អ្នករត់រ៉ឺម៉កម៉ូតូនៅតាមចំណតរថយន្ត ក្នុងក្រុងសៀមរាប បានត្អូញត្អែរថា ដោយសារតែរថយន្តរបស់ក្រុមហ៊ុនដឹកអ្នកដំណើរមួយចំនួនធំ មិនព្រមចូលចំណតដែលអាជ្ញាធរខេត្តបានរៀបចំនោះ បានធ្វើឲ្យពួកគាត់ជួបប្រទះបញ្ហាលំបាកខ្លាំងក្នុងមុខរបរមួយនេះ។
លោក ឆាយ ប៊ុនឆេង អ្នករត់កង់បីម្នាក់នៅខេត្តសៀមរាបបានលើកឡើងថា បច្ចុប្បន្ននេះលោកឃើញថា កន្លងមកអាជ្ញាធរខេត្តសៀមរាប បានរៀបចំឱ្យមានចំណតរថយន្តចំនួនពីរ គឺនៅផ្នែកខាងកើតមួយកន្លែង និងនៅផ្នែកលិចមួយកន្លែង ដោយនៅផ្នែកខាងកើត អាជ្ញាធរបានរៀបចំនៅក្នុងបុរីសៀងណាំ សង្កាត់ជ្រាវ និងផ្នែកខាងលិច មានទីតាំងនៅតាមផ្លូវវៀងក្រុង ក្នុងសង្កាត់ស្រង៉ែ។ ប៉ុន្តែចំណតរថយន្តទាំងពីរនេះមិនសូវឃើញរថយន្តដឹកអ្នកដំណើរ ឬរថយន្តដឹកភ្ញៀវទេសចរធំៗចូលចត និងដាក់ភ្ញៀវនៅក្នុងចំណតទាំងនេះទេ ហើយភាគច្រើនរថយន្តដឹកអ្នកទេសចរធំៗទាំងនោះ បានបើកដឹកភ្ញៀវចូលទៅដល់សណ្ឋាគារផ្ទាល់ៗតែម្តង ដោយបានធ្វើឱ្យមានការកស្ទះចរាចរណ៍នៅក្នុងក្រុងផង និងធ្វើឱ្យពួកគាត់ដែលជាអ្នករត់កង់បី នៅចាំដឹកភ្ញៀវនៅក្នុងចំណតអត់មានភ្ញៀវដឹក ធ្វើពួកគាត់បានបង់ប្រាក់ចំណូល។
លោក ឆាយ ប៊ុនឆេង បានស្នើឱ្យអាជ្ញាធរជួយរៀបចំឱ្យរថយន្តដឹកភ្ញៀវទេសចរធំៗចូលដាក់ភ្ញៀនៅក្នុងចំណត ដើម្បីកាត់បន្ថយការស្ទះចរាចរណ៍ក្នុងក្រុងផង និងឱ្យពួកគាត់បានដឹក និងទទួលបានកំរៃសម្រាប់ផ្គត់ផ្គង់ជីវភាពគ្រួសារប្រចាំថ្ងៃផង ។
លោក លី សំរិទ្ធ អ្នកនាំពាក្យ និងជាអភិបាលរងខេត្តសៀមរាបបានឱ្យដឹងនៅព្រឹកថ្ងៃទី៧ ខែមិថុនា ឆ្នាំ២០១៩នេះថា ជាពិតណាស់អាជ្ញាធរខេត្ត បានរៀបចំឱ្យមានចំណតរថយន្តចំនួនពីរកន្លែងរួចហើយ ដើម្បីសម្រាប់ឱ្យរថយន្តដឹកអ្នកទេសចរ ដឹកទំនិញធំៗគ្រប់ប្រភេទចូលចត ក្នុងគោលដៅធ្វើឱ្យសណ្តាប់ធ្នាប់នៅក្នុងក្រុងសៀមរាបឱ្យមានរបៀបរៀបរយល្អ។ ប៉ុន្តែលោកទទួលស្គាល់ថា នៅមានរថយន្តដឹកភ្ញៀវទេសចរធំៗមួយចំនួន នៅមិនទាន់បានចូលចតនៅក្នុងចំណតដែលអាជ្ញាធរបានរៀបចំឱ្យបានល្អនៅឡើយទេ ហើយបញ្ហានេះអាជ្ញាធរកំពុងតែធ្វើការណែនាំពួកគាត់ជាបន្តបន្ទាប់ហើយ។
លោកលី សំរិទ្ធ បញ្ជាក់ថា នៅពេលអាជ្ញាធរណែនាំអប់រំដល់អ្នកបើកបរ និងបណ្តាម្ចាស់ក្រុមហ៊ុនរថយន្តដឹកភ្ញៀវទេសចរធំៗឱ្យបានដឹងអស់ហើយនោះ អាជ្ញាធរនឹងចាត់វិធានការផ្លូវច្បាប់តឹងរឹងចំពោះពួកគាត់ ក្នុងករណីពួកគាត់មិនចូលចតនៅក្នុងចំណតដែលអាជ្ញាធរបានរៀបចំឱ្យ៕
អត្ថបទ និង រូបភាព ៖ជា ស្រស់, ខេង ឧត្តម
កែសម្រួល ៖ អ៊ុន ណារាជ្យ
