នៅព្រឹកថ្ងៃទី០៣ ខែមីនា ឆ្នាំ២០២៥នេះ យោធិនពលី ពិការ មរណៈ និងសោធននិវត្តន៍ ដែលជាអតីតមន្ត្រី បុគ្គលិក នៃមជ្ឈមណ្ឌលសកម្មភាពកំចាត់មីនកម្ពុជាជាង៣០០នាក់ ត្រូវបានអង្គភាពស៊ីម៉ាក់រៀបចំបើករបបឧបត្ថម្ភប្រាក់អតីតភាពបម្រើការងារដែលបានដាក់ឲ្យចូលនិវត្តន៍កាលពីឆ្នាំ២០២២កន្លងទៅ ដើម្បីលើកទឹកចិត្ដ និងឱ្យពួកគាត់យកទៅផ្គត់ផ្គង់ជីវភាព ពិធីនេះ រៀបចំឡើងនៅសារមន្ទីរតេជោសន្ដិភាព ស្ថិតនៅឃុំត្រពាំងធំ ស្រុកប្រាសាទបាគង ខេត្ដសៀមរាប ។
ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានមានប្រសាសន៍ផ្តាំផ្ញើ ដល់មន្រ្តីចូលនិវត្តន៍ដែលទទួលបានរបបប្រាក់ឧបត្ថម្ភអតីតភាពបម្រើការងារនាឱកាសនេះ សូមប្រើប្រាស់ថវិកាឱ្យត្រូវគោលដៅ និងបង្កើតមុខរបរសមរម្យណាមួយ ដើម្បីបន្តផ្គត់ផ្គង់ជីវភាពគ្រួសាររស់នៅក្នុងសង្គមប្រកបដោយសេចក្តីថ្លៃថ្នូរក្រោយពីបញ្ចប់បេសកកម្មជាមួយអង្គភាព។
ឯកឧត្ដមបន្ដថា ការឧបត្ថម្ភប្រាក់អតីតភាពការងារនេះ គឺដោយមានការយកកចិត្ដទុកដាក់ពីប្រមុខថ្នាក់ដឹកនាំរាជរដ្ឋាភិបាល ដែលដឹងគុណបំណាច់របស់យោធិន ដែលបានខិតខំបំរើបជាតិមាតុភូមិនាពេលកន្លងមក។ ក្នុងដំណាក់កាលទី១នេះ អនុគណៈកម្មការបើកប្រាក់ឧបត្ថម្ភគោលនយោបាយក្រសួងការពារជាតិបើកជូនរបបប្រាក់ឧបត្ថម្ភនេះជូនយោធិនសោធននិវត្តន៍បានចំនួនមួយលើករួចមកហើយមានចំនួន៤៧នាក់កាលពីថ្ងៃទី៧ ខែកុម្ភៈ ឆ្នាំ២០២៥ នៅទីបញ្ជាការកណ្តាលភ្នំពេញ ដោយឡែកសម្រាប់វគ្គទី២នៅថ្ងៃនេះមានចំនួន៣០៦បន្ថែមទៀត លើចំនួនសរុប ៣៥៣នាក់សម្រាប់វគ្គទី៥។
នៅក្នុងពិធីនេះដែរ ឯកឧត្តម នាយឧត្ដមសេនីយ៍ ភួង ស៊ីផាន រដ្ឋលេខាធិការក្រសួងការពារជាតិ និងជាប្រធានគណៈកម្មាធិការបញ្ចូលក្របខ័ណ្ឌ និងប្រគល់ឋានន្ដរស័កកងយោធពលខេមរភូមិន្ទបានកោតសរសើរមន្រ្តីអង្គភាពស៊ីម៉ាក់ដែលបានពុះពារលះបង់កម្លាំងកាយចិត្តក្នុងការបោសសម្អាតមីន និងរំដោះផ្ទៃដីជូនប្រជាពលរដ្ឋ និងបានស្ងើចសរសើរដល់ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ ដែលបានឈ្មូសឈ្មុលក្នុងការរៀបចំដាក់បញ្ចូលមន្រ្តីស៊ីម៉ាកចូលនិវត្តន៍ ដើម្បីទទួលបានរបបប្រាក់ឧបត្ថម្ភអតីតភាពបម្រើការងារនាឱកាសនេះ។
ក្រោយពីបញ្ចប់កម្មវិធីសំណេះសំណាលក្នុងពិធីរួចមក ឯកឧត្តម នាយឧត្ដមសេនីយ៍ ភួង ស៊ីផាន និងថ្នាក់ដឹកនាំក្រុមការងារក្រសួងការពារជាតិ អមដំណើរដោយឯកឧត្តមប្រតិភូ ហេង រតនា បានអញ្ជើញទស្សនាការដាក់តាំងបង្ហាញសមិទ្ធផលនៃអគារស៊ីម៉ាក់នៅក្នុងសារមន្ទីរតេជោសន្តិភាព ។
អត្ថបទ៖លោក ឈិត សាវី
កែសម្រួល៖លោកស្រី សូ ស៊ីមាន
