ក្នុងកិច្ចប្រជុំត្រួតពិនិត្យ ពិភាក្សា និងផ្ដល់យោបល់លើសេចក្ដីព្រាងសៀវភៅផែនការត្រៀមបម្រុងសម្រាប់ឆ្លើយតបសង្គ្រោះបន្ទាន់គ្រោះមហន្តរាយទឹកជំនន់ ឆ្នាំ២០២៥ នៅថ្ងៃទី០៨ ខែឧសភានេះ លោក ចឹក គឹមជុន នាយករងរដ្ឋបាលសាលាខេត្ត និងជាអនុប្រធានអចិន្ត្រៃយ៍លេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តសៀមរាប បានជំរុញដល់អ្នកពាក់ព័ន្ធទាំងអស់ ត្រៀមលក្ខណៈសម្បត្តិឱ្យបានគ្រប់គ្រាន់ ដើម្បីឆ្លើយតបនឹងគ្រោះមហន្តរាយធម្មជាតិ ជាពិសេសនៅក្នុងរដូវវស្សាខាងមុខនេះ។
លោក ចឹក គឹមជុន បញ្ជាក់ថា កាលពីបណ្ដាឆ្នាំកន្លងទៅ ខេត្តសៀមរាប ធ្លាប់បានជួបនៅគ្រោះធម្មជាតិជារឿយៗ ជាពិសេសគ្រោះទឹកជំនន់ និងខ្យល់កន្ត្រាក់នៅរដូវវស្សា។ ក្នុងនោះគ្រោះទឹកជំនន់ មិនមានលក្ខណៈអូសបន្លាយរយៈពេលយូរដូចបណ្ដាខេត្តមួយចំនួននោះទេ ដែលហេតុនេះទំហំនៃការប៉ះពាល់ក៏សូវជាស្មុគស្មាញនោះដែរ។ យ៉ាងនេះក្តី ក្នុងការឆ្លើយតបទៅនឹងគ្រោះមហន្តរាយនេះ កន្លងមក គណៈកម្មាធិការគ្រប់គ្រងគ្រោះមហន្តរាយខេត្ត និងអាជ្ញាធរពាក់ព័ន្ធបានចូលរួមអន្តរាគមន៍ភ្លាមៗ នៅពេលមានគ្រោះថ្នាក់ ឬឧបទ្ទវហេតុផ្សេងៗកើតឡើង។
សូមជម្រាបថា រាជរដ្ឋាភិបាល អាណត្តិទី៧ ក្រោមការដឹកនាំរបស់ សម្តេចធិបតី ហ៊ុន ម៉ាណែត ជានិច្ចកាលសម្ដេច បានយកចិត្តទុកដាក់យ៉ាងខ្លាំងអំពីកត្តានានា ដែលបង្កឡើងដោយសារគ្រោះមហន្តរាយ ដែលមិនបណ្ដែតបណ្ដោយឱ្យប្រជាពលរដ្ឋណាម្នាក់ រងគ្រោះដោយសារតែកត្តាធម្មជាតិ ដោយគ្មានការយកចិត្តទុកដាក់ពីសំណាក់អាជ្ញាធរនោះឡើយ។
ព័ត៌មានជាតិ ថ្មីៗ
ជាមួយគ្នានេះ រាជរដ្ឋាភិបាល បានដាក់ចេញឱ្យប្រើប្រាស់នូវផែនការសកម្មភាពជាតិ សម្រាប់ការកាត់បន្ថយហានិភ័យគ្រោះមហន្តរាយ ឆ្នាំ២០២៤-២០២៨ សម្រាប់អាជ្ញាធរគ្រប់ជាន់ថ្នាក់ សហការរួមគ្នាក្នុងការអនុវត្តដោយផ្ដោតលើយុទ្ធសាស្ត្រអាទិភាពធំៗចំនួន៤ គឺ១.ការយល់ដឹងអំពីការគ្រប់គ្រង និងការកាត់បន្ថយហានិភ័យ គ្រោះមហន្តរាយ, ២.ការពង្រឹងអភិបាលកិច្ច ដើម្បីគ្រប់គ្រងហានិភ័យគ្រោះ មហន្តរាយ, ៣.ការវិនិយោគទៅក្នុងការកាត់បន្ថយហានិភ័យគ្រោះ មហន្តរាយសម្រាប់ភាពធន់ និង៤.ការបង្កើនការត្រៀមរៀបចំទៅនឹងគ្រោះមហន្តរាយ សម្រាប់ប្រសិទ្ធភាពនៃការឆ្លើយតបក្នុងការស្តារឡើងវិញ ការធ្វើឱ្យមានប្រក្រតីភាព និងការកសាងឡើងវិញ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
