យុវជនស្ម័គ្រចិត្តចំនួន ៥៤នាក់ ជានិស្សិតនៃសាកលវិទ្យាល័យអង្គរ បានទទួលការបណ្ដុះបណ្ដាលស្ដីពីការសង្គ្រោះបឋម ដែលរៀបចំឡើងដោយក្រុមការងារសង្គ្រោះបឋម និងបន្ទាន់ នៃសហភាពសហព័ន្ធយុវជនកម្ពុជាខេត្ត សហការជាមួយមន្ទីរសុខាភិបាល នៅថ្ងៃទី៣១ ខែមីនា ឆ្នាំ២០២៥ ដើម្បីជាការពង្រឹងសមត្ថភាពត្រៀមជួយសង្គ្រោះបឋម និងបន្ទាន់ក្នុងព្រឹត្តិការណ៍អង្គរសង្ក្រាន្ត នាពេលខាងមុខ។
លោក ហួត សូនី ប្រធានក្រុមការងារសង្គ្រោះបឋម និងបន្ទាន់ សម្រាប់ព្រឹត្តិការណ៍អង្គរសង្ក្រាន្ត បានបញ្ជាក់ថា ថ្វីដ្បិតការបណ្តុះបណ្តាលនេះមានរយៈពេលខ្លី តែវាមានសារៈសំខាន់ណាស់ក្នុងការជួយពង្រឹងសមត្ថភាព ចំណេះដឹងដល់យុវជន និងក្រុមការងារ ក្នុងការឆ្លើយតបប្រកបដោយប្រសិទ្ធភាព អំពីរបៀប និងការប្រើប្រាស់ឧបករណ៍សង្គ្រោះ វិធីសាស្ត្រការជួយសង្គ្រោះបឋម និងបន្ទាន់ឱ្យបានត្រឹមត្រូវ ក្តាប់បានពីស្ថានភាពអ្នករងគ្រោះ ទំនាក់ទំនងស្វែងរកជំនួយសង្គ្រោះក្នុងគ្រាមានអាសន្ន ដើម្បីសង្គ្រោះអាយុជីវិតជាបឋមដល់ជនរងគ្រោះ និងអាចពន្យាេពលរហូតដល់អ្នកសង្គ្រោះមកដល់។
លោក ហួត សូនី បញ្ជាក់ទៀតថា ខ្លឹមសារមេរៀននៃការបណ្ដុះបណ្ដាលនេះ ផ្តោតលើជំនាញឆ្លើយតបសង្រ្គោះបឋមសំខាន់ៗ ដូចជា CPR ការភ្ញោចចង្វាក់បេះដូង រុំរបួស និងវិធីសាស្ត្រសង្គ្រោះអ្នកលង់ទឹក ខ្សែភ្លើងឆក់ ការប៉ះទង្គិច សាច់ដុំ ឆ្អឹង សន្លាក់ជាដើម។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្ត បានណែនាំដល់យុវជនស្ម័គ្រចិត្តទាំង ៥៤នាក់ ត្រូវយកតួនាទីរបស់ខ្លួនទៅបំពេញការងារឱ្យមានភាពត្រឹមត្រូវ ដូចជារក្សាក្រមសីលធម៌ សុជីវធម៌ ព្រោះការជួយសង្គ្រោះបឋមមានសារៈសំខាន់បំផុតសម្រាប់ជនរងគ្រោះដែលមានបញ្ហាសុខភាពមិនប្រក្រតី។ ជាមួយនោះ សូមឱ្យប្អូនៗ ត្រូវចាត់ទុកការងារសង្គ្រោះបឋមនេះ ជាកាតព្វកិច្ច ដោយពុំត្រូវគិតថា វាគ្រាន់តែជាការងារស្ម័គ្រចិត្តឡើយ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
