដំណាក់កាលខ្វះហូប មកបច្ចុប្បន្ននេះ គឺមានហូបគ្រប់គ្រាន់ ហើយត្រូវជំរុញការកែច្នៃអាចនាំចេញទៅកាន់ទីផ្សារអន្តរជាតិទៀត។
ឯកឧត្តមអនុរដ្ឋលេខាធិការ ក៏បានស្នើដល់អាជីវករទាំងអស់ ត្រូវដើរតួនាទីជាអ្នកផ្សព្វផ្សាយអំពីភាពវិជ្ជមាននៃវិស័យកសិកម្មអំពីអ្វីដែលចំណេញដល់កសិករ ទាំងការផលិតពូជក្នុងស្រុក ការចងក្រងជាសហគមន៍កសិកម្មទំនើប និងការកាត់បន្ថយថ្លៃដើមតិច និងបន្តដើរតួនាទីជាដៃគូដ៏ល្អរបស់មន្ទីរកសិកម្មខេត្ត រដ្ឋបាលខេត្ត កសិករដើម្បីជំរុញអភិវឌ្ឍវិស័យកសិកម្ម។ ជាមួយនោះ ឯកឧត្តមជំរុញដល់អាជីវករទាំងអស់ ត្រូវចុះឈ្មោះចូលរៀនវគ្គបណ្តុះបណ្តាលថ្មីៗមានខ្លឹមសារល្អៗ ដើម្បីជាមូលដ្ឋានកាន់តែរឹងមាំក្នុងអាជីវកម្មរបស់ខ្លួន។
លោក អុឹង គឹមលាង អភិបាលរងខេត្ត មានប្រសាសន៍ថា ជី និងថ្នាំកសិកម្ម ត្រូវបានផលិត ចរាចរ និងប្រើប្រាស់យ៉ាងទូលំទូលាយ ហើយត្រូវបានប្រើប្រាស់ដោយកសិករ និងធ្វើចរាចរនៅលើទីផ្សារកាន់តែទូលំទូលាយ និងបានកើនឡើងជាលំដាប់ ហើយកំពុងបំពេញតួនាទី ភារកិច្ចយ៉ាងសំខាន់នៅក្នុងការចូលរួមចំណែកគាំទ្រដល់គោលនយោបាយ និងយុទ្ធសាស្ត្រអភិវឌ្ឍផលិតកម្មកសិកម្មក្នុងក្របខ័ណ្ឌសន្តិសុខស្បៀង និងសុវត្ថិភាពស្បៀង។ ក្នុងន័យនេះ សូមស្នើដល់អាជីវករទាំងអស់ លក់តែជី ឬថ្នាំកសិកម្មណាដែលមានប្រភពស្របច្បាប់ត្រឹមត្រូវ មានស្លាកសញ្ញាព័ត៌មានជាភាសាខ្មែរ មានលេខបញ្ជីកាលើសំបកវេចខ្ចប់ និងមានលិខិតអនុញ្ញាតនាំចូលស្របតាមច្បាប់ ស្តីពីការគ្រប់គ្រងជី និងថ្នាំកសិកម្ម។ លោកក៏សំណូមពរឱ្យក្រសួងកសិកម្មរៀបចំជាវេទិកា និងបើកវគ្គបណ្តុះបណ្តាលបន្ថែមទៀតដល់អាជីវករ ពាក់ព័ន្ធនឹងបច្ចេកទេសការប្រើប្រាស់ជី ឬថ្នាំកសិកម្ម។
បើតាមលោក ទា គឹមសុទ្ធ ប្រធានមន្ទីរកសិកម្មខេត្ត បានឱ្យដឹងថា ឆ្នាំ២០២៥នេះ ខេត្តសៀមរាប មានដេប៉ូលក់ដុំ និងលក់រាយជី និងថ្នាំកសិកម្ម ២៨៦ដេប៉ូ។ នៅឆ្នាំ២០២៤ មន្ទីរបានចុះធ្វើអធិការកិច្ចបាន២៦លើក ស្មើ២១៣ដេប៉ូ និងបានបើកវគ្គបណ្តុះបណ្តាលស្តីពីប្រសិទ្ធភាព សុវត្ថិភាព កសិដ្ឋានចំណីអាហារ និងបរិស្ថាននៃការប្រើប្រាស់ថ្នាំ និងជីកសិកម្មបានចំនួន ៥វគ្គ មានអ្នកចូលរួម១៦៦នាក់ និងបើកវគ្គអប់រំពង្រឹងសមត្ថភាពបន្ថែមដល់អាជីវករចាស់១លើក ដែលមានអាជីវករចូលរួមចំនួន ១១៧នាក់៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
