ភូមិចំនួន១៧ នៃឃុំគោកដូង ស្រុកអង្គរជុំ ខេត្តសៀមរាប រួមមាន ភូមិទំលាប់ ភូមិខ្ទារ ភូមិគោកដូងថ្មី ភូមិគោកភ្នៅ ភូមិគោកត្របែក ភូមិអន្ទិតសុខ ភូមិរកា ភូមិគោកក្រោល ភូមិកប្តៀក ភូមិចេកក្បូរ ភូមិគោកស្នួល ភូមិប្រាសាទត្រាវ ភូមិកំប្លើប ភូមិដូនអែម ភូមិគោកដូងចាស់ ភូមិបុស្សក្រឡុក និងភូមិអូរគោល ត្រូវបានមន្រ្តីជំនាញប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ នៅព្រឹកថ្ងៃទី១៧ ខែកុម្ភៈ ឆ្នាំ២០២៥នេះ។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បានឱ្យដឹងថា ការចុះបញ្ជីដីធ្លីមានលក្ខណៈជាប្រព័ន្ធ ត្រូវមានការបោះបង្គោល កំណត់ព្រំដី ឯកសារពាក់ព័ន្ធដូចជា អត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ សេចក្តីចម្លងសំបុត្របញ្ជាក់កំណើត សេចក្តីចម្លងសំបុត្រអាពាហ៍ពិពាហ៍ សេចក្តីចម្លងសំបុត្រមរណភាព លិខិតបញ្ជាក់ភាពនៅលីវ បណ្ណសម្គាល់សិទ្ធិកាន់កាប់ប្រើប្រាស់ដីធ្លី បណ្ណសម្គាល់សិទ្ធិកាន់កាប់អចលនវត្ថុ បង្កាន់ដៃទទួលពាក្យ លិខិតផ្ទេរសិទ្ធិដីធ្លី លិខិតអំណោយផ្តាច់ លិខិតបញ្ជាក់ ឬលិខិតអះអាងប្រវត្តិដី និងលិខិតផ្សេងៗ។
លោកអនុប្រធានមន្ទីរ ក៏បានជំរុញដល់ប្រជាពលរដ្ឋដែលជាម្ចាស់ដីទាំងអស់ ត្រូវចូលរួមសហការជាមួយក្រុមការងារចុះបញ្ជីដីធ្លីមានលក្ខណៈជាប្រព័ន្ធ ដើម្បី ចង្អុលបង្ហាញទីតាំងក្បាលដី ព្រំដី និងបោះបង្គោលច្បាស់លាស់ និងមានការឯកភាពគ្នា ចៀសវាងមានជម្លោះ និងដើម្បីជួយពន្លឿនការចុះវាស់វែងដីធ្លីឱ្យបានលឿន។
លោក ភន់ សុខុម អភិបាលស្រុកអង្គរជុំ មានប្រសាសន៍ថា ការចុះបញ្ជីដីធ្លីមានលក្ខណៈជាប្រព័ន្ធ គឺមានគោលបំណងធ្វើការចុះបញ្ជីលើដីធ្លីឱ្យបានច្បាស់លាស់ដោយធ្វើការផ្ទេរសិទ្ធិលើទ្រេព្យ ដើម្បីទប់ស្កាត់ និងដោះស្រាយវិវាទដីធ្លីសំដៅពង្រឹងសុវត្ថិភាពដីធ្លី ធានានូវទំនុកចិត្ត និងប្រសិទ្ធិភាពនៃទីផ្សារដីធ្លី។ ដីដែលបានចុះបញ្ជីនេះ គឺដើម្បីកាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លី ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ដែលអាចបង្កបង្កើនផល និងប្រកបរបរផ្សេងៗ ដោយគ្មានការព្រួយបារម្ភ។
លោកអភិបាលស្រុកអង្គរជុំ ក៏បានអំពាវនាវដល់បងប្អូនប្រជាពលរដ្ឋ ដែលបានមកចូលទាំងអស់ និងអាជ្ញាធរមូលដ្ឋាន សូមជួយធ្វើការផ្សព្វផ្សាយបន្តដល់បងប្អូនប្រជាពលរដ្ឋដែលជាម្ចាស់ដីដែលពុំបានចួលរួម ឱ្យពួកគាត់បានដឹង និងចូលរួមបោះបង្គោលព្រំដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារមួយចំនួនដែលពាក់ព័ន្ធឱ្យបានគ្រប់ៗគ្នា៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
