ថ្លែងក្នុងវេទិកាអនាគត ស្តីពីនិរន្តរភាពប្រព័ន្ធស្បៀងអាហារ-ការធានាអនាគត ដែលធ្វើឡើងនៅខេត្តសៀមរាប ថ្ងៃទី១៧ ខែកុម្ភៈ ឆ្នាំ២០២៥នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងថា អង្ករដែលជាអាហារចម្បងសម្រាប់ប្រជាជនជាងពាក់កណ្តាលនៃពិភពលោក និងជាចំណុចកណ្តាលនៃសេដ្ឋកិច្ចកសិកម្ម និងសន្តិសុខស្បៀងរបស់កម្ពុជានោះ ពេលនេះប្រឈមមុខនឹងបញ្ហាយ៉ាងជ្រាលជ្រៅ ដែលទាមទារឱ្យមានការយកចិត្តទុកដាក់ជាបន្ទាន់។
ឯកឧត្តម ឌិត ទីណា មានប្រសាសន៍ថា បច្ចុប្បន្នវិស័យកសិកម្មបានជួបប្រទះបញ្ហាធំៗដូចជា ភាពងាយរងគ្រោះនៃអាកាសធាតុដោយសារការកើនឡើងនូវសីតុណ្ហភាព ភ្លៀងធ្លាក់ខុសប្រក្រតី និងព្រឹត្តិការណ៍អាកាសធាតុខ្លាំង បានគំរាមកំហែងដល់ផលិតកម្មស្រូវនៅទូទាំងពិភពលោក។ ការរំខានទាំងនេះកំពុងប៉ះពាល់ដល់ជីវភាពកសិកររាប់លាននាក់។ បញ្ហាការបំភាយឧស្ម័នមេតាន តាមរយៈវិធីសាស្រ្តធ្វើស្រែចម្ការតាមបែបប្រពៃណីក៏បានរួមចំណែកយ៉ាងសំខាន់ក្នុងការបំភាយឧស្ម័នផ្ទះកញ្ចក់។ តាមការស្រាវជ្រាវក៏បានបង្ហាញថា ការកើនឡើងកម្រិតកាបូនឌីអុកស៊ីត វាកាត់បន្ថយគុណភាពអាហារូបត្ថម្ភរបស់អង្ករ ដែលប៉ះពាល់ដល់មីក្រូសារជាតិសំខាន់ៗដូចជាជាតិដែក និងស័ង្កសី ដែលបង្កហានិភ័យធ្ងន់ធ្ងរដល់សន្តិសុខស្បៀង និងអាហារូបត្ថម្ភ សម្រាប់ប្រជាជនដែលងាយរងគ្រោះ។
ឯកឧត្តមមានប្រសាសន៍ថា ទន្ទឹមនឹងបញ្ហាប្រឈមទាំងនេះ វាក៏ជាឱកាសផងដែរ ព្រោះតាមរយៈការលើកកម្ពស់ការអនុវត្តឆ្លាតវៃអាកាសធាតុ ពង្រីកការប្រើប្រាស់ថាមពលកកើតឡើងវិញក្នុងវិស័យកសិកម្ម និងការវិនិយោគលើពូជដំណាំដែលធន់នឹងអាកាសធាតុ យើងមិនត្រឹមតែអាចការពារផលិតកម្មស្រូវប៉ុណ្ណោះទេ ប៉ុន្តែថែមទាំងបង្វែរវិស័យនេះទៅជាកត្តាជំរុញនៃនិរន្តរភាពទៅវិញ។ កសិកម្ម សន្តិសុខស្បៀង អាហារូបត្ថម្ភ ការការពារសង្គម និងបម្រែបម្រួលអាកាសធាតុ មិនមែនជាបញ្ហាឯកត្តជនទេ ដូច្នេះហើយដំណោះស្រាយចំពោះបញ្ហាប្រឈមទាំងនេះស្ថិតនៅក្នុងសកម្មភាពរួម។ យ៉ាងណាក៏ដោយ យើងក៏ឃើញផងដែរនូវសក្តានុពលដូចគ្នាដែលផ្តល់អំណាចដល់កសិកររបស់យើង តាមរយៈការប្រើប្រាស់បច្ចេកវិទ្យា និងការប្រើប្រាស់ភាពជាដៃគូ។
ឯកឧត្តមបញ្ជាក់ថា វិស័យកសិកម្ម គឺជាមូលដ្ឋានគ្រឹះនៃសេដ្ឋកិច្ចរបស់កម្ពុជា ដែលដើរតួនាទីយ៉ាងសំខាន់ក្នុងការធានាសន្តិសុខស្បៀង បង្កើតការងារ បង្កើតប្រាក់ចំណូល និងផលិតទំនិញនាំចេញសម្រាប់ទីផ្សារអន្តរជាតិ។ ដើម្បីពន្លឿនការអភិវឌ្ឍរបស់ខ្លួន ការពង្រឹងកិច្ចសហប្រតិបត្តិការរវាងដៃគូអភិវឌ្ឍរបស់រដ្ឋាភិបាល និងវិស័យឯកជន គឺចាំបាច់ណាស់។ ស្ថិរភាពតម្លៃក្នុងវិស័យកសិកម្មមិនគ្រាន់តែជាគោលដៅសេដ្ឋកិច្ចប៉ុណ្ណោះទេ តែវាជាខ្សែជីវិតសម្រាប់កសិកររាប់លាននាក់ ដែលពឹងផ្អែកលើកសិកម្មសម្រាប់ចិញ្ចឹមជីវិតរបស់ពួកគេ។ ការប្រែប្រួលនៃទីផ្សារពិភពលោក រួមជាមួយនឹងការកើនឡើងថ្លៃដើមផលិតកម្ម និងភាពមិនច្បាស់លាស់នៃអាកាសធាតុ ទាមទារដំណោះស្រាយប្រកបដោយភាពច្នៃប្រឌិត។
ឯកឧត្តមរដ្ឋមន្ត្រីបន្ថែមថា ដើម្បីឱ្យស្របទៅនឹងបញ្ហាទាំងនេះ យុទ្ធសាស្ត្រសំខាន់មួយរបស់យើងក្នុងការដោះស្រាយបញ្ហានេះ គឺការលើកកម្ពស់សហគមន៍កសិកម្មទំនើប ព្រោះសហគមន៍ទាំងនេះផ្តល់សិទ្ធិអំណាចដល់កសិករក្នុងការប្រមូលផ្តុំធនធាន ចូលទីផ្សារកាន់តែមានប្រសិទ្ធភាព និងចរចាតម្លៃសមរម្យសម្រាប់ផលិតផលរបស់ពួកគេ។ ពួកវាក៏ជាយានជំនិះសម្រាប់ការបង្កើតថ្មី ដែលអាចឱ្យកសិករទទួលយកការអនុវត្តប្រកបដោយភាពឆ្លាតវៃពីអាកាសធាតុ និងរួមបញ្ចូលឧបករណ៍ឌីជីថលដូចជាផ្ទាំងគ្រប់គ្រងតម្លៃដំណាំ ដើម្បីបង្កើនផលិតភាព និងភាពធន់របស់ពួកគេ៕
អត្ថបទ និងរូបភាព៖ សហការី
កែសម្រួល៖ លោក អ៊ុន ណារាជ្យ
