នៅព្រឹកថ្ងៃទី១០ ខែមីនា ឆ្នាំ២០២៥នេះ ក្រសួងបរិស្ថាន បានរៀបចំសិក្ខាសាលាផ្សព្វផ្សាយគោលនយោបាយ និងយុទ្ធសាស្រ្តពាក់ព័ន្ធវិស័យបរិស្ថានថ្នាក់ក្រោមជាតិ ជូនដល់មន្ត្រីរាជការ មន្ត្រីអនុវត្តច្បាប់ និងអាជ្ញាធរដែនដីពាក់ព័ន្ធក្នុងខេត្តសៀមរាប សម្រាប់នាំយកនូវព័ត៌មានគោលនយោបាយ លិខិតបទដ្ឋានគតិយុត្ត និងសកម្មភាពអាទិភាពថ្មីៗ ដែលជាការឆ្លើយតបទៅនឹងអាណត្តិការងាររបស់រាជរដ្ឋាភិបាលនីតិកាលទី៧ និងយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ព្រមទាំងដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ជាពិសេសបញ្ចកោណទី៤ “ការអភិវឌ្ឍប្រកបដោយភាពធន ចីរភាព និងបរិយាប័ន្ន”។
លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា សិក្ខាសាលានាថ្ងៃនេះ ពិតជាមានសារៈសំខាន់ណាស់ ក្នុងការកសាងសមត្ថភាព និងផ្សព្វផ្សាយគោលនយោបាយរបស់រាជរដ្ឋាភិបាលកម្ពុជា ជាពិសេសវិស័យបរិស្ថាន ដែលត្រូវបានកំណត់អាទិភាពនៅក្នុងបញ្ចកោណទី៤ គឺការអភិវឌ្ឍប្រកបដោយភាពធន់ ចីរភាព និងបរិយាបន្ន និងមុំទី២ ផ្តោតលើការគ្រប់គ្រងធនធានធម្មជាតិ បេតិកភណ្ឌវប្បធម៌ និងទេសចរណ៍។ ដើម្បីធ្វើការការពារ អភិរក្ស និងគ្រប់គ្រងធនធានធម្មជាតិ គ្រប់គ្រងវិស័យបរិស្ថានការកែលម្អសោភ័ណ្ឌភាព លើកកម្ពស់គុណភាពបរិស្ថាន គឺតម្រូវឱ្យមានការចូលរួមចំណែកពីគ្រប់ភាគីពាក់ព័ន្ធទាំងអស់ ទើបអាចសម្រេចតាមផែនការ និងគោលដៅជាយុទ្ធសាស្ត្ររបស់រាជរដ្ឋាភិបាល ដែលតែងយកចិត្តទុកដាក់ និងគិតគូរដល់ការការពារ និងអភិរក្សធនធានធម្មជាតិ ដើម្បីជាឧត្តមប្រយោជន៍ដល់កូនចៅជំនាន់ក្រោយរបស់យើងទាំងអស់គ្នា។
ព័ត៌មានជាតិ ថ្មីៗ
ឯកឧត្តម កូប រ៉លី អនុរដ្ឋលេខាធិការក្រសួងបរិស្ថាន មានប្រសាសន៍ដែរថា តាមរយៈសិក្ខាសាលានេះ គឺជាយន្តការមួយក្នុងការផ្ទេរព័ត៌មាន និងចំណេះដឹងពីថ្នាក់ជាតិមកថ្នាក់ក្រោមជាតិ ក្នុងគោលបំណងលើកកម្ពស់ចំណេះដឹង ការកសាងសមត្ថភាពបន្ថែមជាដើម ហើយម្យ៉ាងវិញទៀត នៅពេលដែលយើងមានមូលធនមនុស្សរបស់យើងនៅមូលដ្ឋាននោះយើងអាចមានសមត្ថភាពអនុវត្តគោលនយោបាយដែលថ្នាក់ជាតិបានដាក់ចេញ និងជំរុញសន្ទុះ នៃការអភិវឌ្ឍសេដ្ឋកិច្ចជាតិដែលជាការរួមចំណែកជាមួយរាជរដ្ឋាភិបាលរបស់យើងក្នុងការ សម្រេចឱ្យបាននៅគោលដៅអភិវឌ្ឍប្រកបដោយចីរភាពកម្ពុជា និងយុទ្ធសាស្ត្របញ្ចកោណដំណាក់កាលទី១ ជាពិសេសយុទ្ធសាស្ត្រ ចក្រាវិស័យបរិស្ថាន២០២៤ ដល់២០២៨ ដែលក្រសួងបរិស្ថានបានប្រកាសដាក់ឱ្យប្រើប្រាស់កន្លងទៅ។
ឯកឧត្តម បញ្ជាក់ថា សិក្ខាសាលានាថ្ងៃនេះ គឺមានគោលបំណងចែករំលែកវឌ្ឍនភាព និងសមិទ្ធផលសំខាន់ៗ ហើយយើងក៏អាចរៀនសូត្រពីគ្នាតាមរយៈនៃការចែករំលែកបទពិសោធពីគ្នាទៅវិញទៅមក ហើយគោលដៅជាយុទ្ធសាស្ត្រ គឺសម្រេចឱ្យបាននូវភាពស្អាត ភាពបៃតង និងចីរភាព ក្នុងគោលដៅប្រែក្លាយសក្តានុពលវិស័យបរិស្ថានឱ្យទៅជាឧត្តមប្រយោជន៍ បម្រើជូនប្រជាជាតិកម្ពុជាគ្រប់ជំនាន់ និងលើកតម្កើងកិត្យានុភាព ប្រទេសកម្ពុជាលើឆាកអន្តរជាតិផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
