មជ្ឈមណ្ឌលសម្រាប់ព្យាបាលជំងឺបេះដូង ដែលមានតម្លៃជាង ២លានដុល្លារអាម៉េរិក របស់មន្ទីរពេទ្យបង្អែកខេត្តសៀមរាប ត្រូវបានបើកការដ្ឋានសាងសង់ជាផ្លូវការ នៅព្រឹកថ្ងៃទី១៣ ខែកុម្ភៈ ឆ្នាំ២០២៥នេះ ក្រោមជំនួយសមាគមសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ។
លោកសាស្ត្រាចារ្យជំនួយ ប៉ែន ផល្គុន ប្រធានមន្ទីរពេទ្យបង្អែកខេត្ត បានឱ្យដឹងថា មន្ទីរពេទ្យបង្អែកខេត្ត ជាផ្នែកមួយនៃមន្ទីរសុខាភិបាលនៃរដ្ឋបាលខេត្តសៀមរាប ដែលមានតួនាទីផ្តល់សេវាសំណុំសកម្មភាពបង្គ្រប់កម្រិត៣ ដែលមានគ្រែសម្រាកពេទ្យសរុបចំនួន ៤៧០គ្រែ មានផ្នែកផ្តល់សេវាដោយផ្ទាល់២៤ និងផ្នែកគាំទ្រសេវា១២។ បច្ចុប្បន្នមន្ទីរពេទ្យមួយនេះ កំពុងដើរតួនាទីជាមន្ទីរពេទ្យផ្តល់សេវាថ្នាក់តំបន់ ដោយសារវាមានការអភិវឌ្ឍ និងមានកម្រិតសមត្ថភាពរបស់ខ្លួនខ្ពស់ជាងបណ្តាមន្ទីរពេទ្យខេត្តដទៃក្នុងតំបន់ ដែលបានធ្វើឱ្យប្រជាពលរដ្ឋរស់នៅក្នុងបណ្តាខេត្តក្បែរខាងក៏មកប្រើសេវានៅទីនេះច្រើនផងដែរ ពិសេសនៅពេលពួកគាត់មានបញ្ហាសុខភាពធ្ងន់ធ្ងរ ឬមានភាពស្មុគស្មាញ ដែលមានចំនួនប្រមាណ ២០ភាគរយនៃករណីសម្រាកពេទ្យសរុប។
លោកសាស្ត្រាចារ្យ បានឱ្យដឹងទៀតថា សម្រាប់ឆ្នាំ២០២៤កន្លងទៅ មន្ទីរពេទ្យសម្រេចបានករណីពិគ្រោះជំងឺក្រៅប្រមាណជិត ១៤ម៉ឺនករណី ក្នុងនោះមានអ្នកស្លាប់ចំនួន ៤៣៦ករណី ស្មើនឹង១.៤ភាគរយ ដោយសារមានការកើនឡើងនៃអត្រាជំងឺមិនឆ្លង ពិសេសជំងឺទឹកនោមផ្អែម លើសសម្ពាធឈាម ជំងឺបណ្តាលមកពីការលើសទម្ងន់ និងការកើនឡើងជាលំដាប់នៃចំនួនមនុស្សចាស់ក្នុងសង្គមកម្ពុជាបច្ចុប្បន្ន បានធ្វើឱ្យបញ្ហាសុខភាពពាក់ព័ន្ធនឹងជំងឺបេះដូង និងសរសៃឈាម ដែលភាគច្រើនមានសភាពធ្ងន់ធ្ងរ និងហួសពីលទ្ធភាពនៃការព្យាបាលនៅថ្នាក់មន្ទីរពេទ្យខេត្ត មានការកើនឡើងជាលំដាប់គួរឱ្យមានការយកចិត្តទុកដាក់។
លោកប្រធានមន្ទីរពេទ្យ បញ្ជាក់ថា ថ្វីដ្បិតតែមន្ទីរពេទ្យបច្ចុប្បន្នមានវេជ្ជបណ្ឌិតឯកទេសបេះដូងចំនួន ៤រូបក៏ដោយ ក៏សមត្ថភាព និងលទ្ធភាពនៃការផ្តល់សេវាឯកទេសនេះនៅមានកម្រិតនៅឡើយ ពិសេសគឺមិនទាន់មានសេវា Cath Lab នៅក្នុងមន្ទីរពេទ្យឡើយទេ ហើយតាមការវិភាគបង្ហាញថា ជំងឺស្ទះសរសៃ ឈាមបេះដូង ជំងឺខ្សោយបេះដូង