អាជ្ញាធរខេត្តសៀមរាប បានស្នើដល់គ្រប់មន្ទីរអង្គភាពជំនាញ ប្រតិបត្តិករទេសចរណ៍ ម្ចាស់សហគ្រាស អាជីវកម្ម កម្មករនិយោជិត និយោជកទាំងអស់ បន្តយកចិត្តទុកដាក់ក្នុងការអនុវត្តឱ្យបានខ្ជាប់ខ្ជួននូវច្បាប់ស្ដីពីការងារ សហជីព របបសន្តិសុខសង្គម និងច្បាប់ស្ដីពី ប្រាក់ឈ្នួលអប្បបរមា និងអនុសញ្ញាអន្តរជាតិខាងការងារនានា អនុលោមតាមស្ដង់ដារសេវាកម្មអាស៊ាន ធានាឱ្យការផ្ដល់សេវាកម្មរបស់យើងមានគុណភាព និងកាន់តែមានភាពទាក់ទាញភ្ញៀវទេសចរ។
ក្នុងឱកាសប្រារព្ធខួបអនុស្សាវរីយ៍លើកទី១៣៩ ទិវាពលកម្មអន្តរជាតិ ១ឧសភា ក្រោមប្រធានបទ «រួមគ្នាដើម្បីការងារសមរម្យ ដើម្បីកំណើនប្រកបដោយចិរភាព និងភាពធន់» នៅព្រឹកថ្ងៃទី០៦ ខែឧសភានេះ លោក ឌី រ៉ាដូ អភិបាលរងខេត្ត បានជំរុញដល់គ្រប់អ្នកពាក់ព័ន្ធ ត្រូវបង្កើតនូវយន្តការឆ្លើយតបទាន់ពេលវេលា ដើម្បីលើកកម្ពស់លក្ខខណ្ឌការងារសុវត្ថិភាព និងសុខភាពការងារ និងសុខដុមនីយកម្ម ទំនាក់ទំនងវិជ្ជាជីវៈ ជូនដល់កម្មករកម្មការិនី និងយុវជនយុវនារី ដែលបានបាត់បង់ និងគ្មានការងារធ្វើ តាមរយៈមូលនិធិពិសេសផ្សេងៗ។ ចំពោះបញ្ហាវិវាទការងារ សូមឱ្យបងប្អូនយើងមានការអត់ធ្មត់ធ្វើការដោះស្រាយដោយសន្តិវិធី តាមនីតិវិធីច្បាប់ស្ដីពីការងារ ជៀសវាងការធ្វើបាតុកម្មតាមទីសាធារណៈ ធ្វើឱ្យប៉ះពាល់ដល់កិត្តិយស ឬការបាត់បង់នូវអត្ថប្រយោជន៍ផ្សេងៗ។
លោក ច័ន្ទ សុខុមចិត្តា ប្រធានមន្ទីរការងារបណ្ដុះបណ្ដាលវិជ្ជាជីវៈខេត្ត មានប្រសាសន៍ថា ដើម្បីឆ្លើយតបទៅនឹងទិវាពលកម្មអន្តរជាតិ ១ឧសភា រាជរដ្ឋាភិបាលកម្ពុជា តាមរយៈក្រសួងការងារ និងបណ្ដុះបណ្ដាលវិជ្ជាជីវៈ បានយកចិត្តទុកដាក់ខ្ពស់ ក្នុងការបន្តលើកកម្ពស់លក្ខខណ្ឌការងារសិទ្ធិការងារ សេរីភាពអង្គការវិជ្ជាជីវៈ អត្ថប្រយោជន៍នៃរបបសន្តិសុខសង្គម អត្ថប្រយោជន៍នានារបស់បងប្អូនកម្មករ និយោជិត និងពង្រឹងយន្តការដោះស្រាយវិវាទការងារ ធ្វើយ៉ាងណាឱ្យទំនាក់ទំនងវិជ្ជាជីវៈកាន់តែប្រសើរឡើង៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
