ដើម្បីអបអរខួបលើកទី៧០ ថ្ងៃកំណើតកាកបាទក្រហមកម្ពុជា នៅថ្ងៃទី១៨ ខែកុម្ភៈ ឆ្នាំ២០២៥នេះ លោក ស៊ុំ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប បានដឹកនាំសហការី រួមនឹងយុវជនស្ម័គ្រចិត្ត ធ្វើការបោសសំរាម ស្លឹកឈើងាប់ ធ្វើផ្លូវការពារភ្លើងឆេះ សម្អាតពាក្យស្លាក ដើម្បីបញ្ជាក់ពីសកម្មភាពដែលសម្រេចបាននូវគោលដៅសកល តាមរយៈការរួមចំណែកការការពារបរិស្ថាន និងភាពធន់នឹងបម្រែបម្រួលអាកាសធាតុ នៅក្នុងឧទ្យានសហស្សវត្សរ៍កាកបាទក្រហមកម្ពុជា ក្នុងក្រុងសៀមរាប។
លោក ស៊ុំ សំអន មានប្រសាសន៍ថា ថ្ងៃទី១៨ ខែកុម្ភៈ មិនត្រឹមតែជាថ្ងៃកំណើតកាកបាទក្រហមកម្ពុជាប៉ុណ្ណោះទេ សម្រាប់ខេត្តសៀមរាប ថ្ងៃដ៏មានអត្ថន័យនេះ ក៏ជាថ្ងៃបង្ហាញដល់គ្រប់មជ្ឈដ្ឋានជាតិ អន្តរជាតិ បានយល់កាន់តែច្បាស់ពីអត្ថប្រយោជន៍នៃធនធានធម្មជាតិ និងផលប៉ះពាល់ មកលើភពផែនដី ដែលបណ្ដាលពីការបាត់បង់ធនធានធម្មជាតិ។ ការចូលរួមសម្អាតបរិស្ថាននាពេលនេះ មិនត្រឹមតែរួមចំណែកថែរក្សាគម្របបៃតងនៃតំបន់រមណីយដ្ឋានអង្គរប៉ុណ្ណោះទេ តែយើងក៏បានបង្ហាញពីឆន្ទៈរបស់កម្ពុជា ក្នុងការចូលរួមកាត់បន្ថយបម្រែបម្រួលអាកាសធាតុ ដែលពិភពលោកកំពុងប្រឈមផងដែរ។
លោកបន្តថា ជារៀងរាល់ឆ្នាំ សាខាកាកបាទក្រហមកម្ពុជាខេត្ត តែងធ្វើពលកម្មសម្អាត និងថែទាំដើមឈើរាប់ពាន់ដើម ដែលសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី សម្តេចកិត្តិព្រឹទ្ធបណ្ឌិតប្រធាន កាកបាទក្រហមកម្ពុជា រួមទាំង សមាជិកព្រឹទ្ធសភា រដ្ឋសភា រាជរដ្ឋាភិបាល និងមន្ត្រីក្នុងខេត្តបានយាង និងអញ្ជើញដាំតាំងពីឆ្នាំ១៩៩៩មក ដោយសុទ្ធចិត្តចេញពីស្មារតីទទួលខុសត្រូវ ការស្រឡាញ់ព្រៃឈើ ស្រឡាញ់ធម្មជាតិ និងបរិស្ថានរបស់យើងទាំងអស់គ្នា។ ពោលគឺគ្មាននរណាម្នាក់រស់នៅដោយមិនបានផ្សាភ្ជាប់ខ្លួនជាមួយបរិស្ថានធម្មជាតិ ក្នុងភពផែនដីយើងនេះបានឡើយ។
ព័ត៌មានជាតិ ថ្មីៗ
លោកក៏បានរំលឹកថា ឧទ្យានសហស្សវត្សរ៍ នៅតាមបណ្ដោយផ្លូវទៅប្រាសាទអង្គរវត្ត ជាមរតកដ៏ថ្លៃថ្លារបស់កាកបាទក្រហមកម្ពុជា ដែលបានដាំដុះឡើងតាំងពីឆ្នាំ១៩៩៩ ក្រោមព្រះរាជាធិបតីភាពដ៏ខ្ពង់ខ្ពស់ សម្តេចព្រះមហាក្សត្រី នរោត្តម មុនីនាថ សីហនុ ព្រះប្រធានកិត្តិយសកាកបាទក្រហមកម្ពុជា។ ឧទ្យាននេះគ្របដណ្តប់លើផ្ទៃដីជាង ៥ហិកតា និងមានដើមឈើចំនួន ២.៤៦០ដើម ដែលជានិមិត្តរូបនៃការប្តេជ្ញាចិត្តយូរអង្វែងចំពោះនិរន្តរភាពបរិស្ថាន៕
អត្ថបទ និងរូបភាព៖ កាកបាទក្រហមខេត្ត
កែសម្រួល៖ លោក អ៊ុន ណារាជ្យ
