ឯកសារវិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធចំនួន ២.២៣៤ក្បាលដី ក្នុងឃុំកំពង់ក្ដី ស្រុកជីក្រែង ខេត្តសៀមរាប ត្រូវបានមន្ទីររៀបចំដែនដីខេត្ត សហការជាមួយរដ្ឋបាលស្រុក បិទផ្សាយជាសាធារណៈ ដើម្បីឱ្យប្រជាពលរដ្ឋ និងអ្នកកាន់កាប់ ឬម្ចាស់ក្បាលដី ធ្វើការពិនិត្យផ្ទៀងផ្ទាត់មុននឹងឈានដល់ការទទួលបានបណ្ណកម្មសិទ្ធិសម្គាល់ម្ចាស់អចលនទ្រព្យ ដែលពិធីនេះធ្វើឡើងក្នុងវត្តបុព្វទិសារាម ហៅវត្តកំពង់ក្ដី នៅព្រឹកថ្ងៃទី១៣ ខែកុម្ភៈ ឆ្នាំ២០២៥នេះ។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់ថា ក្បាលដីដែលធ្វើការវិនិច្ឆ័យ និងប្រកាសបិទផ្សាយនាពេលនេះមានចំនួន ២.២៣៤ក្បាលដី ស្ថិតក្នុងភូមិអន្សងពង ភូមិប្រាសាទ ភូមិត្រាចថ្មី នៃឃុំកំពង់ក្ដី ដែលការបិទផ្សាយនេះ មានរយៈពេល១៥ថ្ងៃ គិតចាប់ពីថ្ងៃទី ១៣-២៧ ខែកុម្ភៈ ឆ្នាំ២០២៥ ក្នុងបរិវេណវត្តវត្តកំពង់ក្ដី ដើម្បីឱ្យបងប្អូនជាម្ចាស់ដី ឬអ្នកកាន់កាប់ដី ព្រមទាំងស្ថាប័ន និងអង្គភាពពាក់ព័ន្ធ ចូលរួមពិនិត្យផ្ទៀងផ្ទាត់មើលទិន្នន័យឱ្យបានគ្រប់ៗគ្នា ដើម្បីធានាបាននូវភាពសុក្រឹត្យត្រឹមត្រូវ ក្នុងការចេញវិញ្ញាបនបត្រសម្គាល់ម្ចាស់អចលនវត្ថុជូន។
លោកប្រធានមន្ទីរ ក៏បានសំណូមពរដល់ម្ចាស់ក្បាលដី និងអ្នកកាន់កាប់ដី ព្រមទាំងអ្នកពាក់ព័ន្ធ សូមពិនិត្យផ្ទៀងផ្ទាត់ទិន្នន័យក្បាលដីរបស់ខ្លួនឱ្យបានគ្រប់ៗគ្នា ទៅលើឈ្មោះម្ចាស់ដី សាវតា ទំហំដី ប្រភេទទ្រព្យ ព្រោះនេះជាឱកាសចុងក្រោយដែលអ្នកពាក់ព័ន្ធទាំងអស់មានសិទ្ធិធ្វើការកែតម្រូវ ឬជំទាស់តវ៉ា ក្នុងករណីដែលមានកំហុសឆ្គង ដើម្បីជំនាញធ្វើការពិនិត្យ និងកែតម្រូវជូន សំដៅធានាបាននូវភាពត្រឹមត្រូវទាំងលក្ខណៈបច្ចេកទេស និងលក្ខណៈច្បាប់។
ព័ត៌មានជាតិ ថ្មីៗ
លោក ធូ ចន្ថុល អភិបាលរងស្រុកជីក្រែង មានប្រសាសន៍ថា ការចុះបញ្ជីដីមានលក្ខណៈជាប្រព័ន្ធ ធ្វើឡើងដើម្បីផ្តល់បណ្ណកម្មសិទ្ធិជូនបងប្អូនប្រជាពលរដ្ឋដែលជាម្ចាស់ដី ឬអ្នកកាន់កាប់ដីទាំងអស់ សម្រាប់យកទៅប្រើប្រាស់ ដូចជាយកទៅដាក់បញ្ចាំ និងហ៊ីប៉ូតែក ដើម្បីខ្ចីប្រាក់មកប្រកបមុខរបរផ្សេងៗ សំដៅលើកស្ទួយជីវភាពរស់នៅប្រចាំថ្ងៃ ឬជាឯកសារសំអាងនៅពេលមានជម្លោះដីធ្លីកើតមានឡើង។ ហើយមុននឹងឈានទៅចេញបណ្ណកម្មសិទ្ធិជូនទៅឱ្យបងប្អូនប្រជាពលរដ្ឋដែលជាម្ចាស់ដី ឬអ្នកកាន់កាប់ដី តាមនីតិវិធីតម្រូវឱ្យមានការបិទផ្សាយជាសាធារណៈនូវឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ដើម្បីផ្ទៀងផ្ទាត់ ធ្វើការកែតម្រូវ ឬជំទាស់តវ៉ាបើបងប្អូនពិនិត្យឃើញថាមានចំណុចខុសឆ្គង។
លោកក៏បានសំណូមពរដល់បងប្អូនប្រជាពលរដ្ឋដែលជាម្ចាស់ក្បាលដី និងអ្នកកាន់កាប់ដី រួសរាន់ចូលរួមពិនិត្យ ផ្ទៀងផ្ទាត់ឱ្យបានគ្រប់គ្នា ដើម្បីធានាបាននូវភាពត្រឹមត្រូវ ច្បាស់លាស់ គ្មានកំហុសឆ្គង ព្រោះវាជាឱកាសចុងក្រោយ ដែលម្ចាស់ក្បាលដីអាចមានសិទ្ធិពិនិត្យតវ៉ា បើអាក់ខាន ឬយឺតយ៉ាវ វានឹងនាំឱ្យបាត់បង់ផលប្រយោជន៍របស់បងប្អូន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
