ភូមិចំនួន៥ ក្នុងឃុំវ៉ារិនស្រុកវ៉ារិន ត្រូវបានមន្ត្រីជំនាញប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ
ភូមិចំនួន៥ រួមមានភូមិនេល ភូមិរំដួល ភូមិគោកភ្នំ ភូមិវ៉ារិន និងភូមិគោកស្រុក នៃឃុំវ៉ារិនស្រុកវ៉ារិន ខេត្ដសៀមរាប ត្រូវបានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត សហការជាមួយរដ្ឋបាលស្រុកវ៉ារិន ប្រកាសកំណត់តំបន់វិនិច្ឆ័យសម្រាប់ការចុះបញ្ជីដីធ្លីមានលក្ខណៈជាប្រព័ន្ធ កាលពីថ្ងៃទី១២ ខែកុម្ភៈ ឆ្នាំ២០២៥ ដែលពិធីនេះរៀបចំឡើងនៅវត្តសុវណ្ណបុទុមហៅវត្តវ៉ារិន ក្រោមអធិបតីភាព លោក ធិននី វិធូរ អភិបាលស្រុកវ៉ារិន និង លោក ហ៊ី សាយ ប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តរួមជាមួយវត្តមានអាជ្ញាធរមូលដ្ឋាននិងប្រជាពលរដ្ឋជាច្រើនទៀតបានចូលរួម។
លោក ហ៊ី សាយ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ឱ្យដឹងថា៖ ការចុះបញ្ជីដីធ្លីមានលក្ខណៈជាប្រព័ន្ធត្រូវមានការបោះបង្គោល កំណត់ព្រំដី ដោយត្រៀមបង្គោលរឹងមាំសម្រាប់បោះព្រំដី។ត្រូវមានឯកសារ អត្តសញ្ញាណម្ចាស់ដី ដូចជាអត្តសញ្ញាណបណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅសេចក្តីចម្លងសំបុត្របញ្ជាក់កំណើត សេចក្តីចម្លងសំបុត្រអាពាហ៍ពិពាហ៍ សេចក្តីចម្លងសំបុត្រមរណភាពលិខិតបញ្ជាក់ភាពនៅលីវ។មួយទៀតគឺឯកសារ អត្តសញ្ញាណដីត្រូវមានបណ្ណសម្គាល់សិទ្ឋិកាន់កាប់ប្រើប្រាស់ដីធ្លីបណ្ណសម្គាល់សិទ្ឋិកាន់កាប់អចលនវត្ថុ បង្កាន់ដៃទទួលពាក្យ លិខិតផ្ទេរសិទ្ឋិដីធ្លី លិខិតអំណោយផ្តាច់ លិខតបញ្ជាក់ឬលិខិតអះអាងប្រវត្តិដីនិងលិខិតផ្សេងៗ។
លោកហ៊ី សាយ បានបន្តថា៖ការ ចុះបញ្ជីដីធ្លីមានលក្ខណៈជាប្រព័ន្ធ ត្រូវអនុវត្តតាមនីតិវិធីជា៥ ដំណាក់កាលដូចជាទី១. កំណត់តំបន់ធ្វើការវិនិច្ឆ័យ និងដំណើរការផ្សព្វផ្សាយពីការចុះបញ្ជីដីធ្លីមានលក្ខណៈជាប្រព័ន្ធ, ទី២. ប្រតិបត្តិការបច្ចេកទេស ចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និង បញ្ជីឈ្មោះម្ចាស់ដី, ទី៣.ការបិទផ្សាយជាសាធារណៈនូវឯកសារនៃការវិនិច្ឆ័យ មានរយៈពេល១៥ថ្ងៃ ដើម្បីទុកលទ្ធភាពឱ្យម្ចាស់ដី និង អ្នកដែលពាក់ព័ន្ធ ធ្វើការផ្ទៀងផ្ទាត់ឈ្មោះ ស្ថានភាពគ្រួសារ និង ក្បាលដីរបស់ខ្លួនព្រមទាំងធ្វើការតវ៉ាក្នុងករណីមានការខុសឆ្គង, ទី៤.ការសម្រេចលើឯកសារវិនិច្ឆ័យ ធ្វើរបាយការណ៍ពីលទ្ធផលនៃការបិទផ្សាយជាសាធារណៈនូវឯកសារនៃការវិនិច្ឆ័យដើម្បីពិនិត្យ និងសម្រេច លើការផ្តល់សិទ្ធិចំពោះក្បាលដីណា ដែលមិនមានទំនាស់ ឬ មិនពាក់ព័ន្ធនឹងដីរដ្ឋ និងទី៥,ជាដំណាក់កាលចេញវិញ្ញាបនបត្រនិងប្រគល់ជូន ម្ចាស់ដី ។
លោក ធិននី វិធូរ អភិបាលស្រុកវ៉ារិន បានមានប្រសាសន៍ជំរុញនិង ណែនាំដល់ប្រជាពលរដ្ឋដែលមានដីនៅក្នុងឃុំវ៉ារិន ទាំង០៥ភូមិ រួមមានភូមិនេល ភូមិរំដួល ភូមិគោកភ្នំ ភូមិវ៉ារិន និងភូមិគោកស្រុកត្រូវចូលរួមសហការជាមួយក្រុមការងារវាស់វែង និងចង្អុលបង្ហាញទីតាំងក្បាលដី ព្រំដី និងបោះបង្គោលច្បាស់លាស់ និងមានការឯកភាពគ្នា ចៀសវាងមានជម្លោះ ដើម្បីទទួលមកវិញនូវវិញ្ញាបនបត្រសម្គាល់ម្ចាស់អចលនវត្ថុទាំងអស់គ្នា។
លោកអភិបាលស្រុកបញ្ជាក់ថា៖ដីរបស់បងប្អូនពលរដ្ឋដែលបានចុះបញ្ជីដីធ្លីមានលក្ខណៈជាប្រព័ន្ធនេះគឺទទួលបានអត្ថប្រយោជន៍ច្រើនណាស់ក្នុង ការលើកស្ទួយកម្រិតជីវភាពគ្រួសារ កាត់បន្ថយទំនាស់ដីធ្លី ធានាសុវត្ថិភាពក្នុងការកាន់កាប់ដីធ្លី ទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដដែលត្រូវបានការពារដោយច្បាប់ និងធានាដោយរដ្ឋ ដែលអាចបង្កបង្កើនផល និងប្រកបរបរផ្សេងៗលើដីរបស់ខ្លួនដោយគ្មានការព្រួយបារម្ភឡើយ៕
អត្ថបទ និងរូបភាព៖ លោក ធន់ ពូថេ, អោត រត់
កែសម្រួល៖ លោក អ៊ុន ណារាជ្យ
