ផ្លូវក្រាលដីល្បាយគ្រួស១ខ្សែ ប្រវែងជាង ៥គីឡូម៉ែត្រ តភ្ជាប់ពីភូមិកកោះ ឃុំល្វែងឬសី្ស ស្រុកជីក្រែង ខេត្តសៀមរាប ទៅភូមិអន្លង់ក្រាញ់ ឃុំពពក ស្រុកស្ទោង ខេត្តកំពង់ធំ ត្រូវបានបើកការដ្ឋានស្ថាបនាជាផ្លូវការ នៅថ្ងៃទី៣១ ខែមីនា ឆ្នាំ២០២៥នេះ ដោយអង្គភាពវិស្វកម្មសម្តេចអគ្គមហាធម្មពោធិសាល ជា ស៊ីម ចំណុះនាយកដ្ឋានវិស្វកម្មក្រសួងការពារជាតិ។
ឯកឧត្តមបណ្ឌិត នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា រាជរដ្ឋាភិបាលបាននឹងកំពុងផ្ដោតការយកចិត្តទុកដាក់យ៉ាងខ្លាំងលើការងារស្ថាបនាផ្លូវ ដោយបានគិតគូរពីភាពធន់នឹងការប្រែប្រួលអាកាសធាតុ ដើម្បីការប្រើប្រាស់បានយូរអង្វែង ព្រោះផ្លូវពិតជាមានសារសំខាន់ណាស់ក្នុងការជំរុញដំណើរអន្តរកម្មផ្នែកសេដ្ឋកិច្ច និងសង្គមកិច្ចនៅតំបន់ជនបទ កាត់បន្ថយគម្លាតរវាងតំបន់ជនបទ និងទីប្រជុំជន ផ្តល់ភាពងាយស្រួលក្នុងការធ្វើចរាចរណ៍ទៅមក ការដឹកជញ្ជូនកសិផលរបស់ប្រជាពលរដ្ឋក្នុងមូលដ្ឋាន។
ក្នុងឱកាសនោះ ឯកឧត្តម នួន ដាញ៉ិល បានណែនាំដល់ក្រុមការងារស្ថាបនា ត្រូវធ្វើការកែសម្រួលផ្លូវខាងលើទៅតាមបច្ចេកទេសសាងសង់ ដើម្បីធានាឱ្យបាននូវការបាក់ ឬរលុះជើងទេ ដែលនាំធ្វើឱ្យផ្លូវងាយខូចខាតនៅរដូវភ្លៀង ដោយត្រូវធ្វើការដាំស្មៅនៅតាមជើងទេ ទប់ទឹកហូរច្រោះដី ជាពិសេសធានាឱ្យបាននូវគុណភាព និងការប្រើប្រាស់បានយូរអង្វែង ។
ឯកឧត្តម ក៏បានជំរុញដល់អាជ្ញាធរមូលដ្ឋាន ត្រូវជួយសម្របសម្រួលសហការជាមួយក្រុមការងារស្ថាបនា ឱ្យដំណើរប្រព្រឹត្តទៅដោយរលូន ប្រកបដោយគុណភាព ប្រសិទ្ធភាព និងឆាប់រហ័ស និងសូមអំពាវនាវដល់ប្រជាពលរដ្ឋទាំងអស់ដែលប្រើប្រាស់ផ្លូវ និងអ្នករស់នៅអមសងខាងផ្លូវ នៅពេលស្ថាបនារួចរាល់ សូមបងប្អូនជួយថែរក្សា និងប្រើប្រាស់ផ្លូវនេះឱ្យបានល្អ ដើម្បីជាប្រយោជន៍រួមសម្រាប់បងប្អូនប្រជាពលរដ្ឋក្នុងមូលដ្ឋាន និងទៅអនាគត៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
