នៅព្រឹកថ្ងៃទី១០ ខែកុម្ភៈ ឆ្នាំ២០២៥នេះ អង្គភាពអ្នកនាំពាក្យរាជរដ្ឋាភិបាល បានសហការជាមួយរដ្ឋបាលខេត្តសៀមរាប បើកវគ្គបណ្តុះបណ្តាលស្តីពី “ប្រសិទ្ធភាពនៃការងារព័ត៌មាន និងនាំពាក្យ” ដល់មន្ត្រី និងអ្នកនាំពាក្យនៃរដ្ឋបាលខេត្តសៀមរាប ក្រោមអធិបតីភាព ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល ដោយមានការចូលរួមពី លោក សុខ ថុល អភិបាលរងខេត្តសៀមរាប ថ្នាក់ដឹកនាំមន្ទីរអង្គភាព មន្ត្រីទទួលបន្ទុកព័ត៌មាន និងអ្នកនាំពាក្យថ្នាក់ខេត្ត អាជ្ញាធរក្រុងស្រុក និងឃុំសង្កាត់ទូទាំងខេត្ត។
លោក សុខ ថុល មានប្រសាសន៍ថា វគ្គបណ្តុះបណ្តាលនេះ គឺដើម្បីជួយពង្រឹង និងលើកកម្ពស់នូវប្រសិទ្ធភាពនៃការប្រមូល និងការផ្ដល់ព័ត៌មានរបស់រដ្ឋបាលខេត្ត មន្ទីរអង្គភាព រដ្ឋបាលក្រុងស្រុក និងឃុំសង្កាត់ ជូនដល់ប្រជាពលរដ្ឋ និងសាធារណៈមតិឱ្យមានភាពល្អប្រសើរឡើង។ តាមរយៈវគ្គបណ្តុះបណ្តាលនេះ នឹងផ្តល់ជាធាតុចូលដល់គ្រប់អ្នកពាក់ព័ន្ធ បានយល់ដឹងអំពីតួនាទីភារកិច្ច វិធីសាស្ត្រឆ្លើយតបជាមួយអ្នកសារព័ត៌មាន ការផ្សព្វផ្សាយព័ត៌មាន ជាពិសេសនឹងក្លាយខ្លួនជាអ្នកនាំពាក្យប្រចាំអង្គភាព ដែលពោពេញដោយគុណវុឌ្ឍិ វិជ្ជាជីវៈ គុណភាព ប្រសិទ្ធភាព និងគុណធម៌ សម្រាប់បម្រើដល់ឧត្តមប្រយោជន៍ជូនសង្គម និងជាចំណែកនៃការចូលរួមអភិវឌ្ឍសង្គមជាតិឱ្យសម្រេចគោលដៅរបស់រាជរដ្ឋាភិបាលកម្ពុជា។
ឯកឧត្តម ប៉ែន បូណា មានប្រសាសន៍ថា សមិទ្ធផលដ៏ធំធេងរបស់រាជរដ្ឋាភិបាល ប្រៀបបាននឹងពន្លឺព្រះអាទិត្យបំភ្លឺភពដែនដីដែលគ្មានអ្នកណាអាចយកបាតដៃទៅបិទបាំងបានឡើយ ជាពិសេសរយៈពេល៤៦ឆ្នាំ ក្រោយចេញពីរបប ប៉ុល ពត ប្រមុខរាជរដ្ឋាភិបាល បានកសាងសមិទ្ធផលយ៉ាងធំធេងសម្រាប់ប្រទេសជាតិ និងប្រជាពលរដ្ឋកម្ពុជា ជាពិសេសការអភិវឌ្ឍមានសន្ទុះខ្លាំងក្លាចាប់តាំងពីកម្ពុជាមានសុខសន្តិភាពពេញលេញរយៈពេល២៦ឆ្នាំចុងក្រោយ ដែលគ្មានអ្នកណាអាចបំភ្លៃបានឡើយ ដូចពាក្យចាស់បុរាណពោលថា គ្មានអ្នកណាអាចយកបាតដៃទៅបិទបាំងព្រះអាទិត្យបានឡើយ ពោលគឺ ក្រុមប្រឆាំងជ្រុលនិយមមួយក្តាប់តូចអាចត្រឹមយកបាតដៃទៅបាំងភ្នែកខ្លួនឯងកុំឱ្យឃើញពន្លឺព្រះអាទិត្យបាន ប៉ុន្តែមិនអាចបាំងភ្នែករបស់ប្រជាពលរដ្ឋខ្មែរ និងសហគមន៍អន្តរជាតិបានដែរ។ ជាក់ស្តែង អង្គការសហប្រជាជាតិបានទទួលស្គាល់ការរីកចម្រើនយ៉ាងឆាប់រហ័សរបស់កម្ពុជា និងបានសម្រេចឱ្យកម្ពុជាត្រៀមខ្លួនចាកចេញពីប្រទេសដែលមានការអភិវឌ្ឍតិចតួចក្នុងពេលឆាប់ៗខាងមុខនេះ។
ឯកឧត្តម មានប្រសាសន៍បន្ថែមថា ប្រជាពលរដ្ឋយើងអាចងាយជឿលើព័ត៌មានក្លែងក្លាយ ព័ត៌មានបំផ្លើសបំភ្លៃ ប្រសិនបើយើងមិនបានធ្វើការងារបុរេសកម្មដើម្បីផ្សព្វផ្សាយឱ្យពួកគាត់បានយល់ដឹងច្បាស់អំពីសមិទ្ធផលទាំងឡាយដែលរាជរដ្ឋាភិបាលបានសាងឡើងសម្រាប់ជាផលប្រយោជន៍របស់ពួកគាត់។ ដូច្នេះស្នើឱ្យក្រុមការងារទទួលបន្ទុកព័ត៌មាន អ្នកនាំពាក្យ និងមន្ត្រីអាជ្ញាធរពាក់ព័ន្ធទាំងអស់ ធ្វើការងារបុរេសកម្មឱ្យបានខ្លាំងក្លា ដើម្បីបញ្ជ្រាបសមិទ្ធផលដ៏ធំធេងទាំងនេះដល់ប្រជាពលរដ្ឋ ហើយរួមគ្នាសម្លឹងឆ្ពោះទៅចក្ខុវិស័យកម្ពុជាឆ្នាំ២០៥០ ក្លាយជាប្រទេសដែលមានចំណូលខ្ពស់ប្រកបដោយមោទនភាព៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
