ក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានស្រុកពួក ខេត្ដសៀមរាប នៅថ្ងៃទី០១ ខែមេសា ឆ្នាំ២០២៥នេះ លោកជំទាវ សេង វណ្ណសាយ រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកពួក បានជំរុញឱ្យក្រុមការងារទាំងអស់ បន្តពង្រឹង និងលើកកម្ពស់ប្រសិទ្ធភាពក្នុងការបំពេញការងារ ជាពិសេសបន្តយកចិត្តទុកដាក់លើការផ្ដល់សេវាសាធារណៈជូនប្រជាពលរដ្ឋ។
លោកជំទាវ សេង វណ្ណសាយ មានប្រសាសន៍ថា ការបង្កើតក្រុមការងាររាជរដ្ឋាភិបាលចុះមូលដ្ឋាន គួបផ្សំជាមួយថ្នាក់ជាតិ និងថ្នាក់ក្រោមជាតិ គឺដើម្បីរួមគ្នាធ្វើកិច្ចការងារមូលដ្ឋាន ជាពិសេសប្រមូលសំណូមពររបស់ប្រជាពលរដ្ឋ និងរកមធ្យោបាយដោះស្រាយបញ្ហាឱ្យបានលឿន។ ជាមួយគ្នានេះ សូមសំណូមពរដល់ក្រុមការងារទាំងអស់ ត្រូវបន្ដការខិតខំប្រឹងប្រែងបន្ថែមទៀត ដើម្បីឱ្យទូទាំងមូលដ្ឋានស្រុកពួក កាន់តែរីកចម្រើន លូតលាស់ និងអភិវឌ្ឍលើគ្រប់វិស័យ។
លោក ស៊ីន ចាន់ថុល អភិបាលស្រុកពួក បានលើកឡើងថា ដើម្បីឆ្លើយតបទៅនឹងគោលនយោបាយ កំណែទម្រង់រដ្ឋបាលស៊ីជម្រៅ និងកម្មវិធីជាតិសម្រាប់ការអភិវឌ្ឍតាមបែបលទ្ធិប្រជាធិបតេយ្យនៅថ្នាក់ក្រោមជាតិ មន្រ្ដីរដ្ឋបាលគ្រប់លំដាប់ថ្នាក់បានខិតខំប្រឹងប្រែង អនុវត្ដតួនាទី ភារកិច្ចតាមលក្ខខណ្ឌការងារដែរក្រុមប្រឹក្សា គណៈអភិបាលស្រុកប្រគល់ជូន និងខិតខំដោះស្រាយបញ្ហាប្រឈមនានាដល់ប្រជាពលរដ្ឋនៅក្នុងមូលដ្ឋាន សំដៅកាត់បន្ថយភាពក្រីក្រ និងបង្កើនប្រាក់ចំណូលដល់ប្រជាពលរដ្ឋ។ ជាមួយគ្នានេះ ក្រុមការងាររាជរដ្ឋាភិបាលចុះមូលដ្ឋានស្រុកពួក បានចូលរួមចំណែកយ៉ាងសកម្ម និងការខិតខំប្រឹងប្រែងក្នុងការបំពេញតួនាទី ភារកិច្ច ដោះស្រាយ ដើម្បីឆ្លើយតបទៅនឹងសំណូមពរប្រជាពលរដ្ឋ សម្រាប់បម្រើបុព្វហេតុនៃការអភិវឌ្ឍ និងរីកចម្រើនលើគ្រប់វិស័យ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
