អាជ្ញាធរខេត្តសៀមរាប បានបញ្ជាក់ថា គិតមកត្រឹមថ្ងៃនេះ សណ្ឋាគារ ផ្ទះសំណាក់ នៅតាមផ្លូវធំៗនៃក្រុងសៀមរាប ត្រូវបានភ្ញៀវកក់ទុកជាបណ្ដើរៗហើយ ខណៈអាជ្ញាធរអំពាវនាវកុំឱ្យមានការដំឡើងថ្លៃសេវា ក្នុងព្រឹត្តិការណ៍អង្គរសង្ក្រាន្ត នាថ្ងៃពិធីបុណ្យចូលឆ្នាំថ្មី ប្រពៃណីជាខ្មែរនាពេលខាងមុខ។
លោក ង៉ូវ សេងកាក់ អភិបាលរងខេត្ត បានឱ្យដឹងនៅថ្ងៃទី០២ ខែមេសានេះថា ផ្ទះសំណាក់ និងសណ្ឋាគារខ្នាតតូច ខ្នាតមធ្យម នៅតាមដងផ្លូវធំៗ ពួកគាត់ទទួលបានការកក់បន្ទប់ស្នាក់នៅស្ទើរតែពេញអស់ហើយ ប៉ុន្តែសម្រាប់សណ្ឋាគារ ផ្ទះសំណាក់ នៅតាមផ្លូវតូចៗ ឬកន្លែងជាយក្រុងដែលមិនសូវគេមើលឃើញ អាចនៅសល់បន្ទប់ខ្លះ។ ប៉ុន្តែទោះបីយ៉ាងនេះ លោកថា អាចនឹងអស់បន្ទប់នៅថ្ងៃព្រឹត្តិការណ៍អង្គរសង្ក្រាន្តចូលមកដល់ ប៉ុន្តែក្រុមប្រតិបត្តិករទេសចរណ៍ បានត្រៀមបន្ទប់ម៉ាស្សាជាច្រើនទៀត ព្រមទាំងមានហូបស្ដេនៅតាមសហគមន៍ផងដែរ ដែលអ្នកទេសចរស្នាក់នៅជាលក្ខណៈគ្រួសារ។
លោកក៏បានសំណូមពរដល់ប្រតិបត្តិករទេសចរណ៍ ក៏ដូចជាម្ចាស់សណ្ឋាគារ ផ្ទះសំណាក់ទាំងអស់ក្នុងខេត្តសៀមរាប សូមបន្តនិរន្តភាពរបស់ខ្លួនឱ្យបានល្អជូនអតិថិជន ដោយមិនដំឡើងថ្លៃសេវាណាមួយ រួមទាំងសេវាម្ហូបអាហារ ដែលធ្វើឱ្យប៉ះពាល់ដល់ភ្ញៀវទេសចរណ៍ដែលមកកំសាន្តក្នុងព្រឹត្តិការណ៍អង្គរសង្ក្រាន្ត នាថ្ងៃពិធីបុណ្យចូលឆ្នាំថ្មី ប្រពៃណីជាខ្មែរនាពេលខាងមុខ។
បើតាមតាមរបាយការណ៍របស់មន្ទីរទេសចរណ៍ខេត្ត នៅខែមីនា ឆ្នាំ២០២៥នេះ ការធ្វើអាជីវកម្មទេសចរណ៍ក្នុងខេត្តមានចំនួន ១ ៤២៥កន្លែង ក្នុងនោះសណ្ឋាគារមានចំនួន ២២៤កន្លែង ស្មើនឹង ១៣ ៥១៦បន្ទប់ សណ្ឋាគារបានដំណើរការមានចំនួន ១៨៣កន្លែង ស្មើនឹង ៩ ៩០៧បន្ទប់។ ចំពោះផ្ទះសំណាក់ដែលកំពុងដំណើរការមានចំនួន ៣០២កន្លែង ស្មើនឹង ៤ ៦៨១បន្ទប់៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
