ក្រុមប្រឹក្សាសកម្មភាពជនពិការ បានបង្ហាញថា តាមរយៈកិច្ចខិតខំប្រឹងប្រែងសម្របសម្រួលកន្លងមករបស់អគ្គលេខាធិការដ្ឋានក្រុមប្រឹក្សាសកម្មភាពជនពិការ ផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨ ហាក់ទទួលបានការចាប់អារម្មណ៍ច្រើនបើប្រៀបធៀបនឹងផែនការយុទ្ធសាស្ត្រជាតិស្តីពីពិការភាព អាណត្តិទី១ និងទី២ ដោយមានការចូលរួមផ្តល់ធាតុចូលយ៉ាងផុលផុសពីគ្រប់ក្រសួង ស្ថាប័ន និងគ្រប់អ្នកពាក់ព័ន្ធទាំងអស់ ជាពិសេសជនមានពិការភាពគ្រប់ប្រភេទបានផ្តល់យោបល់ជាច្រើនដើម្បីដោះស្រាយបញ្ហាដែលជនមានពិការភាពបានជួបប្រទះកន្លងមកក៏ដូចជាបច្ចុប្បន្ន។
ថ្លែងក្នុងសិក្ខាសាលាផ្សព្វផ្សាយផែនការយុទ្ធសាស្ត្រជាតិ ស្ដីពីពិការភាពឆ្នាំ២០២៤-២០២៨ នៅខេត្តសៀមរាប នាថ្ងៃទី២០ ខែមីនា ឆ្នាំ២០២៥នេះ ឯកឧត្ដម ម៉េត មករា រដ្ឋលេខាធិការ និងជាអនុប្រធានទី១ ក្រុមប្រឹក្សាសកម្មភាពជនពិការ មានប្រសាសន៍ថា សិក្ខាសាលាថ្ងៃនេះ គឺជាការអនុវត្តអនុសាសន៍របស់ប្រមុខថ្នាក់ដឹកនាំរាជរដ្ឋាភិបាលកម្ពុជា ដែលបានប្រកាសដាក់ឱ្យអនុវត្តផែនការយុទ្ធសាស្រ្តជាតិមួយនេះ កាលពីខែធ្នូ ឆ្នាំ២០២៤កន្លងទៅ។
ឯកឧត្ដម ក៏បានបង្ហាញការជឿជាក់ថា តាមរយៈសិក្ខាសាលានេះ នឹងបានជាធាតុចូលរួមចំណែកយ៉ាងសំខាន់ដល់គ្រប់អ្នកពាក់ព័ន្ធ ក្នុងការជំរុញ និងអនុវត្តផែនការនេះឱ្យមានប្រសិទ្ធភាពថែមមួយកម្រិតទៀត ដែលជាផ្នែកមួយក្នុងការលើកកម្ពស់បរិយាបន្នពិការភាពក្នុងវិស័យរៀងៗខ្លួនឱ្យកាន់តែប្រសើរឡើង។
លោក នាក់ ណេរ៉ុន អភិបាលរងខេត្ដសៀមរាប មានប្រសាសន៍ថា រាជរដ្ឋាភិបាលនីតិកាលទី៧ នៃរដ្ឋសភាបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយផ្តោតនូវឧត្តមគតិ និងអាទិភាពក្នុងការលើកកម្ពស់ជីវភាពរស់នៅរបស់ប្រជាពលរដ្ឋ ជាពិសេសជនមានពិការភាព ដើម្បីឈានទៅសម្រេចឱ្យបាននូវចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។
លោកបន្ដថា ពាក់ព័ន្ធលើការងារវិស័យពិការភាពទូទាំងខេត្តសៀមរាប យើងមានបណ្តាញគាំទ្រជាច្រើន ហើយកន្លងមកក្រសួងស្ថាប័នពាក់ព័ន្ធ ក៏ដូចជារដ្ឋបាលខេត្ត មន្ទីរសង្គមកិច្ច រួមទាំងមន្ទីរអង្គភាពពាក់ព័ន្ធ និងរដ្ឋបាលក្រុងស្រុក បានយកចិត្តទុកដាក់ខ្លាំង និងជួយដល់បងប្អូនជនមានពិការភាពផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
