ការដាក់សំណើដេញថ្លៃគម្រោងសាងសង់លូជ្រុងមួយកន្លែង ក្នុងឃុំសំរោង ស្រុកសូទ្រនិគម ខេត្តសៀមរាប ត្រូវបានបញ្ចប់ការដេញថ្លៃដោយជោគជ័យ នៅថ្ងៃទី០៦ ខែឧសភា ឆ្នាំ២០២៥នេះ ដោយមានការចូលរួមពីប្រធានលទ្ធកម្មឃុំ មន្ត្រីបច្ចេកទេសខេត្ត ក្រុមហ៊ុនម៉ៅការ អ្នកសារព័ត៌មាន និងមានអ្នកពាក់ព័ន្ធជាច្រើនរូប។
លោកស្រី ឃុន ស៊ីយ៉ុន ប្រធានគណៈកម្មការលទ្ធកម្មឃុំសំរោង ស្រុកសូទ្រនិគម បានឱ្យដឹងថា ចំពោះគម្រោងមូលនិធិឃុំឆ្នាំ២០២៥នេះ ឃុំសំរោង បានដាក់ដេញថ្លៃគម្រោងសាងសង់លូរមួយកន្លែង មានមុខកាត់៤ម៉ែត្រ និងកម្ពស់២ម៉ែត្រ ប្រវែង៧ម៉ែត្រ ក្នុងតម្លៃប៉ាន់ស្មាន ៥៧ ៧៤២ ៣០០រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផលបានទៅលើក្រុមហ៊ុន ហ៊ត់ ហេង ក្នុងតម្លៃ ៥៧ ០០០ ០០០រៀល។
ជាមួយនឹងការទទួលបានសិទ្ធិនៃការសាងសង់នេះ តំណាងក្រុមហ៊ុនម៉ៅការ បានធ្វើការប្ដេជ្ញាចិត្ត ដោយសន្យាសាងសង់ឱ្យត្រឹមត្រូវ ទាន់ពេលវេលា ស្របទៅតាមគំនូរប្លង់បច្ចេកទេស បទដ្ឋានគតិយុត្តនៃការសាងសង់ និងគោរពទៅតាមលក្ខខណ្ឌដែលចែងនៅក្នុងកិច្ចសន្យា៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
