នៅថ្ងៃទី៣១ ខែមីនា ឆ្នាំ២០២៥ម្សិលមិញនេះ លោក ហែន ពុទ្ឋី អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាលខេត្ត រួមនឹងមន្ត្រីជំនាញពាក់ព័ន្ធ និងអាជ្ញាធរមូលដ្ឋាន បានចុះធ្វើការពិនិត្យផ្ទៀងផ្ទាត់ និងធ្វើបច្ចុប្បន្នភាពលើការប្រមូលទិន្នន័យតាមបណ្ដាស្រុកជាប់តំបន់បឹងទន្លេសាប ក្នុងភូមិសាស្ត្រខេត្តសៀមរាប។
លោក ហែន ពុទ្ឋី បានឱ្យដឹងថា ការចុះធ្វើការពិនិត្យផ្ទៀងផ្ទាត់នាពេលនេះ គឺដើម្បីធ្វើបច្ចុប្បន្នភាព រៀបចំផែនការក្នុងការជួយប្រជាពលរដ្ឋក្នុងតំបន់បឹងទន្លេសាប លើមុខរបរ និងពិនិត្យពីផលប៉ះពាល់នៃការអាស្រ័យផលរបស់ប្រជាពលរដ្ឋ និងការរៀបចំគម្រោងអភិវឌ្ឍន៍ភូមិ ដើម្បីស្វែងរកការគាំទ្រគម្រោងនោះ ដោយផ្ដោតទៅលើការបង្កើតមុខរបរចម្បង ការរៀបចំហេដ្ឋារចនាសម្ព័ន្ធ ការគាំទ្រលើវិស័យកសិកម្ម គាំទ្រលើវិស័យទេសចរណ៍។
លោកអភិបាលរងខេត្ត បន្តថា ការដឹកនាំក្រុមការងាររបស់រដ្ឋបាលខេត្ត ចុះពិនិត្យនេះគឺដោយមានការសហការសម្របសម្រួលការងារជាមួយក្រុមការងាររបស់ក្រសួងរៀបចំដែនដី នគរូបនីយកម្ម និងសំណង់ និងមន្ទីរអង្គភាពពាក់ព័ន្ធ ក្នុងការចុះប្រជុំ និងប្រមូលទិន្នន័យតាមបណ្តាក្រុងស្រុកទាំង៦ ជាប់តំបន់បឹងទន្លេសាប រួមមាន ក្រុងសៀមរាប ស្រុកប្រាសាទបាគង ស្រុកសូទ្រនិគម ស្រុកជីក្រែង ស្រុកពួក និងស្រុកក្រឡាញ់ ចាប់តាំងពីថ្ងៃទី២៨ ខែកុម្ភៈ ឆ្នាំ២០២៥កន្លងមក៕
អត្ថបទ និងរូបភាព៖ រដ្ឋបាលខេត្ត
កែសម្រួល៖ លោក អ៊ុន ណារាជ្យ
