ក្នុងកិច្ចប្រជុំប្រចាំត្រីមាសទី១ របស់ក្រុមការងារពិសេសថ្នាក់ខេត្ត សម្រាប់លុបបំបាត់ជំងឺគ្រុនចាញ់ នៅថ្ងៃទី៣១ ខែមីនា ឆ្នាំ២០២៥នេះ លោក នាក់ ណេរ៉ុន អភិបាលរងខេត្ដសៀមរាប និងជាប្រធានក្រុមការងារ បានជំរុញដល់ក្រុមការងារស្វែងយល់ពីអាការៈ និងរោគសញ្ញាជំងឺគ្រុនចាញ់ ជាពិសេសត្រូវបន្តផ្សព្វផ្សាយពីវិធានការការពារ និងទប់ស្កាត់ជំងឺគ្រុនចាញ់ដល់ប្រជាពលរដ្ឋនៅតាមមូលដ្ឋាន ជាពិសេសប្រជាពលរដ្ឋរស់នៅតាមតំបន់ប្រឈម ដូចជាតំបន់ព្រំដែន និងព្រៃភ្នំជាដើម។
លោក ណាក់ ណេរ៉ុន បន្តថា ក្រុមការងារទាំងអស់ ធ្វើយ៉ាងណាណែនាំដល់ប្រជាពលរដ្ឋស្វែងយល់ពីជំងឺគ្រុនចាញ់ ប្រសិនបើមានរោគសញ្ញាសង្ស័យ ត្រូវប្រញាប់ ស្វែងរកសេវាសុខាភិបាលដែលនៅជិតបងប្អូនបំផុត ជាពិសេសមណ្ឌលសុខភាព ដើម្បីធ្វើតែស្តឱ្យបានទាន់ពេលវេលា។ ជាមួយគ្នានេះ លោកក៏សូមវាយតម្លៃខ្ពស់ ចំពោះលទ្ធផលការងារដែលក្រុមការងារអនុវត្តបានកន្លងមក ក្នុងការចូលរួមលុបបំបាត់ជំងឺគ្រុនចាញ់សំដៅការរួមគ្នាស្វែងរកវិធីសាស្រ្ដផ្សេងៗដើម្បីលុបបំបាត់ជំងឺគ្រុនចាញ់ខណៈខែវស្សាជិតមកដល់។
ព័ត៌មានជាតិ ថ្មីៗ
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្ត បានឱ្យដឹងថា សម្រាប់ករណីស្រាវជ្រាវជំងឺគ្រុនចាញ់សម្រាប់ឆ្នាំ២០២៥ មាននៅតាមបណ្ដាស្រុកប្រតិបត្ដិមួយចំនួនដូចជា ស្រុកក្រឡាញ់ ស្រុកអង្គរជុំ ក្រុងសៀមរាប និងស្រុកសូទ្រនិគម ដោយនៅក្នុងត្រីមាសទី១នេះ ពុំមានករណីវិជ្ជមានជំងឺគ្រុនចាញ់ប្រភេទវីវ៉ាក់ និងចម្រុះដែលត្រូវព្យាបាលផ្ដាច់នោះទេ។ ក្នុងនោះ លោកក៏បានសំណូមពរដល់បណ្ដាស្រុកប្រតិបត្ដិ ជំរុញលើកទឹកចិត្ដដល់មណ្ឌលសុខភាព ឱ្យបន្ដការស្រាវជ្រាវរកករណីជំងឺគ្រុនចាញ់ និងសំណូមពរដល់អាជ្ញាធរមូលដ្ឋាន បន្ដចូលរួមលើកទឹកចិត្ដដល់ប្រជាពលរដ្ឋនៅក្នុងមូលដ្ឋាន មករកសេវាធ្វើតែស្ដជំងឺគ្រុនចាញ់ក្នុងករណីសង្ស័យ ជាពិសេសប្រជាពលរដ្ឋមកពីប្រទេសថៃ ឬមកពីតំបន់ប្រឈមនានា ដូចជាតាមតំបន់ព្រំដែន និងព្រៃភ្នំជាដើម៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
