នៅរសៀលថ្ងៃទី១៧ ខែកុម្ភៈ ឆ្នាំ២០២៥នេះ រដ្ឋបាលខេត្ដសៀមរាប បានបើកកិច្ចប្រជុំគណៈកម្មការគាំទ្រជំរុញការអនុវត្ដយុទ្ធសាស្ត្រជាតិ ស្ដីពីការអភិវឌ្ឍសេដ្ឋកិច្ចក្រៅប្រព័ន្ធ ក្នុងខេត្ដសៀមរាប ដឹកនាំកិច្ចប្រជុំដោយ លោក ង៉ូវ សេងកាក់ អភិបាលរងខេត្ដ ដោយមានការចូលរួមពីតំណាងមន្ទីរអង្គភាពក្នុងខេត្ដ អាជ្ញាធរក្រុងស្រុក និងអ្នកប្រកបរបររកស៊ីសេដ្ឋកិច្ចក្រៅប្រព័ន្ធផងដែរ។
លោក ង៉ូវ សេងកាក់ អភិបាលរងខេត្ត មានប្រសាសន៍ថា កិច្ចប្រជុំនាពេលនេះ គឺដើម្បីផ្សព្វផ្សាយពីអត្ថប្រយោជន៍ពីការអភិវឌ្ឍសេដ្ឋកិច្ចក្រៅប្រព័ន្ធដល់អ្នកប្រកបរបររកស៊ីសេដ្ឋកិច្ចក្រៅប្រព័ន្ធ ដូចជាអ្នករត់ម៉ូតូកង់បី Pass App អ្នកលក់ដូរតាមចិញ្ចើមថ្នល់ ឬកម្មករនិយោជក់ជាដើម។ កិច្ចប្រជុំក៏បង្ហាញពីគោលបំណងនៃយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨។ លើកកម្ពស់ការគាំពារ និងការពង្រឹងសមត្ថភាព ផលិតភាព និងភាពធន់នៃសេដ្ឋកិច្ចក្រៅប្រព័ន្ធ ព្រមទាំងជំរុញ និងពន្លឿនការចូលរួមទៅក្នុងសេដ្ឋកិច្ចក្នុងប្រព័ន្ធ ដើម្បីធានាឱ្យបាននូវភាពធន់ ភាពប៉ាន់ប្រមាណបាន និងភាពរីកចម្រើនទៅមុខនៃការធ្វើធុរកិច្ចពាណិជ្ជកម្ម ការវិនិយោគ និងការប្រកបអាជីវកម្ម។
លោកអភិបាលរងខេត្ត បញ្ជាក់ថា ដើម្បីអនុវត្តស្របតាមផែនការយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធនេះ រដ្ឋបាលខេត្តសៀមរាប ត្រូវបានពន្លឿនរៀបចំបង្កើតសេចក្តីសម្រេចក្រុមការងារអនុគណៈកម្មាធិការ ដើម្បីគាំទ្រ និងជំរុញការអនុវត្តសកម្មភាពការងារឱ្យបានល្អ ស្របតាមចក្ខុវិស័យរាជរដ្ឋាភិបាល និងសម្របតាមលិខិតបទដ្ឋានគតិយុត្តនានាបានកំណត់។ រៀបចំរបាយការណ៍វឌ្ឍនភាពនៃការអនុវត្ត និងបញ្ហាប្រឈមជាប្រចាំ ដោយបញ្ជាក់ហេតុផលឱ្យបានច្បាស់លាស់ ដើម្បីមានវិធានការពិនិត្យ និងដោះស្រាយ ព្រមទាំងត្រូវរៀបចំផែនការសកម្មភាពលម្អិត និងផែនការថវិកាសម្រាប់អនុវត្តរាល់ វិធានការដែលត្រូវបានដាក់ចេញស្របតាមគោលការណ៍ណែនាំរបស់យុទ្ធសាស្ត្រថ្នាក់ជាតិ។ រដ្ឋបាលក្រុងស្រុក មន្ទីរអង្គភាពជំនាញពាក់ព័ន្ធ ត្រូវជំរុញដល់អ្នកប្រកបរបរផ្នែកសេដ្ឋកិច្ចក្រៅប្រព័ន្ធក្នុងខេត្តសៀមរាប ឱ្យចុះឈ្មោះសេដ្ឋកិច្ចក្រៅប្រព័ន្ធ តាមរយៈកម្មវិធីទូរសព្ទដៃ Cam-IE ស្របតាមការណែនាំរបស់រាជរដ្ឋាភិបាល។
សូមជម្រាបថា សេដ្ឋកិច្ចក្រៅប្រព័ន្ធ គឺជាសំណុំចម្រុះនៃសកម្មភាពសេដ្ឋកិច្ច សហគ្រាស ការងារ និងកម្មករ ដែលមិនត្រូវបានគ្រប់គ្រង ឬការពារដោយរដ្ឋ។ សេដ្ឋកិច្ចក្រៅប្រព័ន្ធមានសកម្មភាពដែលមានតម្លៃទីផ្សារ ប៉ុន្តែមិនត្រូវបានចុះបញ្ជីជាផ្លូវការ។ នៅក្នុងប្រទេសដែលមានសេដ្ឋកិច្ចជឿនលឿន ឧទាហរណ៍ ចាប់ពីកម្មករសំណង់ដែលធ្វើការតាមផ្ទះ រហូតដល់ក្រុមហ៊ុនចុះបញ្ជីដែលចូលរួមក្នុងសកម្មភាពក្រៅផ្លូវការ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
