មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ បានបង្ហាញថា រយៈពេលដប់ឆ្នាំកន្លងមកនេះ យើងបានឃើញនូវវឌ្ឍនភាពជាច្រើនដែលសេដ្ឋកិច្ចរបស់យើងត្រូវបានធ្វើពិពិធកម្ម ដែលនាំទៅដល់ការបង្កើតការងារជាច្រើននៅក្នុងវិស័យឧស្សាហកម្ម ប៉ុន្តែទោះជាយ៉ាងណាអត្រាភាពគ្មានការងារធ្វើរបស់ប្រជាពលរដ្ឋក៏មានការថយចុះមកត្រឹមតែ ០.២៤ភាគរយប៉ុណ្ណោះ គិតត្រឹមឆ្នាំ២០២៣។
ក្នុងសិក្ខាសាលាពិគ្រោះយោបល់ ស្ដីពីការវាយតម្លៃលើការអនុវត្តគោលនយោបាយជាតិ ស្ដីពីមុខរបរ និងការងារ ឆ្នាំ២០១៥-២០២៥ នៅខេត្តសៀមរាប នាថ្ងៃទី០៦ ខែមីនា ឆ្នាំ២០២៥នេះ ឯកឧត្ដម សោម ចំណាន រដ្ឋលេខាធិការសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា សិក្ខាសាលានេះជាវេទិកាមួយ ដើម្បីវាយតម្លៃសមិទ្ធផល នឹងធ្វើការវិភាគដ៏ស៊ីជម្រៅ ចែករំលែកទិន្នន័យជាក់ស្តែង និងចូលរួមក្នុងការពិភាក្សា ដើម្បីស្វែងយល់ពីផលប៉ះពាល់ជាក់ស្តែង នៃការអនុវត្តគោលនយោបាយយសេដ្ឋកិច្ចថ្មី (NEP) នៅក្នុងមួយទស្សវត្សកន្លងមក។ ការវាយតម្លៃនេះមិនមែនគ្រាន់តែជាលំហាត់សិក្សាទេ វាគឺជាជំហានដ៏សំខាន់មួយក្នុងការតាក់តែងគោលនយោបាយ NEP ២០២៦-២០២៣០ ដើម្បីធានាបានថាគោលនយោបាយថ្មីនេះ នឹងកាន់តែឆ្លើយតបទៅនឹងតម្រូវការរបស់ប្រជាពលរដ្ឋ និងគោលដៅអភិវឌ្ឍន៍ប្រកបដោយចិរភាព និងបរិយាបន្នរបស់រាជរដ្ឋាភិបាលកម្ពុជា។
ឯកឧត្ដមបន្ថែមថា រាជរដ្ឋាភិបាលបានដាក់ចេញនូវគោលនយោបាយ NEP សំដៅបង្កើនឱកាសការងារសមរម្យជូនដល់ប្រជាពលរដ្ឋកម្ពុជា និងលើកកម្ពស់ផលិតភាពការងារ ជំរុញការអភិវឌ្ឍជំនាញនិងធនធានមនុស្ស ព្រមទាំងពង្រឹងអភិបាលកិច្ចទីផ្សារការងារ ដើម្បីឆ្លើយតបទៅនឹងតម្រូវការនៃការអភិវឌ្ឍសេដ្ឋកិច្ច-សង្គម និងការផ្លាស់ប្តូរនៃនិម្មាបនកម្មសេដ្ឋកិច្ចទាំងក្នុងប្រទេស តំបន់ និងសកលលោក។ គោលនយោបាយ NEP មានចក្ខុវិស័យលើកតម្កើងជីវភាព ភាពថ្លៃថ្នូររបស់ប្រជាពលរដ្ឋ ភាពសុខដុមរមនាសង្គម តាមរយៈការបង្កើតឱកាសការងារសមរម្យ និងមានផលិតភាពការងារខ្ពស់ជូនប្រជាពលរដ្ឋកម្ពុជាគ្រប់រូបប្រកបដោយសមធម៌។
លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា ស្ថិតក្នុងបរិការណ៍សន្តិភាពពេញលេញ ឯកភាពជាតិ និងស្ថិរភាព នយោបាយ សេដ្ឋកិច្ចដែលកម្ពុជាកំពុងបន្តទទួលបាននូវភាពរីកចម្រើនលើគ្រប់វិស័យ និងបានឈានដល់ដំណាក់កាលនៃការ ប្រែប្រួលរចនាសម្ព័ន្ធសេដ្ឋកិច្ច ពីប្រទេសដែលពឹងផ្អែកលើវិស័យកសិកម្មទៅជាប្រទេស ដែលពឹងផ្អែកលើវិស័យឧស្សាហកម្ម ព្រមទាំងកំពុងឈានទៅសម្រេចក្លាយជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ខាងមុខ តាមគោលដៅដែលបានដាក់ចេញប្រកបដោយចីរភាព ខណៈពេលបច្ចុប្បន្នកម្ពុជាមានកំណើនសេដ្ឋកិច្ចគួរឱ្យកត់សម្គាល់។
លោកថា រាជរដ្ឋាភិបាល បាននឹងកំពុងជំរុញការបណ្តុះបណ្តាលជំនាញវិជ្ជាជីវៈ និងកម្មវិធីការងារសមរម្យជូនពលករ ដែលបានផ្តល់ភាគលាភខ្ពស់ ដល់កំណើនសេដ្ឋកិច្ចតាមរយៈការធានាបាននូវការងារសមរម្យ ដែលអាចធ្វើឱ្យ ប្រសើរឡើងនូវជីវភាព សេចក្តីថ្លៃថ្នូរ និងសុខដុមរមនាក្នុងសង្គម។ បន្ថែមពីនោះ រាជរដ្ឋាភិបាលកម្ពុជាបានខិតខំប្រឹង ប្រែងគ្រប់បែបយ៉ាងដើម្បីធានាសន្តិសុខ សុវត្ថិភាព និងស្ថិរភាពសង្គមឱ្យបានល្អប្រសើរ សម្រាប់ជាកត្តាដ៏ចាំបាច់ក្នុងការអភិវឌ្ឍប្រទេសជាតិរួមទាំងវិស័យសេដ្ឋកិច្ច និងពាណិជ្ជកម្មផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
