មន្ត្រីជាន់ខ្ពស់ក្រសួងកិច្ចការនារី បានបង្ហាញថា គ្រប់អាណត្តិទាំងអស់ រាជរដ្ឋាភិបាលកម្ពុជា បានយកចិត្តទុកដាក់ខ្ពស់ ជាពិសេសបន្តជំរុញ និងលើកកម្ពស់បន្ថែមទៀតដល់តួនាទីរបស់ស្ត្រីនៅក្នុងសង្គមជាតិ និងផ្តល់តម្លៃខ្ពស់ ដល់តួនាទីស្ត្រី ក្នុងការចូលរួមអភិវឌ្ឍសេដ្ឋកិច្ច និងសង្គម។
នេះបើតាមការលើកឡើងរបស់ លោកជំទាវ ស៊ីវណ្ណ បុទុម រដ្ឋលេខាធិការក្រសួងកិច្ចការនារី ក្នុងវគ្គបណ្តុះបណ្តាលស្តីពីការរៀបចំ និងជំរុញការអនុវត្តកម្មវិធីអភិវឌ្ឍសមត្ថភាពធន់ និងបញ្ជាបយេនឌ័រក្នុង ការប្រែប្រួលអាកាសធាតុ ការអភិវឌ្ឍបៃតង នៅខេត្តសៀមរាប នាថ្ងៃទី១០ ខែមីនា ឆ្នាំ២០២៥នេះ។
លោកជំទាវ ស៊ីវណ្ណ បុទុម មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចធិបតី ហ៊ុន ម៉ាណែត បាននឹងបន្តជំរុញ និងលើកកម្ពស់បន្ថែមទៀត ដល់តួនាទីរបស់ស្ត្រីនៅក្នុងសង្គមជាតិ និងផ្តល់តម្លៃខ្ពស់ដល់តួនាទីស្ត្រី ក្នុងការចូលរួមអភិវឌ្ឍសេដ្ឋកិច្ច និងសង្គម។ ក្នុងនោះរាជរដ្ឋាភិបាលកម្ពុជា បានកំណត់សមភាពយេនឌ័រ និងការបង្កើនភាពអង់អាចដល់ស្ត្រី និងក្មេងស្រីនៅគ្រប់វិស័យ ជារបៀបវារៈអាទិភាពនៅក្នុងយុទ្ធសាស្ត្របញ្ចកោណ ដំណាក់កាលទី១។
ព័ត៌មានជាតិ ថ្មីៗ
លោកជំទាវ មានប្រសាសន៍ទៀតថា ស្របតាមគោលនយោបាយនេះ ក្រសួងកិច្ចការនារី តាមរយៈផែនការយុទ្ធសាស្ត្រនារីរតនៈទី៦ ឆ្នាំ២០២៤-២០២៨ គឺ “ស្ត្រី និងការប្រែប្រួលអាកាសធាតុ” បានផ្តោតលើអាទិភាព ៣សំខាន់ៗ រួមមាន៖១.ចូលរួមលើកកម្ពស់បរិយាកាសគាំទ្រផ្នែកគោលនយោបាយ ដល់ការឆ្លើយតប និងវិនិយោគ លើការលើកកម្ពស់ស្ថានភាពនិងតួនាទីស្ត្រី ក្នុងរបៀបវារៈពាក់ព័ន្ធនឹងការប្រែប្រួលអាកាសធាតុ អភិវឌ្ឍបៃតង ការគ្រប់គ្រងហានិភ័យគ្រោះមហន្តរាយ។ ២.ការគាំទ្រនិងលើកកម្ពស់សមត្ថភាព និងឯកទេសរបស់ក្រសួង ស្ថាប័ន និងដៃគូពាក់ព័ន្ធ ក្នុង របៀបវារៈខាងលើនេះ។ ៣.ការពង្រីកការយល់ដឹង និងការគាំទ្រជាសាធារណៈ លើការលើកកម្ពស់ និងឆ្លើយតបនឹង ស្ថានភាពស្ត្រី និងក្រុមជនងាយគ្រោះ ពីការប្រែប្រួលអាកាសធាតុ អភិវឌ្ឍបៃតង ការគ្រប់គ្រងហានិភ័យ គ្រោះមហន្តរាយ។
លោកជំទាវរដ្ឋលេខាធិការ មានប្រសាសន៍បន្ថែមថា ផែនការយុទ្ធសាស្ត្រជាតិ ស្តីពីការអភិវឌ្ឍបៃតងសេដ្ឋកិច្ចបៃតង ឆ្នាំ២០២៣-២០៣០ បានផ្តោតលើការ អភិវឌ្ឍសេដ្ឋកិច្ច ចីរភាពបរិស្ថាន ការងារបៃតង បច្ចេកវិទ្យាបៃតង និងកំណែទម្រង់សេដ្ឋកិច្ច ដោយគិតគូរ បន្ថែមលើការលើកទឹកចិត្តបៃតង ជាពិសេសពន្ធបៃតង ហិរញ្ញវត្ថុបៃតង ឥណទានបៃតង និងមីក្រូ និងម៉ាក្រូហិរញ្ញវត្ថុបៃតង ដែលជាម៉ាក្រូសេដ្ឋកិច្ចថេរ រួមចំណែកដល់ការកាត់បន្ថយភាពក្រីក្រ និងការអភិវឌ្ឍ ប្រកបដោយចីរភាព។ ក្នុងនោះធុរកិច្ចបៃតង (Green Buiness) ឬធុរកិច្ចដែលគិតគូរបៃតង មិនត្រឹមតែបានផ្តល់ភាគលាភដល់ សុខុមាលភាពរបស់សង្គម-ផែនដី និងចីរភាពបរិស្ថានប៉ុណ្ណោះទេ ប៉ុន្តែក៏កំពុងក្លាយជាកាលានុវត្តភាពថ្មីរបស់ទីផ្សារ និងចំណាប់អារម្មណ៍ខ្ពស់ពីអ្នកវិនិយោគធំៗ។
បើតាម លោកស្រី លុយ រតនា អនុប្រធានមន្ទីរកិច្ចការនារី បានឱ្យដឹងថា សម្រាប់ខេត្តសៀមរាប មានចំនួនស្ត្រីចូលរួមក្នុងវិស័យមុខងារសាធារណៈ និងនយោបាយ កើនឡើងគួរឱ្យកត់សម្គាល់។ ក្នុងនោះមានអភិបាលរងខេត្ត ក្រុងស្រុក ២០រូប, ប្រធាន និងសមាជិកក្រុមប្រឹក្សាខេត្ត ក្រុងស្រុក ៤៦រូប, ប្រធាន អនុប្រធានមន្ទីរអង្គភាព ១៥រូប, មេឃុំចៅសង្កាត់ ជំទប់ទី១ទី២ ចៅសង្កាត់រងទី១ទី២ ៦៣នាក់, សមាជិកក្រុមប្រឹក្សាឃុំសង្កាត់ ១១២រូប និងស្ត្រីជាមេភូមិ អនុភូមិ សមាជិកភូមិចំនួន ៨៨៨រូបផងដែរ៕
អត្ថបទ និងរូបភាព៖ លោក ជា ស្រស់ ,អោត រត់
កែសម្រួល៖ លោក អ៊ុន ណារាជ្យ
