កាលពីរសៀលថ្ងៃទី១២ ខែកុម្ភៈ ឆ្នាំ២០២៥នេះ ព្រះសង្ឃ ថ្នាក់ដឹកនាំខេត្ត មន្ទីរអង្គភាព អាជ្ញាធរមូលដ្ឋាន កងកម្លាំងប្រដាប់អាវុធ យាយជីតាជី លោកគ្រូអ្នកគ្រូ សិស្សានុសិស្ស និងប្រជាពលរដ្ឋប្រមាណ៨.០០០អង្គនាក់ បានចូលរួមដង្ហែក្បួនអបអរពិធីបុណ្យមាឃបូជា ក្នុងក្រុងសៀមរាប និងពិធីរាប់បាត្រប្រគេនព្រះសង្ឃចំនួន ២៥០អង្គ នៅវត្តដំណាក់ ក្រុងសៀមរាប។
សូមជម្រាបថា ការដង្ហែពិធីបុណ្យមាឃបូជានេះ គឺដង្ហែចេញពីវត្តដំណាក់ ស្របតាមផ្លូវដងស្ទឹងខាងកើត ដល់ស្ពានព្រះរាជដំណាក់ ឆ្ពោះទៅកាន់ផ្លូវស៊ីវុត្ថា តម្រង់មកកាន់រង្វង់មូលនាគបាញ់ទឹក ហើយត្រឡប់មកកាន់វត្តដំណាក់វិញ។ លុះពិធីដង្ហែចប់ ក៏មានពិធីប្រកាសមាឃបូជាទៅតាមទំនៀមទម្លាប់ប្រពៃណីព្រះពុទ្ធសាសនាដោយព្រះមន្ត្រីសង្ឃខេត្ត មួយអន្លើដោយព្រះភិក្ខុសង្ឃសូត្រប្រកាសមាឃបូជា។
ព្រះគ្រូធម្មវិសុទ្ធិរង្សី ឡាច ចន្ថា ចៅអធិការវត្តដំណាក់ មានថេរដីកាថា ការប្រារព្ធពិធីបុណ្យមាឃបូជានេះ គឺដើម្បីរំលឹកដល់ព្រឹត្តិការណ៍ធំៗពីរ នាសម័យពុទ្ធកាល គឺទី១.ថ្ងៃព្រះសម្មាសម្ពុទ្ធធ្វើចតុរង្គសន្និបាត សំដែងឱវាទបាតិមោក្ខ និងទី២.ថៃ្ងដែលព្រះសម្មាសម្ពុទ្ធដាក់ព្រះជន្មាយុសង្ខារ។ ការប្រារព្ធនេះដែរ គឺបានប្រយោជន៍ដល់ពុទ្ធសាសនិកជនបានយល់ដឹង គោលធម៌ និងគោលជំហររបស់ព្រះពុទ្ធសាសនា បណ្តុះសទ្ធាប្រជាពុទ្ធបរិស័ទកាន់តែជ្រះថ្លាឡើង ក្នុងការគោរពប្រតិបត្តិតាមនូវគោលធម៌របស់ព្រះសម្មាសម្ពុទ្ធនៃយើង។
ព័ត៌មានជាតិ ថ្មីៗ
បើតាមប្រជាពលរដ្ឋដែលបានចូលរួម ពួកគាត់បានបង្ហាញក្ដីរីករាយ នៅពេលដែលឃើញប្រជាជាតិខ្មែរយើង ចេះរួមសាមគ្គីគ្នានៅពេលមានពិធីអ្វីមួយឡើង។ ជាក់ស្ដែងក្នុងពិធីបុណ្យមាឃបូជានាឆ្នាំនេះ គឺមានប្រជាពលរដ្ឋខ្មែរយើងចូលរួមច្រើនជាឆ្នាំមុនៗ សបញ្ជាក់ឱ្យឃើញពីភាពសុខដុមរមនាក្នុងប្រទេសកម្ពុជាយើង ជាប្រទេសដែលមានសុខសន្តិភាព៕
អត្ថបទ និងរូបភាព៖ លោក យូ វង្ស, ឈិត សាវី
កែសម្រួល៖ លោក អ៊ុន ណារាជ្យ
