នៅថ្ងៃទី១៨ ខែកុម្ភៈ ឆ្នាំ២០២៥នេះ ភូមិចំនួន៥ ក្នុងឃុំប្រិយ៍ ស្រុកស្រីស្នំ ខេត្តសៀមរាប រួមមានភូមិប្រិយ៍១ ភូមិប្រិយ៍២ ភូមិត្រាំសសរ ភូមិក្របៅ និងភូមិក្រូចចារ ត្រូវបានមន្រ្តីជំនាញប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ដោយមន្ត្រីជំនាញបានជំរុញឱ្យប្រជាពលរដ្ឋជាម្ចាស់ក្បាលដី ចូលរួមសហការជាមួយក្រុមការងារតាមរយៈការចង្អុលបង្ហាញទីតាំងក្បាលដី ព្រំដី និងបោះបង្គោលច្បាស់លាស់ និងមានការឯកភាពគ្នា ចៀសវាងមានជម្លោះ និងដើម្បីជួយពន្លឿនការចុះវាស់វែងដីធ្លីអនុវត្តទៅរលូន និងបានលឿន។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានបញ្ជាក់ថា ការចុះបញ្ជីដីធ្លីមានលក្ខណៈជាប្រព័ន្ធ ត្រូវមានការបោះបង្គោល កំណត់ព្រំដី ឯកសារពាក់ព័ន្ធដូចជា អត្តសញ្ញាណបណ្ណ សៀវភៅគ្រួសារ សៀវភៅស្នាក់នៅ សេចក្តីចម្លងសំបុត្របញ្ជាក់កំណើត សេចក្តីចម្លងសំបុត្រអាពាហ៍ពិពាហ៍ សេចក្តីចម្លងសំបុត្រមរណភាព លិខិតបញ្ជាក់ភាពនៅលីវ បណ្ណសម្គាល់សិទ្ធិកាន់កាប់ប្រើប្រាស់ដីធ្លី បណ្ណសម្គាល់សិទ្ធិកាន់កាប់អចលនវត្ថុ បង្កាន់ដៃទទួលពាក្យ លិខិតផ្ទេរសិទ្ធិដីធ្លី លិខិតអំណោយផ្តាច់ លិខិតបញ្ជាក់ ឬលិខិតអះអាងប្រវត្តិដី និងលិខិតផ្សេងៗ។
លោក ហ៊ន់ ឫទ្ធិ អភិបាលស្រុកស្រីស្នំ មានប្រសាសន៍ថា ឃុំប្រិយ៍ គឺជាឃុំចុងក្រោយគេបង្អស់នៅក្នុងស្រុកស្រីស្នំ ដែលត្រូវបានមន្ត្រីជំនាញប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ ក្នុងគោលបំណងធ្វើការចុះបញ្ជីលើអចលនវត្ថុទាំងដីរដ្ឋ និងដីឯកជនឱ្យបានច្បាស់លាស់ ដោយធ្វើការផ្ទេរសិទ្ធិលើទ្រព្យទាំងនោះជាផ្លូវការ ដើម្បីទប់ស្កាត់ កាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លី ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដដែលត្រូវបានការពារដោយច្បាប់ និងធានាដោយរដ្ឋ ដែលអាចបង្កបង្កើនផល និងប្រកបរបរផ្សេងៗលើដីរបស់ខ្លួនដោយគ្មានការព្រួយបារម្ភ។
លោកអភិបាលស្រុកស្រីស្នំ ក៏បានអំពាវនាវដល់បងប្អូនប្រជាពលរដ្ឋ ដែលបានមកចូលទាំងអស់ និងអាជ្ញាធរមូលដ្ឋាន សូមជួយធ្វើការផ្សព្វផ្សាយបន្តដល់បងប្អូនប្រជាពលរដ្ឋដែលជាម្ចាស់ដីដែលពុំបានចូលរួមឱ្យបានដឹង និងចូលរួមបោះបង្គោលព្រំដីដោយបានឯកភាពព្រំរវាងអ្នកជាប់ព្រំ និងត្រៀមរៀបចំឯកសារដែលពាក់ព័ន្ធឱ្យបានរួចរាល់ផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
