ព្រះគ្រូចៅអធិការវត្តសំរោង ស្ថិតក្នុងឃុំសំរោង ស្រុកសូទ្រនិគម ខេត្តសៀមរាប ដោយបានមូលមតិគ្នាជាមួយ គណៈកម្មការ អាចារ្យវត្ត រួមនឹងប្រជាពុទ្ធបរិស័ទក្នុងមូលដ្ឋាន បានរៀបចំបុណ្យទេសនាមហាវេស្សន្តជាតក ទៅតាមលំអានប្រពៃណីទំនៀមទម្លាប់ព្រះពុទ្ធសាសនា រយៈពេលពីរយប់ បីថ្ងៃ ចាប់ថ្ងៃទី១៥-១៧ ខែមីនា ឆ្នាំ២០២៥ រួមជាមួយការសម្តែងចាប៉ីដងវែងឆ្លើយឆ្លងគ្នា ពាក់ព័ន្ធរឿងវេស្សន្តរជាតក និងការអប់រំផ្សេងៗ។
ព្រះតេជគុណ ថង ចន្ថា ព្រះចៅអធិការវត្តសំរោង មានសង្ឃដីកាឱ្យដឹងថា តាមបណ្តាវត្តអារាមក្នុងខេត្តសៀមរាប គេតែងជ្រើសរើសពេលសម្រាប់ធ្វើពិធីទេសនាមហាជាតក ក្នុងពេលណាមួយក៏បាន អាស្រ័យតាមការរើសរកពេលវេលា។ វត្តនីមួយៗបានរៀបចំជាបន្តបន្ទាប់មិនស្របពេលគ្នាទេអាស្រ័យទៅតាមការឯកភាពពីគណៈកម្មការវត្តប្រជាពុទ្ធបរិស័ទចំណុះជើងវត្ត និងអាជ្ញាធរមូលដ្ឋានកំណត់ពេលវេលាមិនប៉ះពាល់ដល់ការងារប្រមូលផលរបស់បងប្អូនប្រជាកសិករក្នុងមូលដ្ឋាន។
ព្រះតេជគុណ ថង ចន្ថា មានសង្ឃដីកាឱ្យដឹងទៀតថា នៅខេត្តសៀមរាប គេនិយមប្រារព្ធពិធីនេះអស់រយៈពេលពីរយប់ បីថ្ងៃ។ បើសង្ខេបឱ្យខ្លីបំផុតមក គឺគេចាប់ផ្តើមពីក្រុងពលី កិច្ចបួងសួង រួចហើយក៏ចាប់ផ្តើមទេសន៍កាន់មហាល័យ។ លុះស្អែកឡើងទើបចាប់ទេសនាពីកណ្ឌទី១ ដល់កណ្ឌទី១៥ ដែលចប់នៅយប់ថ្ងៃទីពីរ។ នៅថ្ងៃទី៣ គេនិមន្តព្រះសង្ឃទេសន៍ «អានិសង្សបក រៀបរាប់ពីការស្តាប់ទេសនាមហាជាតក» រួចហើយក៏រៀបពិធីដាក់បាត្រឆ្លង ជាកិច្ចបញ្ចប់កម្មវិធីទេសនា។
ព្រះគ្រូចៅអធិការវត្ត ក៏បានរំលឹកថា «ជាតក» សំដៅលើរឿងរ៉ាវ «ជាតិ» ទាំងឡាយរបស់ព្រះសម្មាសម្ពុទ្ធ មុនជាតិដែលព្រះអង្គបានត្រាស់ដឹង ពោលគឺនៅពេលដែលព្រះអង្គនៅជាព្រះពោធិសត្វ ហើយចាប់កំណើតផ្សេងៗគ្នា ជាមនុស្សឬជាសត្វជាដើម។ ជាតក១០ចុងក្រោយគេបង្អស់ហៅថា «ទសជាតក»។ នៅក្នុងជាតកទាំង១០នេះ ជាតកចុងក្រោយបង្អស់មានឈ្មោះថា «វេស្សន្តរជាតក» ដ្បិតព្រះពោធិសត្វនៅក្នុងជាតិនោះមានព្រះនាមថា «ព្រះវេស្សន្តរ»។ ក្នុងជាតិនីមួយៗក្នុងចំណោម១០ជាតិនេះ ព្រះពោធិសត្វតែងបំពេញបានបារមីអ្វីមួយ មានន័យថាបំពេញអ្វីមួយបានពេញលេញឥតខ្ចោះដល់ទីបញ្ចប់។ ជាតិជាព្រះវេស្សន្តរនេះ គេច្រើននិយមហៅថា «មហាជាតក» ដោយគេយល់ថាជា ជាតិដែលធំបង្អស់៕
អត្ថបទ និងរូបភាព៖ លោក ឃុត សៅ
អត្ថបទ និងរូបភាព៖ លោក អ៊ុន ណារាជ្យ
