នៅថ្ងៃទី១៣ ខែឧសភា ឆ្នាំ២០២៥នេះ គណៈកម្មការលទ្ធកម្មឃុំពង្រក្រោម ស្រុកជីក្រែង ខេត្តសៀមរាប បានសម្រេចការដេញថ្លៃជាស្ថាពរនូវគម្រោងជួសជុលផ្លូវដីស ក្រាលក្រួសក្រហម៤ខ្សែ ប្រវែងជាង៣គីឡូម៉ែត្រ ដោយមានការចូលរួមពីមន្ត្រីបច្ចេកទេសសាលាខេត្ត អាជ្ញាធរស្រុក គណៈកម្មការលទ្ធកម្មឃុំ អ្នកព័ត៌មាន រួមនឹងតំណាងក្រុមហ៊ុនដេញថ្លៃ។
លោក ថោង បូរាណ ប្រធានគណៈកម្មការលទ្ធកម្មឃុំពង្រក្រោម ស្ដីទី បានឱ្យដឹងថា ឆ្នាំ២០២៥នេះ ឃុំពង្រក្រោម បានដាក់ដេញថ្លៃគម្រោងជួសជុលផ្លូវដីស ក្រាលក្រួសក្រហម ៤ខ្សែ ប្រវែង ៣.៦៩គីឡូម៉ែត្រ ទទឹង៥ម៉ែត្រ កម្រាស់០,១៥ម៉ែត្រ, សាងសង់លូកាត់ផ្លូវ៩កន្លែង, សាងសង់លូមូលភ្លោះមុខកាត់១ម៉ែត្រ ប្រវែង៧ម៉ែត្រ ២កន្លែង, សាងសង់លូមូលទោលមុខកាត់១ម៉ែត្រ ប្រវែង៧ម៉ែត្រ ៣កន្លែង, សាងសង់លូមូលទោលមុខកាត់០,៨០ម៉ែត្រ ប្រវែង៧ម៉ែត្រ ៤កន្លែង, ដាក់លូការពារផ្លូវចំនួន១៦កង់, ស្លាកសញ្ញាគម្រោង ១កន្លែង និងការថែទាំរយៈពេល៦ខែ ក្នុងតម្លៃប៉ាន់ស្មាន ៣៨៤ ៤៣៧ ៩២៧រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផលបានទៅលើកក្រុមហ៊ុន សុី.អេស.អិល (CSL) ក្នុងតម្លៃ ៣៨២ ៨៩៩ ៩៩៩រៀល។
ជាមួយនឹងការទទួលបានគម្រោងសាងសង់ផ្លូវខាងលើ តំណាងក្រុមហ៊ុនដែលទទួលបានការម៉ៅការ បានធ្វើការប្ដេជ្ញាចិត្តដោយសន្យាថានឹងធ្វើឱ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស និងតាមលក្ខខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖ លោក ទេស ចន្ទវិបុល
កែសម្រួល៖ លោក អ៊ុន ណារាជ្យ
