នៅថ្ងៃទី០១ ខែមេសា ឆ្នាំ២០២៥នេះ គណៈកម្មការលទ្ធកម្ម ឃុំល្វែងឫស្សី ស្រុកជីក្រែង ខេត្តសៀមរាប បានសម្រេចការដេញថ្លៃជាស្ថាពរ នូវគម្រោងសាងសង់ផ្លូវបេតុងអាមេប្រវែង ៧៦៤ម៉ែត្រ ដោយការដេញថ្លៃនេះមានការចូលរួមពីមន្ត្រីបច្ចេកទេសសាលាខេត្ត អាជ្ញាធរស្រុក មន្ត្រីបច្ចេកទេសស្រុក គណៈកម្មការលទ្ធកម្មឃុំ រួមនឹងតំណាងក្រុមហ៊ុនដេញថ្លៃ។
បើតាមគណៈកម្មការលទ្ធកម្មឃុំល្វែងឫស្សី បានឱ្យដឹងថា ចំពោះគម្រោងមូលនិធិឃុំ ឆ្នាំ២០២៥នេះ ឃុំល្វែងឫស្សី បានដាក់ដេញថ្លៃគម្រោងសាងសង់ផ្លូវបេតុង១ខ្សែ ស្ថិតក្នុងភមិថ្នល់ ប្រវែង៧៦៤ម៉ែត្រ ទទឹង៥ម៉ែត្រ កម្រាស់បេតុង០,១៥ម៉ែត្រ ដាក់លូការពារផ្លូវ៤កង់ ស្លាកគម្រោង១កន្លែង ស្លាកចរាចរ២ដើម និងសូឡាបំភ្លឺផ្លូវ ២៥ដើម ក្នុងតម្លៃប៉ាន់ស្មាន ៤៣៤ ៥១០ ២៥០រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផលបានទៅលើកក្រុមហ៊ុន ម៉ូវ សៀកផៃ ក្នុងតម្លៃ ៤៣២ ០០០ ០០០រៀល។
ជាមួយនឹងការទទួលបានគម្រោងសាងសង់ផ្លូវខាងលើ តំណាងក្រុមហ៊ុនដែលទទួលបានការម៉ៅការ បានធ្វើការប្ដេជ្ញាចិត្តដោយសន្យាថានឹងធ្វើឱ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស និងតាមលក្ខខណ្ឌដូចមានចែងនៅក្នុងកិច្ចសន្យា៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
