អាជ្ញាធរខេត្តសៀមរាប ដោយមានការសហការជាមួយមន្ទីរអង្គភាពពាក់ព័ន្ធ គ្រោងរៀបចំ “យុទ្ធនាការគ្រប់គ្រាន់” ដើម្បីជីវជាតិគ្រប់គ្រាន់ អាហារគ្រប់គ្រាន់ ជាមួយការរៀបចំពិព័រណ៍អាហារដ៏សម្បូរបែប ដែលបង្ហាញពីអាហារដែលមានជីវជាតិ និងសុវត្ថិភាពសម្រាប់កុមារ នៅសួនហាត់ប្រាណព្រះរាជដំណាក់ ក្រុងសៀមរាប នាថ្ងៃទី២៤ ខែមីនា ឆ្នាំ២០២៥ខាងមុខនេះ។
ក្នុងកិច្ចប្រជុំត្រៀមរៀបចំយុទ្ធនាការ នៅព្រឹកថ្ងៃទី១៤ ខែមីនា ឆ្នាំ២០២៥ លោក អុឹង គឹមលាង អភិបាលរងខេត្ត បានបញ្ជាក់ថា យុទ្ធនាការនេះ មានគោលបំណងលើកកម្ពស់ការយល់ដឹងអំពីសារៈសំខាន់នៃអាហារូបត្ថម្ភសម្រាប់កុមារ និងជំរុញឱ្យមានការចូលរួមពីគ្រប់ភាគីពាក់ព័ន្ធក្នុងការដោះស្រាយបញ្ហាកង្វះអាហារូបត្ថម្ភ ខណៈកុមារអាយុ ៦-២៣ខែ ប្រមាណ ៤៩ភាគរយ មិនទទួលបានអាហារូបត្ថម្ភគ្រប់គ្រាន់ ដែលប៉ះពាល់ដល់ការលូតលាស់។ ដើម្បីដោះស្រាយបញ្ហានេះ រាជរដ្ឋាភិបាលបានដាក់ចេញយុទ្ធនាការ “ជីវជាតិគ្រប់គ្រាន់ អាហារគ្រប់គ្រាន់” ក្នុងគោលបំណងជំរុញការវិនិយោគ និងការចូលរួមពីគ្រប់ភាគីពាក់ព័ន្ធ ក៏ដូចជាអនុវត្តយុទ្ធសាស្ត្រសន្តិសុខស្បៀងជាតិ ២០២៤-២០២៨ និងលើកកម្ពស់ការយល់ដឹងអំពីអាហារូបត្ថម្ភ និងសុវត្ថិភាពចំណីអាហារ។
លោកអភិបាលរងខេត្ត រំពឹងថាយុទ្ធនាការនេះ នឹងពង្រឹងកិច្ចសហការរវាងរដ្ឋាភិបាល អង្គការសង្គមស៊ីវិល និងវិស័យឯកជន ដើម្បីធ្វើឱ្យប្រសើរឡើងនូវសន្តិសុខស្បៀង និងអាហារូបត្ថម្ភ ជាមួយសារគន្លឹះ រួមមាន បង្កើនការវិនិយោគលើកសិកម្ម និងការបណ្តុះបណ្តាលកសិករ លើកកម្ពស់ការផលិតអាហារដែលមានជីវជាតិ គាំទ្រការធ្វើពិពិធកម្មកសិកម្ម ពង្រឹងសមត្ថភាពអាជ្ញាធរមូលដ្ឋាន។ លោកក៏បានអំពាវនាវឱ្យមានការចូលរួមពីសិស្សានុសិស្ស និងមន្ត្រីរាជការឱ្យបានច្រើន ជាពិសេសការចូលរួមពីសមាជិកសហគមន៍ ស្ត្រី និងយុវជន គឺចាំបាច់ដើម្បីធានាថាតម្រូវការ និងបញ្ហាប្រឈមក្នុងមូលដ្ឋានត្រូវបានដោះស្រាយ៕
អត្ថបទ និងរូបភាព៖ លោក ឡេង ពិសិដ្ឋ
កែសម្រួល៖ លោក អ៊ុន ណារាជ្យ
