នៅរសៀលថ្ងៃទី០២ ខែមេសា ឆ្នាំ២០២៥នេះ គណៈកម្មការរៀបចំព្រឹត្តិការណ៍អង្គរសង្ក្រាន្ត និងរដ្ឋបាលខេត្តសៀមរាប បានរៀបចំកិច្ចប្រជុំស្ដីពីការត្រៀមរៀបចំព្រឹត្តិការណ៍អង្គរសង្ក្រាន្ត ដឹកនាំកិច្ចប្រជុំដោយ ឯកឧត្ដម សុខ សប្បាយណា ប្រធានក្រុមការងារប្រតិបត្តិនៃព្រឹត្តិការណ៍អង្គរសង្ក្រាន្ត និង ឯកឧត្ដម ប្រាក់ សោភ័ណ អភិបាលខេត្តសៀមរាប ដោយមានការចូលរួមពី លោកលោកស្រី អភិបាលរងខេត្ត ថ្នាក់ដឹកនាំមន្ទីរអង្គភាព ក្រុមការងារសហភាពសហព័ន្ធយុវជនកម្ពុជា និងអ្នកពាក់ព័ន្ធជាច្រើនរូប។
ឯកឧត្តម សុខ សប្បាយណា បានបង្ហាញថា ព្រឹត្តិការណ៍អង្គរសង្ក្រាន្ត នឹងផ្ដល់ឱកាសឱ្យសាធារណជន ជាពិសេសយុវជនបានចូលរួមឈ្វេងយល់ពីមរតកវប្បធម៌ខ្មែរជាច្រើនទម្រង់ ដែលត្រូវបានលើកយកមករំលេចនៅក្នុងកម្មវិធីនីមួយៗ ក្នុងគោលដៅបំផុសស្មារតីស្រលាញ់ និងលើកស្ទួយវប្បធម៌ជាតិ។ ប្រធានបទនាឆ្នាំនេះគឺ “ញញឹមសាទរសង្ក្រាន្តឆ្នាំថ្មី” ដែលជាការបង្ហាញពីភាពរីករាយ ការស្វាគមន៍ឆ្នាំថ្មី ការចែករំលែកក្ដីស្រលាញ់ និងការសារទនូវវប្បធម៌ខ្មែរដ៏រុងរឿង។
ឯកឧត្តម ប្រាក់ សោភ័ណ អភិបាលខេត្ត មានប្រសាសន៍ថា កិច្ចប្រជុំនេះជាជំនួបលើកចុងក្រោយ ដើម្បីពិនិត្យ ពិភាក្សា និងបង្ហាញអំពីដំណើរការរៀបចំ ក៏ដូចជាការចូលរួមជាមតិយោបល់ និងការលើកសំណើពីក្រុមការងារពាក់ព័ន្ធ ដែលជាការត្រៀមលក្ខណៈឆ្ពោះទៅការរៀបចំធ្វើយ៉ាងណាដើម្បីឱ្យព្រឹត្តិការណ៍នេះ អាចដំណើរការដោយរលូន និងជោគជ័យ។
ឯកឧត្តម ក៏បានណែនាំដល់គ្រប់មន្ទីរអង្គភាពពាក់ក្នុងខេត្ត ធ្វើយ៉ាងណាសហការគ្នាឱ្យបានល្អលើការអនុវត្តតួនាទីភារកិច្ចរបស់ខ្លួន ដើម្បីឱ្យព្រឹត្តិការណ៍អង្គរសង្ក្រាន្តនាឆ្នាំនេះ កាន់តែពិសេស និងផ្ដល់ជូននូវភាពសប្បាយរីករាយ ជូនដល់បងប្អូនមហាគ្រួសារខ្មែរ ក្នុងឱកាសអបអរពិធីបុណ្យចូលឆ្នាំថ្មីប្រពៃណីជាតិ និងផ្ដល់ប្រាក់ចំណូលបន្ថែមដល់ប្រជាពលរដ្ឋក្នុងខេត្តសៀមរាបថែមទៀតផង៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
