ការដេញថ្លៃគម្រោងសាងសង់ផ្លូវបេតុងអាមេ ១ខ្សែ និងជួសជុលផ្លូវដីក្រាលក្រួសក្រហម ១ខ្សែ ក្នុងឃុំកន្ទួត និងឃុំខ្នងភ្នំ ស្រុកស្វាយលើ ខេត្តសៀមរាប ត្រូវបានប្រកាសបញ្ចប់ការដេញថ្លៃដោយជោគជ័យ នៅថ្ងៃទី១១ ខែមីនា ឆ្នាំ២០២៥ ដោយមានការចូលរួមពីមន្ត្រីបច្ចេកទេសខេត្ត អាជ្ញាធរស្រុក គណៈកម្មការលទ្ធកម្មឃុំ ក្រុមហ៊ុនម៉ៅការ និងអ្នកពាក់ព័ន្ធជាច្រើនរូប។
លោក ឈង់ ឈា ប្រធានគណៈកម្មការលទ្ធកម្មឃុំកន្ទួត ស្រុកស្វាយលើ បានឱ្យដឹងថា ចំពោះគម្រោងមូលនិធិឃុំឆ្នាំ២០២៥នេះ ឃុំកន្ទួត បានដាក់ដេញថ្លៃគម្រោងជុលផ្លូវដីក្រាលក្រួសក្រហម ប្រវែង ៣ ២៦០ម៉ែត្រ ទទឹង៥ម៉ែត្រ និងសាងសង់លូចំនួន ៦កន្លែង និងស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៤០៧ ៩៦០ ៥៦៧រៀល ដោយមានក្រុមហ៊ុនចំនួន៥ បានដាក់សំណើ។ ជាលទ្ធផលបានទៅលើកក្រុមហ៊ុន សុិម វឌ្ឍនា ក្នុងតម្លៃ ២២៧ ៣៤០ ០០០រៀល។
ដោយឡែក លោក ឈឿម តាំង ប្រធានគណៈកម្មការលទ្ធកម្មឃុំខ្នងភ្នំ ស្រុកស្វាយលើ ក៏បានឱ្យដឹងដែរថា ចំពោះគម្រោងមូលនិធិឃុំឆ្នាំ២០២៥នេះ ឃុំខ្នងភ្នំ បានដាក់ដេញថ្លៃគម្រោងសាងសង់ផ្លូវបេតុងអាមេ ប្រវែង ៥៣៣ម៉ែត្រ ទទឹង៤ម៉ែត្រ កម្រាស់០.១៥ម៉ែត្រ ប្រើប្រាស់ដែកកងទំហំ ៨មីលីម៉ែត្រ ចងគម្លាតដែក០.២ម៉ែត្រ និងដាក់ស្លាកសញ្ញាគម្រោងចំនួន១ ក្នុងតម្លៃប៉ាន់ស្មាន ៣០៨ ៩៥៤ ៨៧៤រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផលបានទៅលើក្រុមហ៊ុន ម៉ូវ សៀកផៃ ក្នុងតម្លៃ ៣០៦ ០០០ ០០០រៀល។
ព័ត៌មានជាតិ ថ្មីៗ
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការទាំងពីរ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុទ្ធនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
