ក្នុងកិច្ចប្រជុំគណៈកម្មាធិការអភិវឌ្ឍន៍ទេសចរណ៍ខេត្តសៀមរាប ដើម្បីជំរុញផែនការអភិវឌ្ឍទេសចរណ៍ភ្នំគូលែន នៅរសៀលថ្ងៃទី១២ ខែឧសភានេះ ក្រសួងទេសចរណ៍ និងអាជ្ញាធរខេត្តសៀមរាប បានជំរុញដល់អ្នកពាក់ព័ន្ធទាំងអស់បន្តរួមគ្នាអភិវឌ្ឍតំបន់ទេសចរណ៍ភ្នំគូលែន ពិសេសផ្នែកសេវាកម្ម និងអនាម័យ ព្រោះតំបន់ទេសចរណ៍ប្រវត្តិសាស្ត្រមួយនេះ មានទីតាំងចាប់អារម្មណ៍ជាច្រើនដូចជា សំណង់ប្រាសាទបុរាណ ស្ថានីយបុរាណ និងសហគមន៍មនុស្ស ដែលសុទ្ធសឹងតែជាទីតាំងទេសចរណ៍សំខាន់ៗ។
ឯកឧត្ដម នី ផល្លី រដ្ឋលេខាធិការក្រសួងទេសចរណ៍ បានបញ្ជាក់ថា រាជរដ្ឋាភិបាលកម្ពុជា បានកំណត់ថា តំបន់ឧទ្យានជាតិភ្នំគូលែន ជាគោលដៅដ៏មានសក្ដានុពលមួយ ហើយក្លាយជាមេដែកឆក់មួយទៀត ក្នុងការស្រូបទាញភ្ញៀវទេសចរក្រៅពីតំបន់ប្រាសាទ។ ដូច្នេះការយកចិត្តទុកដាក់ពីប្រមុខរាជរដ្ឋាភិបាល ស្ថាប័ន អង្គភាពពាក់ព័ន្ធ ពិតជាបានចូលរួមចំណែកយ៉ាងសំខាន់ ក្នុងការអភិវឌ្ឍវិស័យទេសចរណ៍នៅឧទ្យានជាតិភ្នំគូលែន ឱ្យបានកាន់តែប្រសើរឡើង។
លោក ង៉ូវ សេងកាក់ អភិបាលរងខេត្តសៀមរាប បានលើកឡើងថា តំបន់ឧទ្យានជាតិភ្នំគូលែន បានជួបនឹងកង្វះខាតមួយចំនួន ដូចជាផ្នែកសេវាកម្ម និងហេដ្ឋារចនាសម្ព័ន្ធទ្រទ្រង់ ជាពិសេសបញ្ហាបង្គន់អនាម័យ និងបញ្ហាប្រឈមមួយចំនួនទៀត ដែលក្រុមការងារពាក់ព័ន្ធក៏បានកំពុងដោះស្រាយជាបន្តបន្ទាប់។ ទោះជាយ៉ាងណាបញ្ហានេះ ទាមទារឱ្យមានការចូលរួមពីគ្រប់អ្នកពាក់ព័ន្ធទាំងអស់ រួមគ្នាជំរុញធ្វើឱ្យតំបន់ទេសចរណ៍មួយនេះកាន់តែមានភាពទាក់ទាញ និងទទួលបានកំណើនភ្ញៀវទេសចរកាន់តែច្រើនឡើងបន្ថែមទៀត។
សូមជម្រាបថា ឧទ្យានជាតិភ្នំគូលែន មានទឹកធ្លាក់ដ៏ត្រជាក់ដែលនៅក្បែរព្រះអង្គធំ ជាកន្លែងទាក់ទាញភ្ញៀវទេសចរទាំងជាតិ និងអន្តរជាតិទៅងូតកម្សាន្ត។ លើសពីនេះ លើភ្នំគូលែន ក៏មានប្រាសាទដែលមានប្រវត្តិដ៏អស្ចារ្យ រួមទាំងពើងធម្មជាតិផងដែរ។ តំបន់នេះមានហេដ្ឋារចនាសម្ព័ន្ធតភ្ជាប់ពីស្រុកស្វាយលើ ចុះទៅប្រាសាទបន្ទាយស្រី, ប្រាសាទបឹងមាលា និងមានផ្លូវតភ្ជាប់ទៅប្រាសាទកោះកេរ្តិ៍ផងដែរ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
