អាគារសិក្សា១ខ្នង កម្ពស់៣ជាន់ មាន១២បន្ទប់ ក្នុងអនុវិទ្យាល័យក្របីរៀល សង្កាត់ក្របីរៀល ក្រុងសៀមរាប ជាអំណោយរបស់សប្បុរសជនក្រៅ និងក្នុងប្រទេស ត្រូវបានសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២៨ ខែកុម្ភៈ ឆ្នាំ២០២៥នេះ ក្រោមវត្តមាន ឯកឧត្ដម ភូ សំអាត សមាជិកក្រុមប្រឹក្សាខេត្តសៀមរាប និង លោក ឆង់ គឹមឆង់ ប្រធានតំបន់សមាគមឡាយអិនក្លិប ដោយមានការចូលរួមពីអ្នកពាក់ព័ន្ធជាច្រើនរូបទៀត។
លោក សេក សិត នាយកអនុវិទ្យាល័យក្របីរៀល បានឱ្យដឹងថា អគារសិក្សានេះសាងសង់ឡើងតាមស្តង់ដារ បទដ្ឋានបច្ចេកទេសត្រឹមត្រូវ មានប្រព័ន្ធទឹក ភ្លើង បង្គន់អនាម័យគ្រប់ជាន់ កង្ហារគ្រប់បន្ទប់ ដំបូលប្រក់ក្បឿង និងការពារកម្ដៅដោយស្នោតាន់ និងពិដានខាងក្រោម ជាជំនួយរបស់សមាគមឡាយអិនក្លឹប (Lion Club) សាធារណរដ្ឋកូរ៉េ និងប្រជាពលរដ្ឋក្នុងសង្កាត់ក្របីរៀល និងសប្បុរសជននានា។
ព័ត៌មានជាតិ ថ្មីៗ
លោក ឆង់ គឹមឆង់ ប្រធានតំបន់សមាគមឡាយអិនក្លិប បានបញ្ជាក់ថា ចំណងមិត្តភាពដ៏រឹងមាំរបស់កូរ៉េ-កម្ពុជា មានទំនាក់ទំនងគ្នាជាង៧០ឆ្នាំមកហើយ។ ចំពោះការផ្ដល់អាគារសិក្សានេះ គឺដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់វិស័យអប់រំនៅកម្ពុជា។ ជាមួយនេះលោកនឹងបន្តជួយជំរុញកិច្ចសហការជាមួយសាលាឱ្យមានការអភិវឌ្ឍបន្តទៀត ដើម្បីឱ្យសាលាមួយនេះ ក្លាយជាសាលាគំរូក្នុងសហគមន៍ ក៏ដូចជាលើកទឹកចិត្ដឱ្យកុមារចង់ទៅសាលារៀន ព្រោះកុមារនេះហើយជាទំពាំងស្នងឬស្សី ជាសសរទ្រូងនៃប្រទេសជាតិ។
ឯកឧត្ដម ភូ សំអាត សមាជិកក្រុមប្រឹក្សាខេត្ត មានប្រសាសន៍ថា សកម្មភាពរបស់សមាគមឡាយក្លឹប បានចូលរួមយ៉ាងសំខាន់ជាមួយរាជរដ្ឋាភិបាលកម្ពុជា ក៏ដូចជាអាជ្ញាធរខេត្តសៀមរាប ក្នុងការអភិវឌ្ឍធនធានមនុស្ស ដើម្បីឆ្ពោះទៅសម្រេចបាននូវគន្លឹះជាអាទិភាពទាំង៥ ក្នុងយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧ គឺមនុស្ស ផ្លូវ ទឹក ភ្លើង និងបច្ចេកវិទ្យាព័ត៌មាន សំដៅឱ្យប្រទេសក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់ឆ្នាំ២០៥០។ ឯកឧត្ដម បានជំរុញដល់លោកគ្រូអ្នកគ្រូ សិស្សានុសិស្ស ក្រោយទទួលបានអាគារសិក្សា១ខ្នងនេះ ត្រូវចូលរួមថែរក្សាសមិទ្ធផល់ទាំងនេះឱ្យបានគង់វង្ស យូរអង្វែង និងរៀបចំបរិស្ថានឱ្យបានស្អាត ដើម្បីឱ្យសិស្សានុសិស្សអាចសិក្សាប្រកបដោយផាសុខភាព៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