គឺជាមូលហេតុចំបងមួយនៃមូលហេតុស្លាប់នាំមុខទាំង១០ ក្នុងមន្ទីរពេទ្យ។ កន្លងមកអ្នកជំងឺដែលមានជំងឺស្លោកសាច់បេះដូងដោយមូលហេតុស្ទះសរសៃឈាមបេះដូង តែងត្រូវគ្រូពេទ្យព្យាបាលស្នើសុំបញ្ជូនទៅព្យាបាលបន្តជាបន្ទាន់នៅមន្ទីរពេទ្យថ្នាក់ជាតិ ដែលត្រូវរយៈពេលបញ្ជូនយ៉ាងតិចបំផុត ៤ម៉ោង ហើយក៏មានករណីមួយចំនួនទៀតត្រូវបញ្ជូនមិនទាន់ ឬគ្មានលទ្ធភាពក្នុងការទៅទទួលសេវានៅមន្ទីរពេទ្យជាតិទៀតផង។ ភាពយឺតយ៉ាវក្នុងការបញ្ជូន រយៈពេលនៃការបញ្ជូនវែង និងដោយសារមានកង្វះលទ្ធភាពក្នុងការចំណាយសម្រាប់ការព្យាបាលនិងស្នាក់នៅឯមន្ទីរពេទ្យថ្នាក់ជាតិ បានធ្វើឱ្យអត្រាស្លាប់ និងអត្រាពិការភាពបណ្តាលមកពីជំងឺនេះមានកម្រិតខ្ពស់បំផុត។ ដោយសារហេតុនេះ ទើមថ្នាក់ដឹកនាំមន្ទីរសុខាភិបាលខេត្ត បានប្រឹងប្រែង និងបានស្វះស្វែងរកគ្រប់មធ្យោបាយ ដើម្បីអាចមានលទ្ធភាពបង្កើតឱ្យបាននូវសេវាឯកទេសបេះដូង និងសរសៃឈាមមួយក្នុងមន្ទីរពេទ្យបង្អែកខេត្តសៀមរាប ដែលអាចមានលទ្ធភាពព្យាបាល និងជួយសង្គ្រោះអ្នកជំងឺ សម្រាប់ជាប្រយោជន៍ដល់ប្រជាពលរដ្ឋរស់នៅក្នុងខេត្តសៀមរាប និងក្នុងតំបន់ជុំវិញ។
លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា អាគារមជ្ឈមណ្ឌលជំងឺបេះដូងនៃមន្ទីរពេទ្យបង្អែកខេត្តសៀមរាប នេះនឹងក្លាយជាសមិទ្ធផលមួយថ្មីបន្ថែមទៀត លើវិស័យសុខាភិបាលរបស់ខេត្ត ហើយនឹងជួយសម្រួលឱ្យការផ្តល់សេវាសុខភាពជូនបងប្អូនប្រជាពលរដ្ឋរបស់យើងកាន់តែមានផាសុខភាព និង ប្រកបដោយប្រសិទ្ធភាព។ ការសាងសង់អាគារមជ្ឈមណ្ឌលជំងឺបេះដូងនាពេលនេះដែរ គឺជាការចូលរួមចំណែកយ៉ាងធំធេង ជាមួយរាជរដ្ឋាភិបាលកម្ពុជា ពិសេសជាមួយរដ្ឋបាលខេត្តសៀមរាប ក្នុងការលើកកម្ពស់វិស័យសុខាភិបាលខេត្តមួយនេះឱ្យកាន់តែមានភាពទំនើបស៊ីវីល័យ។
ក្នុងនាមអាជ្ញាធរខេត្ត និងបងប្អូនប្រជាពលរដ្ឋទូទាំងខេត្តសៀមរាប សូមថ្លែងអំណរគុណ និងចងចាំនូវទឹកចិត្តដ៏ប្រពៃសប្បុរសសមាគមសាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ ហើយសង្ឃឹមថាសមាគម នឹងជួយដល់ខេត្តសៀមរាបបន្តទៀត លើវិស័យផ្សេងទៀតឱ្យមានការរីកចម្រើនផងដែរ៕
អត្ថបទ និងរូបភាព៖ លោក ជា ស្រស់, ទ្រា ពន្លឺ
កែសម្រួល៖ លោក អ៊ុន ណារាជ្យ
